तनहुँ–क्रिसमसको दिन एक युवतीलाई भेट्न पुगेका युवा तिनै युवतीको कारण मारिएका छन्। गोरखाको पालुङटार घर भएका २५ वर्षिय ओम सुनुवार युवतीका आफन्तहरुबाट मारिएका हुन्।
करिब एक महिनाअघि ओमको तनहुुँ व्यास नगरपालिका घर भएकी विपना भन्ने निर्मला गुरुङसँग चिनजान भएको थियो। उनीहरुबीच नियमित रुपमा फोनमा गफ हुन्थ्यो।
गत पुस १० गते क्रिसमसको दिन ओमलाई विमलाले फोन गर्दै भेट्न बोलाइन्। त्यो दिन उनी पालुङटारस्थित घरमै थिए। उनी हानिएर तनहुँ आए। व्यासको मिर्लुङ स्टार होटलमा उनीहरुको भेट तय भयो।
विपनाले आफ्नो साथी विमलालाई समेत लिएर आएकी थिइन्। उनीहरुले सँगै बसेर होटलमा खाजा खाए। सुनुवारले रक्सी पनि पिए भने युवतीले खाजा मात्र खाए।
होटलको रेष्टुरेन्टमा खाजा खाइरहेकी बेला विपनाका माइलो बुबाका छोरा महेन्द्र गुरुङ आइपुग्छन्। उनी पनि रक्सी पिएर होटलमा पुगेका थिए। आफ्नो बहिनी नचिनेको केटासँग राती अबेरसम्म होटलमा बसेको देखेपछि उनले सुरुमा बहिनीहरुलाई गाली गलेर त्यहाँबाट पठाउँछन्। त्यसपछि सुनुवारसँग उनको झगडा सुरु हुन्छ।
‘तँ को होस्, म पनि यही ४ नम्बरको केटा हो, किन ठुलो बन्न खोजेको भन्दै’ सुनुवार पनि झगडा गर्न अघि बढ्छन्। झगडा बढ्दै गएपछि महेन्द्रसहित तीन जनाले उनलाई होटलबाट बाहिर निकालेर एकान्तमा पु¥याए। त्यहाँ टाउकोमा ढुङगाले हानेर उनीहरु भागेका थिए। घटनाको १० दिनपछि उनीहरु पक्राउ परेका हुन्।
यसरी समातिए
प्रहरीले भोलीपल्ट शव फेला पारेपछि अनुसन्धान अघि बढायो। नायब निरीक्षक मनोज पाण्डे नेतृत्वको टोलीले अनुसन्धान अघि बढायो । मृतकको विपनासँग फोन सम्पर्क देखियो। प्रहरीले उनलाई फोन गरेर बोलायो। उनले कहिले आफु पोखरा तथा कहिले लमजुङ भएको भन्दै ढाटिन्। २ दिनपछि मोबाइल नै स्वीच अफ गरिन्। त्यसपछि उनीमाथि प्रहरी आशंका झन् बढ्यो।
केही दिनपछि उनीहरुलाई पक्राउ गर्न प्रहरी सफल भयो। सुरुमा उनीहरुले केही पनि थाहा नभएको बताएका थिए। पछि घटनाको वास्तविकता बताएका हुन्। त्यसपछि महेन्द्रसहित हत्यामा उनलाई सहयोग गर्ने देवेन गुरुङ र रुपसिंह गुरुङलाई समेत पक्राउ गरेको छ। विपना र उनको बहिनी विमलाविरुद्ध समेत कर्तव्य ज्यान मुद्दामा कारबाही अघि बढाइएको जिल्ला प्रहरी कार्यालय तनुहँका डिएसपी सुनिल मल्लले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
