सुर्खेत– रुघाखोकी र भाइरल ज्वरोले हुम्लामा ६ जनाको मृत्यु भएपछि महामारी नियन्त्रणका लागि प्रभावित क्षेत्रमा औषधि र चिकित्सकसहितको टोली पठाइएको छ। पछिल्लो तीन दिनमा रुघाखोकीबाट ६ जनाको ज्यान गएपछि उपचारको लागि टोली खटाइएको हो।
जिल्ला स्वास्थ्य कार्यलय हुम्लाले डाक्टर नविन रोकायाको नेतृत्वमा पाँच जनाको टोली उपचारका लागि रोग प्रभावित क्षेत्र सर्केगाड गाउँपालिकाको वडा नम्बर ७ र ८ मा खटाएको छ। नागरिकको ज्यान नै जानेगरी महामारी फैलिएपछि स्थानीय प्रशासनको सक्रियतामा टोली पठाइएको प्रमुख जिल्ला अधिकारी रिद्धीप्रसाद सिटौलाले जानकारी दिए।
महामारीबाट ताँजाकोट गाउँपालिका वडा नम्बर ५ का २७ वर्षीया रनदेवी परियार, ६० वर्षीया नन्दकली परियार, सर्केगाड गाउँपालिका वडा नम्बर ७ का ९१ वर्षीय भ्याँले कार्की, ९२ वर्षीय खैरे शाही, ८८ वर्षीय गोरे जैशी र ७५ वर्षीय शंकरे रोकायाको पछिल्लो तीन दिनमा मृत्यु भएको छ।
हुम्लाका विभिन्न स्थानमा अहिले रुघाखोकी र भाइरलको प्रकोप देखिएको छ। ज्वरो आउने, श्वासप्रश्वासमा समस्या, स्वर सुक्ने, बान्ता हुने लगायतको समस्याबाट स्थानीयहरु पीडित बनेका छन्। रोगले वृद्धा तथा बालबालिकालाई बढी प्रभाव पारेको छ।
स्वास्थ्य संस्थामा औषधि अभाव
गाउँमा महामारी फैलिए पनि स्थानीय स्वास्थ्य संस्थामा भने औषधिको अभाव भएको छ। स्वास्थ्य संस्थामा औषधि नहुँदा ६ जनाले ज्यान गुमाउनुपरेको स्थानीयले बताएका छन्। गाउँमा स्वास्थ्यकर्मी नहुनु र स्वास्थ्य संस्थामा औषधि उपलब्ध नहुँदा बिरामीको अकालमै ज्यान गएको उनीहरुको गुनासो छ।
महामारी प्रभावित क्षेत्रमा रहेका स्थानीय स्वास्थ्य चौकी रोडिकोट र प्राथमिक स्वास्थ्य चौकी राहदेवमा सिटामोल समेत नपाइएको जनाइएको छ। विगत तीन महिनादेखि स्वास्थ्य संस्थामा औषधि सकिएको राहदेव प्राथमिक स्वास्थ्य चौकीका इन्चार्ज सुपे ऐडीले बताए। उनले दिनानुदिन बिरामीको संख्या बढे पनि उपचारका लागि आवश्यक औषधिको अभाव रहेको जनाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
