काठमाडौं- न्यूनतम तापक्रम घटेका कारण काठमाडौँ उपत्यकासहित देशभर चिसो बढेको छ।
चिसो बढेसँगै तराईमा लगातारको बाक्लो हुस्सु र शीतलहरका कारण जनजीवन प्रभावित भएको छ। काठमाडौँ उपत्यकाको न्यूनतम तापक्रम तीन दिनदेखि एक डिग्रीमा झरेको छ। आजको न्यूनतम तापक्रम एक दशमलव ६ डिग्री सेल्सियस छ।
घटेर स्थिर रहेको तापक्रमकै कारण उपत्यकाको जनजीवनसमेत प्रभावित बनेको छ। उपत्यकाका फाँटमा बिहानीपख बाक्लो तुसारो पर्न थालेको छ। रातमा आकाश खुल्ला भएकै कारण केही दिन न्यूनतम तापक्रम स्थिर रहने बताइएको छ।
मौसमी प्रणालीकै कारण न्यूनतम तापक्रम घटेकाले देशभर चिसो बढेको मौसमविद् राजु प्रधानाङ्गले बताए। उनका अनुसार अझै न्यूनतम तापक्रम घट्ने हुँदा चिसो बढ्ने सम्भावना छ।
आज पनि पूर्वदेखि पश्चिमसम्मको तराई भेगमा बाक्लो हुस्सु लागेको छ। पहाड र हिमाली क्षेत्रमा भने मौसम सफा रहेको छ।
काठमाडौँको रेकर्ड माइनस ३
काठमाडौँ उपत्यकाको न्यूनतम तापक्रमको विगतको अवस्थालाई हेर्दा अहिलेसम्म माइनस ३ डिग्रीभन्दा तल झरेको छैन।
मौसम पूर्वानुमान महाशाखाका अनुसार सन् १९९८ जनवरी ११ को दिन हालसम्मकै सबैभन्दा कम न्यूनतम तापक्रम माइनस ३ दशमलव ५ डिग्रीसेल्सियस पुगेको थियो।
अघिल्लो वर्ष सन् २०१७ को जनवरी १४ मा शून्य दशमलव ४ डिग्रिसेल्सियस तापक्रम रेकर्ड भएको थियो। विगतको अवस्थालाई हेर्दा यो पटक न्यूनतम तापक्रम अझै घट्ने मौसमविद् प्रधानाङ्गको भनाइ छ।
महाशाखाका अनुसार काठमाडौँमा गत २० गते न्यूनतम एक दशमलव ५ डिग्री सेल्सियस रहेको थियो भने शुक्रबार र आज एक दशमलव ६ रहेको छ। आज सबैभन्दा कम जुम्लामा न्यूनतम तापक्रम माइनस ८ दशमलव ५ र सबैभन्दा बढी विराटनगरमा ७ दशमलव ७ डिग्री सेल्सियस छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1766919412.png)
-1764146706.png)
-1766648928.png)
