काठमाडौ– उच्च अदालतमा कार्यरत रहेका एक कर्मचारीले आफूले लिएको घुस रकम गायव पार्न आफ्ना ११ वर्षीय छोरालाई समेत प्रयोग गरेको भन्दै अख्तियार दुरुपयोग अनुसन्धान आयोगले भ्रष्टाचार मुद्दा दायर गरेको छ।
बाबुले लिएको अख्तियारको 'स्टिङ अप्रेसन'को ३ लाख रुपैयाँ गायब पार्ने कार्यमा सहयोग गरेको भन्दै ११ वर्षीय बालकविरुद्ध विशेष अदालतमा गत असार १७ गते मुद्दा दायर गरेको खुलेको हो।
अख्तियारले घुस लिने कर्मचारीविरुद्ध ‘स्टिङ अप्रेसन’ अभियान सञ्चालन गर्दै भ्रष्टाचार मुद्दा चलाउँदै आएको थियो। घुस लिने कर्मचारीलाई मुद्दा चलाउन उसले सेवाग्राहीलाई घुस रकम दिँदै आएको थियो। सो घुस रकम सेवाग्राहीले घुस लिने कर्मचारीलाई बुझाउने गरेका थिए।
यसका लागि अख्तियारले आफूले सेवाग्राहीलाई दिएको नोटको फोटोकपी गरी रेकर्ड राख्ने गर्दछ। यसरी घुस लिने कर्मचारीलाई उजुरीकर्ताको सहयोगमा रकम दिएर गरिने कारबाहीलाई ‘स्टिङ अपरेसन’को नाम दिने गरिएको छ। उच्च अदालतका एक कर्मचारीका हकमा ‘स्टिङ अपरेसन’ गर्दा भने अख्तियार नै जिल्लिएको थियो।
यसरी गायब भयो रकम
कुष्णकुमार पाठक कुनै समय विशेष अदालतमा फोटोकपी सेक्सनमा कार्यरत रहेका थिए। लामो समय विशेष अदालतमा रहेका उनी उच्च अदालत तुलसीपुर सरुवा भएका थिए। टाइपिस्टअन्तर्गत नासुमा कार्यरत रहेका कुष्णकुमार पाठक उच्च अदालत पुगेपछि सेवाग्राहीसँग घुस मागेको उजुरी अख्तियारमा पर्यो। उच्च अदालतका कर्मचारी पाठकमाथि 'स्टिङ अप्रेसन' गर्न अदालतबाट अख्तियारले अनुमति समेत लियो।
अख्तियारको बुटवल कार्यालयको सम्पर्क कार्यालय नेपालगञ्जले सेवाग्राहीलाई ३ लाख रुपैयाँ फोटोकपी गरेर दियो। उच्च अदालत तुलसीपुरको नेपालगञ्ज इजलासका टाइपिस्ट नायब सुब्बा पाठक घुसको रकम लिन नेपालगञ्ज पुगे।
अख्तियारले आफ्नो पूर्ववत् योजनाअनुसार नै सेवाग्रही र पाठकलाई निगरानी गर्न थाल्यो।
टाइपिस्ट नासु पाठक अदालतमा विचाराधीन मुद्दामा सहजीकरण गरिदिने भन्दै सेवाग्राहीसँग घुस लेनदेन गर्न नेपालगन्जको चार बाहीनीचोकमा रहेको श्री लयर्स च्याम्बरमा पुगेका थिए। सो क्रममा सेवाग्राहीले पाठकलाई रकम दिए। त्यसको केही समयमा अख्तियारको टोली उनलाई पछ्याउँदै सोही स्थानमा पुगेको थियो। त्यसपछि पाठकलाई अख्तियारले नियन्त्रणमा लियो। तर, पाठकसँग अख्तियारले रकम फेला पार्न सकेन।
उनीसँगै आएका अर्का कार्यालय सहायक गयादिन कडरियासमेत अख्तियारको फन्दामा परे। उनले समेत सेवाग्राहीसँग १० हजार रुपैयाँ लिएका थिए। कडरियाले लिएको रकम अख्तियारको टोलीले तत्कालै फेला पार्यो। तर, पाठकको चलाखी देखेर अख्तियारको टोली नै अचम्ममा पर्यो। पाठकले आफ्ना छोरा आदित्यकुमार पाठकलाई घुसको रकम दिएर पठाएको अख्तियारले पत्ता लगायो।
वकिलको ल फर्म (नेपालगञ्ज चारबाहिनी चोकस्थित श्री लयर्स च्याम्बर)बाट घुससहित रंगेहात अदालतका कर्मचारी पक्राउ पर्नुले अदालतभित्र हुने भ्रष्टाचार र वकिलको संलग्नताबारे पनि अख्तियारले अनुसन्धान थालेको थियो।
तर, अख्तियारले पाठकका बाबुछोरा र कार्यालय सहयोगी कडरियालाई मात्र भ्रष्टाचार मुद्दा दायर गर्यो।
बालकलाई ३ वर्षभन्दा धेरै कैद सजाय माग
अख्तियारले पाठकलले लिएको ३ लाख रुपैयाँ घुसमा छोरा आदित्यले लिएर फरार भएकाले प्रत्यक्ष संलग्न देखिएको भन्दै 'भ्रष्टाचार निवारण ऐन'अनुसार सजाय हुनुपर्ने माग गरेको छ।
अख्तियारले 'भ्रष्टाचार निवारण ऐन'अनुसार ११ वर्षीय पाठकसँग ३ लाख विगो तथा जरिवाना र ३ वर्षभन्दा धेरै कैदको सजाय माग गरेको छ। विशेषले दोषी ठहर गरेमा उनी सुधार केन्द्रमा बस्नुपर्ने हुनसक्छ।
यसअघि काठमाडौं जिल्ला अदालतका एक कर्मचारी रंगेहात घुससहित पक्राउ परेका थिए। मुद्दा मिलाइदिने बहानामा कर्मचारी ट्रेड युनियनका नेता नै पक्राउ परेपछि जिल्ला न्यायाधीशसमेत विवादमा तानिएका थिए।
यो पनिः
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।