काठमाडौं- बाँके कोहलपुरका २ छात्रा मंगलबार साँझदेखि बेपत्ता भएका छन्। बेपत्ता हुनेमा कोहलपुर नगरपालिका-११, दसबिघा बस्ने १३ वर्षीया दीपा बुढाथोकी र सोही वडाको लोकनगरकी १५ वर्षीया प्रियंका बुढाथोकी छन्।
कोहलपुरको बर्दहवास्थित लक्ष्मी माविमा दीपा कक्षा ७ र प्रियंका कक्षा ८ मा अध्ययन गर्छन्।
मंगलबार साँझ उनीहरु सोही विद्यालयमा अध्ययनरत अन्य ३ छात्रसँगै कोहलपुरबाट निस्किएको बताइएको छ। कोहलपुरबाट निस्किएपछि उनीहरु मंगलबार महेन्द्रनगर गएर बसेको थाहा हुन आएको बेपत्ता मध्येकी एक दीपाका बुवा चन्द्रबहादुर बुढाथोकीले बताए।
मंगलबार करिब साँझ ७ बजे कोहलपुरबाट निस्किएका पाँचै जना कञ्चनपुरको महेन्द्रनगरस्थित राजधानी होटलमा बसेको र बिहानै सो स्थानबाट निस्किएको उनले बताए। त्यसपछि चाँदनीदोधारातर्फ लाग्दा उनीहरु बीच दुरी बढेको र दुवै किशोरीलाई नदेखेपछि किशोरहरु भने घर फर्केको बुढाथोकी बताउँछन्।
उनका अनुसार फर्किनेमध्येका एक किशोर सम्पर्कमा छन् भने बाँकी दुईबारे जानकारी हुन सकेको छैन। सम्पर्कमा आएका किशोरले घटनाबारे आफूहरुलाई बताएको र सोहीअनुसार नै प्रहरीको सहयोगमा खोजी गरिरहेको बुढाथोकीले बताए।
दीपाले लेखेकी छन्- मेरो खोजी गर्नु पर्दैन
दीपाका बुवा चन्द्रबहादुरका अनुसार मंगलबार साँझ करिब ७ बजेतिर दीपा घरमा कसैलाई थाहा नदिई निस्केकी थिइन्। ५ वर्षको भाइलाई नजिकै रहेको मामाघरमा छोडेर पुनः उनी घरमा आएकी थिइन्। त्यसपछि उनले पैसा राख्ने गरेको स्थानबाट १२ हजार निकालेर एक पत्र लेखेर घरबाट बाहिरिएको उनले बताए। उनका अनुसार पत्रमा लेखिएको छ- ‘म निस्केँ। मेरो खोजी गर्नुपर्दैन।’
‘घरबाट निस्कने बेला हामी कसैलाई थाहा थिएन। केहीबेरसम्म त हामीलाई उनको बारेमा हेक्का पनि भएन। पछि सोधखोज गर्दा कतै नदेखेपछि कोठामा चेक गरेँ,’ नेपाल लाइभसँग टेलिफोनमा भने, ‘कोठामा सानो पत्र लेखेर छोडेकी रहिछन्।’
पहिले पैसाको बारेमा ख्याल नै नगरेको तर पछि हेर्दा पैसा पनि लगेको भेटिएको उनले बताए। ‘घरमा ३०/३२ हजार रुपैयाँ थियो। जसमध्ये १२ हजार निकालेर लगिछन्,’ उनले भने।
किन पुगे महेन्द्रनगर?
दीपासँगै अन्य ४ जना किशोरकिशोरी कोहलपुरबाट निस्केका थिए।
भारत जाने भन्दै उनीहरु त्यहाँबाट निस्केको हुनसक्ने चन्द्रबहादुरको अनुमान छ। ‘हामीलाई जानकारी मिलेसम्म किशोरहरुको पढाइ खासै राम्रो थिएन। प्रियंकाले पनि घरमा त्यति राम्रो व्यवहार नगर्ने भनेर सुनाउँथिन् ,' उनी भन्छन्, 'मेरी छोरी पनि उनीहरुकै साथी भएकोले संगतमा लागेर भारत जाने भनेर उनीहरुसँगै लागिहोलिन्।’
महेन्द्रनगरको चाँदनीदोधारातर्फ जाने खण्डमा अन्तिम पटक देखेको ती किशोरले आफूसँग भनेको चन्द्रबहादुरले बताए।
३ किशोर घर फर्किए, २ किशोरी कहाँ गए?
दीपा र प्रियंकासँगै कोहलपुरबाट महेन्द्रनगर गएका ३ किशोर बुधबार नै घर फर्किए। ती मध्ये सम्पर्कमा आएका एक किशोर हुन्, कोहलपुर-११ मा बस्दै आएका विशाल घर्तीमगर। १६ वर्षका उनको घर दाङ भए पनि मामाघर नजिक कोठा भाडामा लिएर बस्दै आएका थिए।
‘विशालका छिमेकीले उनलाई हाम्रो सम्पर्कमा ल्याइदिएका हुन्। अहिले उनी हामीसँगै छन्, उनका बुवा पनि हामीसँगै महेन्द्रनगरमै हुनुहुन्छ,’ चन्द्रबहादुरले भने, ‘उनले भनेका कुरा र हामीले महेन्द्रनगरमा बुझ्दा पाएको जानकारी करिब उस्तै लागिरहेको छ। उनले दीपाले लगेर गएको मध्येबाट ६ हजार रुपैयाँ पनि हामीलाई फिर्ता बुझाइसकेका छन्।’
विशालले केके भने भन्ने बारेमा पनि चन्द्रबहादुरले नेपाल लाइभसँग खुलाएका छन्।
‘उनीहरु मध्यरात १२ बजे महेन्द्रनगर पुगेछन्। त्यहाँको राजधानी होटलमा गएर चाउमिन खाएछन्। होटलमा साहुजी रहेनछन्। त्यहाँका स्टाफले नानीहरुलाई माथिल्लो फ्ल्याटमा र बाबुहरुलाई तल्लो फ्ल्याटमै सुत्ने व्यवस्था मिलाइदिएछन्। कोठामा पुगेपछि उनीहरु नुवाइधुवाइ गरेर सुतेछन्। बिहान सबेरै उनीहरु सबै होटलबाट निस्किएर भन्सार लाइनतर्फ जाने बाटो हुँदै चाँदनीदोधारातर्फ अगाडि बढेछन्,' चन्द्रबहादुरले भने, 'हिँड्दाहिँड्दै नानीहरु अघिअघि भएछन्। बाबुहरु भने पछि परेछन्। दुरीमा धेरै नै पछि परेको जस्तो लागेपछि बाबुहरुले केहीबेर उनीहरुलाई त्यहाँ खोजेछन्। पछि पत्ता नलागेपछि बाबुहरु भने त्यहाँबाट फर्किएको विशालले हामीसँग बताएका छन्।’
विशालका अनुसार त्यतिन्जेलमा ५ हजार जति खर्च भइसकेको थियो। ६ हजार उनीसँगै रहेकाले किशोरीहरुसँग १ हजार जति मात्रै बाँकी रहेको हुन सक्ने चन्द्रबहादुरले बताए।
विशालबाहेक अन्य दुई किशोर भने बुधबार घरमा आए पनि त्यसपछि पुनः सम्पर्कबाहिर रहेको एक स्थानीयले बताए।
के भन्छ प्रहरी?
छोरी घरमा नभेटिएपछि कोहलपुरको प्रहरी कार्यालयमा ‘मिसिङ कम्प्लेन’ दर्ता गराएको चन्द्रबहादुर बताउँछन्।
बाँकेका प्रहरी प्रमुख प्रहरी उपरीक्षक वीरबहादुर वलीले ५ किशोरकिशोरी हराएको जानकारी पाएको बताए। ‘३ जना किशोरी र २ किशोर हराएको हामीलाई जानकारी मिलेको छ, त्यसपछि नै हामी खोजीमा लागेका छौं,’ वलीले भने, ‘महेन्द्रनगरमा अन्तिम पटक देखिएको भन्ने कुरा आएपछि मैले कञ्चनपुरमा समेत सर्कुलर गरेको छु। उताबाट पनि खोज्ने क्रम जारी छ।’
३ किशोर फर्किएको सम्बन्धमा बुझ्दा उनले भने, ‘तपाईंसँग कुरा गर्नुअघिसम्म म सोही बारेमा कुरा गर्दै थिएँ। तीमध्ये एक किशोर सम्पर्कमा आएको बुझेको छु। उनीसँग थप सोधपुछ भइरहेको छ।’
कञ्चनपुरका प्रहरी प्रमुख दिनेश आचार्यले ले पनि किशोरीहरुको खोजी कार्य जारी राखिएको बताए। ‘खबर पाउनासाथ खोजी गरिरहेका छौं। उनीहरुका बुवाआमा तथा आफन्तसँग पनि सोधपुछ भइरहेको छ,’ आचार्यले भने, ‘हराएका भनिएका मध्ये एक किशोर सम्पर्कमा छन्। उनीबाटै अरु सूचना लिइरहेका छौं।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
