काठमाडौं– साताव्यापी उत्तरी छिमेकी चीन भ्रमणमा रहेका परराष्ट्र मन्त्री प्रदीप ज्ञवालीले वातावरण परिर्वतनले ल्याएको प्रतिकुूल असरको समाना गर्न वृहत्तर अन्तर्राष्ट्रिय सहकार्यको आवश्यकता भएकोमा जोड दिएका छन्।
चीनको डालिनमा आयोजित विश्व आर्थिक मञ्चको १३औं वार्षिक बैठक अन्तर्गतको सत्र ‘वातावरण परिवर्तनः अर्को आर्थिक संकट ?’ सत्रलाई मंगलबार सम्बोधन गर्दै ज्ञवालीले यस्तो बताएका हुन्।
पारिस्थितिक प्रणालीलाई कायम गर्न नेपालका हिमाल, नदी र वनजंगलको महत्वपूर्ण योगदान गरेको उल्लेख गर्दै ज्ञवालीले कार्बन उत्सर्जनमा नेपालको भूमिका न्यून भए पनि त्यसको चोट असंगत तरिकाले खेप्नु परेको बताए।
बेइजिङस्थित नेपाली दूतावासका अनुसार मन्त्री ज्ञवालीले उक्त सत्रमा जलवायु न्यायलाई पनि प्रवर्द्धन गनुपर्ने धारणा राखेका थिए। ‘जलवायु न्यायको प्रवर्द्धन गर्नुपर्छ र प्रविधि पहुँचलाई सजिलो र सस्तो बनाउनुपर्छ,’ मन्त्री ज्ञवालीको भनाइ थियो।
मन्त्री ज्ञवाली चीनका प्रधानमन्त्री ली क्वाङ र विश्व आर्थिक मञ्चका संस्थापक तथा कार्यकारी अध्यक्ष प्राध्यापक क्लाउस स्वाबले सम्बोधन गरेको उद्घाटन सत्रमा पनि उपस्थित भएका थिए।
मंगलबार साँझ आयोजित ‘भू–राजनीतिक परिवर्तन’ सत्रको छलफलमा पनि भाग लिएका थिए। उक्त सत्रको छलफलमा भू–राजनीतिक कठिनाई र अनिश्चितता बढीरहेको उल्लेख गर्दै मन्त्री ज्ञवालीले राष्ट्रहरूबीच वृहत्तर पारस्पारिक विश्वास र बुझाइको प्रवर्द्धनमा जोड दिएका थिए।
त्यस्तै उनले दिगो विश्व शान्तिको सुनिश्चितताका लागि गहिरो तहको सहकार्य र सहयोगपूर्ण पहलको आवश्यतमा पनि उनले जोड दिएका थिए।
विश्वले सामना गरिरहेको समस्याको दायरा व्यापक र यसको परिणाम धेरै गहिरो रहेको उल्लेख गर्दै मन्त्री ज्ञवालीले विश्व शान्ति, सदभाव र सहकार्य बढाउन सम्झौतामा आधारित सम्बन्ध नभई एक कानुन आधारित अन्तर्राष्ट्रिय व्यवस्था महत्वपूर्ण हुने बताए।
मञ्चको वार्षिक बैठकको साइडलाइनमा मन्त्री ज्ञवालीले विश्व आर्थिक मञ्चका अध्यक्ष बोर्ज ब्रान्डीसँग पनि भेटघाट गरेका थिए। उक्त भेटमा विशेषगरी अनुसन्धान र क्षमता निर्माणका क्षेत्रमा मञ्च र नेपालले सहकार्य गर्ने विषयमा छलफल भएको थियो।
मन्त्री ज्ञवालीको भ्रमण दलमा चीनका लागि नेपाली राजदूत लिलामणि पौडेल र परराष्ट्र मन्त्रालयका अधिकारीहरू छन्।
चीनमा रहँदा मन्त्री ज्ञवालीले राजनीतिक नेता र व्यापारीसँग पनि भेटघाट गर्नेछन्। चिनियाँ अधिकारीसँग उच्च तहको भेटघाटका लागि मन्त्री ज्ञवाली बुधबार डालिनबाट बेइजिङ प्रस्थान गर्ने छन्।
बैठकका लागि असार १५ गते चीन प्रस्थान गरेका उनी २० गते स्वदेश फर्किने छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
