काठमाडौं– नेत्रविक्रम चन्द (विप्लव) नेतृत्वको नेपाल कम्युनिष्ट पार्टी (नेकपा) का एक कार्यकर्तालाई अत्याधुनिक हतियारसहित प्रहरीले पक्राउ गरेको छ।
असार १६ गते संखुवासभामा भएको प्रहरीसँगको मुठभेडमा आफ्ना ३ कार्यकर्ता बेपत्ता भएको विप्लव नकेपाले दाबी गरेको थियो। सोही मध्येका एक कार्यकर्ता अत्याधुनिक हतियारसहित पक्राउ परेका हुन्।
प्रहरीले संखुवासभाको सिलिचोङ गाउँपालिका–१ बाट हातहतियार र गोलीगठ्ठासहित ओखलढुंगाको चिशंखुगढी गाउँपालिका–७ का निम दोजी तामाङलाई पक्राउ गरेको हो।
जिल्ला प्रहरी कार्यालय संखुसभाबाट गस्तिमा खटिएको प्रहरी टोलीलाई तामाङ सहितको टोलीले असार १६ गते बिहान १० बजे होयङ्ला भन्ने स्थानमा प्रहरीलाई लक्षित गरी गोली फायर गरेको प्रहरीले दाबी गर्दै आएको छ।
प्रहरीले आत्मरक्षाको लागि जवाफी फायर गर्दै सर्च गर्ने क्रममा असार १७ गते तामाङको साथबाट १ थान एसएलआर, त्यसको गोली ६५ राउन्ड, म्यागजिन १ थान, र १३ थान खोका तथा एलएमजी राइफलको २० राउन्ड गोली, म्यागजिन १ थान, बिष्फोटन गराउन प्रयोग गरिने रातो रङको ३४ फिट लामो डेडकर्ड र मेमोरी कार्ड सहितको मोबाइल थान १ बरामद गरिएको जनाएको छ।
यसैगरी सिलिपिङ व्याग थान १, पछाडि भिर्ने कालो रङको झोला थान १, कार्लमाक्स व्यक्तित्व र कृतित्व लेखेको किताव थान १, खाली डायरी थान १ समेत बरामद गरिएको छ। यसरी हातहतियार सहित पक्राउ परेका निम दोर्जी तामाङ उपर जिल्ला प्रहरी कार्यालय संखुवासभाबाट थप अनुसन्धान तथा कानुनी कारबाही प्रक्रिया अगाडि बढाइएको छ।
असार १६ गते संखुवासभामा मुठभेड भएपछि काठमाडौंबाट इन्सपेक्टर शेखरजंग मल्लको नेतृत्वमा ३५ र सशस्त्र प्रहरीका इन्सपेक्टर उमेश थापाको नेतृत्वमा १० गरी ४५ जनाको टोली सेनाको हेलिकप्टरमार्फत टोली संखुवासभा गएको थियो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1779545841.jpg)
-1764146706.png)
