काठमाडौं- नेपाल कम्युनिस्ट पार्टीकी सांसद पम्फा भुसालले राज्य श्रोतबाट संञ्चालित पितृसत्तावादी संस्था खारेज गर्न माग गरेकी छन्।
प्रतिनिधिसभाको आइतबारको बैठकको विशेष समयमा बोल्दै सांसद भुसालले राज्य संञ्चालनको नयाँ व्यवस्था आईसक्दा पनि श्रीमानको हैसियतको आधारमा बनेका संस्था कायमै रहेकाले खारेज गर्न माग गरेकी हुन्।
'अझै पनि मुलुकमा पितृसत्तावादी र सामन्ती परिपाटी विद्यमान रहेको भन्दै सैनिक श्रीमती संघ, नेपाल प्रहरी श्रीमती संघ, प्रहरी परिवार श्रीमती संघ, निजामति कर्मचारी श्रीमती संघ जस्ता श्रीमानको हैसियतमा बनेका संस्था खारेज गर्नुपर्छ,' उनले भनिन्, 'श्रीमानका आधारमा श्रीमतीले सुविधा लिने। परिवारका नाममा परिवारका सदस्यले सुविधा लिने व्यवस्थाको हामीले अन्त्य गरेका हौँ। राष्ट्रप्रमुख, शासन प्रमुखसँग सम्बन्ध गाँसेबापत नागरिकभन्दा माथि हुने व्यवस्थाको हामीले अन्त्य गरेका छौं। तर अहिले पनि यो देशमा महत्वपूर्ण निकायहरुमा त्यो परिपाटी विद्यमान छ। म त्यसको अन्त्य गरियोस् भन्ने चाहन्छु।'
भुसालले गणतन्त्रसँग मेल नखाने राज्यकै बजेटबाट संञ्चालन भएका संस्थाहरु तत्काल खारेज गर्न माग गरिन्।
विशेष समयमा बोल्ने नेपाली कांग्रेसका सांसद दिलेन्द्र प्रसाद बडूले सरकारले सत्ता र शक्तिको भरमा अपराधीलाई संरक्षण दिने काम गरेको भन्दै गम्भीर आपत्ति जनाएका थिए। यसैगरी उनलेहालै प्रहरी नियन्त्रणमा रहेका कपिलवस्तुका नसिम अहमद खान बादशाह नेकपाका संगठित सदस्य भएको भन्ने आएको भन्दै यथार्थ जानकारी गराउन माग गरे। बादशाहकी श्रीमती प्रदेश नम्बर ५ मा नेकपाकै समानुपातिक सांसद भएको मात्र नभएर उनको दुईवटा नागरिकता भएकोमा कपिलवस्तुमा मुद्दा चलिरहेको भन्दै यसबारे प्रधानमन्त्री, गृहमन्त्री र नेकपाका अध्यक्षको ध्यानाकर्षण गराएका थिए।
राजपाका सांसद लक्ष्मण लाल कर्णले गिरिशचन्द्र लाल आयोगको प्रतिवेदन सार्वजनिक नभए सदनबाटै प्रतिकारमा उत्रने चेतावनी दिएका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
