काठमाडौं- भारत तथा तेस्रो मुलुकबाट आयात गरिने फलफूल र तरकारीमा विषादी परीक्षण गरेर मात्रै नेपाल भित्रिन दिने निर्णयबाट सरकार पछि हटेको छ।
सरकारले केही समयअघि भारत तथा तेस्रो मुलुकबाट आयातित तरकारी र फलफूल नेपाल भित्र्याउँदा भन्सार नाकामा विषादी चेकजाँच गरेर मात्रै भित्र्याउने निर्णय गरेको थियो। तर, सरकार आफ्नो उक्त निर्णयबाट पछि हटेको छ।
शुक्रबार कृषि तथा पशुपंक्षी विकासमन्त्री चक्रपाणि खनालले कृषि, सहकारी तथा प्राकृतिक स्रोत समिति बैठकमा बोल्दै विषादी चेकजाँचको काम तत्कालका लागि रोकिएको बताए।
आन्तरिक उत्पादनको प्रवर्द्धन र आयात प्रतिस्थापका लागि भन्दै उद्योग, वाणिज्य तथा आपूर्ति मन्त्रालयको पहलमा सरकारले तरकारी तथा फलफूल आयातमा कडाई गरेको थियो। सरकारले विषादी चेकजाँचका लागि तयारी नपुगेको भन्दै तत्काल उक्त निर्णय कार्यान्वयन नगर्न भने पनि त्यसको पछाडि भारतीय दूतावासबाट सरकारलाई आएको दबाबलाई पनि मुख्य कारण ठानिएको छ।
‘वाणिज्य मन्त्रालयले बिषादी परीक्षण गरेर मात्र आयात गर्नका लागि प्रस्ताव ल्याएपछि मन्त्रिपरिषद्ले पनि स्वीकृत गर्यो। राजपत्रमा पनि प्रकाशित भयो। कृषि मन्त्रालयले बिषादी परीक्षण सुरु पनि गर्यो। परीक्षण सुरु भएपछि कहाँ के हल्ला चल्यो, कुरो कहाँ-कहाँ पुग्योे, कहाँबाट के भयो थाहै भएन,’ मन्त्री खनालले भने।
‘हामीले त काम सुरु गरिसकेका थियौं। तर, बिहीबार फेरि वाणिज्य मन्त्रालयले नै पूर्वाधार नभएका कारण काम गर्न सकिएन, पहिला पूर्वाधार तयार गरौं भनेर मन्त्रिपरिषद्मा अर्को प्रस्ताव लग्यो र सँगसँगै विषादी परीक्षण नगरिकनै आयात गर्न दिने प्रस्ताव पनि पारित भयो,’ खनालले भने।
विषादी चेकजाँचमा कडाई भएपछि सयौंको संख्यामा मालबाहक ट्रक तथा कन्टेनरहरु भन्सार नाकामा अड्केर बसेका थिए।
भारतबाट नेपाल भित्रिने तरकारी र फलफूलमा कडाई भएपछि भारतीय दूतावासले त्यसमा चासो देखाएको थियो। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
