भैरहवा– सिद्धार्थनगर नगरपालिकाले आह्वान गरेको पाँचौं नगरसभा नेपाली कांग्रेस र राप्रपाबाट निर्वाचित जनप्रतिनिधिले बहिष्कार गरेका छन्।
नगरपालिका प्रमुख तथा उपप्रमुख लगायतका जनप्रतिनिधिले प्रतिपक्षीका कुरै नसुनी एकलौटी रुपमा सभा अगाडि बढाएको भन्दै नगरसभा बहिष्कार गरेको उनीहरूले बताएका छन्।
पाँचौं नगरसभामा मंगलबार न्यायिक समितिको प्रतिवेदनमाथि छलफल गर्ने क्रममा आफूहरूलाई बोल्न नदिइएको भन्दै प्रतिपक्षका २८ जना सभासदले सभा बहिष्कार गरेको बताए।
नगरपालिका उपप्रमुख उमा काफ्लेको संयोजकत्कमा गठित न्यायिक समितिको प्रतिवेदन नै नदिई सभा सञ्चालन गर्न खोजिएकाले नगर सभा बहिष्कार गरिएको नगर सदस्य दीपक श्रेष्ठले जानकारी दिए।
नगरप्रमुख हरिप्रसाद अधिकारीले नगरसभामा न्यायिक समितिको प्रतिवेदन दिनै नमिल्ने बताएपछि आफूहरू सभा बहिष्कार गरेर हिँड्नु परेको बताए।
नगरपालिकाले असार १० गते नगरसभा आह्वान गरेको थियो।
१० गतेको नगरसभामा अर्थ विधेयक पेस गर्दा उक्त विधेयकमा रहेको बुदाँहरू नदिइ बहुमतका आधारमा पेलेरै अगाडि लैजान लागेपछि कांग्रेस र राप्रपाबाट निर्वाचित वडा अध्यक्ष तथा सदस्य सहितका जनप्रतिनिधिले विरोध जनाएपछि १६ गते सम्मका लागि अध्ययन विदा दिइएको थियो।
सिद्धार्थनगर नगरपालिकामा नेपाली कांग्रेसका तर्फबाट ५ वटा वडा अध्यक्ष सहित २५ जना र राप्रपाबाट ३ जना गरी २८ जनाले नगरसभा बहिस्कार गरेका हुन्।
नगरसभा बहिष्कार गरेका जनप्रतिनिधिहरूले नगरप्रमुख हरिप्रसाद अधिकारी सहितका जनप्रतिनिधिले जबरजस्ती रुपमा नगरसभामा विधेयकहरू पास गराएकाले आफूहरूले नगरसभा बहिष्कार गरेको बताए।
उनीहरूले निर्वाचित नगर सदस्यलाई बेवास्ता गर्दै विगतदेखि नै नगरपालिकाका काम कारबाही अगाडि बढाउने गरेको समेत बताए।
कांग्रेसबाट निर्वाचित वडा–६ का सदस्य श्रेष्ठले बहुमत सदस्यले बहुमतको दम्भमा नगरसभा सञ्चालन गर्ने गरेको बताए। श्रेष्ठले प्रतिपक्षको कुरै नसुन्ने, प्रतिवेदनहरू गुपचुप राखी सूचनाको मौलिक हकबाट समेत बञ्चित गराइएकोले आरोप लगाए।
उनले सभा सुरु भएको एक घण्टापछि सभामा भाग लिन आएका नगरप्रमुख अधिकारीले नगरपालिका भित्र चरम राजनीतिकरण गरेको आरोप समेत लगाए।
उनले भने, ‘नगर प्रमुख अधिकारीले वडा सदस्यको मानहानी हुने गरी पटक पटक एकलौटी रुपमा काम गर्दै आउनु भएको छ। यस पटक पनि हामीलाई एक्लाएर हाम्रो मानमर्दन हुने खालका काम गर्नुभयो।’
उनले वडा सदस्यमाथि हुँदै आएको मानमर्दन गर्ने काम रोक्न चेतावनी समेत दिए। नगर प्रमुख अधिकारीले जनताले दिएको मतको घोर अपमान गर्ने गरेको बताउँदै एमालेबाट निर्वाचित वडा अध्यक्ष र सदस्य बाहेकलाई पटक पटक विभेद गर्दै आएको बताए।
उनले नगरपालिकाले गर्ने अन्य काममा पनि आफू निकट बाहेकका व्यक्तिलाई बेवास्ता गर्दै अगाडि बढेको बताए।
राप्रपाबाट निर्वाचित वडा सदस्य नारायण उपाध्यायले सभामा नीति तथा कार्यक्रम पास गर्ने कुरा बहुमतको आधारमा भए पनि जनता र नगरका आवश्यकताका कुरा छुट हुन नहुने बताए।
न्यायिक समिति अधिकार सम्पन्न भइसकेको अवस्थामा त्यहीँभित्र मेलमिलाप केन्द्र राखेर अनावश्यक आर्थिक भार थुपार्ने काम समेत उचित नभएको उनले बताए।
वडा–३ की सदस्य रुपमाया पुनले नगरसभामा नगर प्रमुखले सदस्यहरुलाई वाइकट गरेको र त्यही प्रक्रिया दोहोर्याएकाले आफूहरू बाध्य भएर बहिष्कार गर्नुपरेको बताइन्।
वडा सदस्य सुबोध चुलाचनले गतवर्ष भैपरी आउने खर्च शीर्षकमा छुट्टयाइएको ७७ लाख ५० हजार रकमको खर्च विवरण समेत मेयरले उपलब्ध नगराएको र अहिले बढाएर १ करोड २५ लाख पुर्याइएको भन्दै आपत्ति जनाए।
त्यस्तै सिद्धार्थनगर–१ स्थित फरेनी बजार अगाडिको पार्किङ समेत टेण्डर मार्फत नदिइ नगर प्रमुखले न्यून रकममा तोक आदेशमा दिदाँ नगरपालिकाको आयमा नोक्सानी भइरहेको समेत उनले बताए।
वडा सदस्य नारायण प्रसाद उपाध्यायले नगरप्रमुख, उपप्रमुख, केहि वडा अध्यक्ष र कर्मचारीले समेत वडा सदस्यालाई बेवास्ता गर्दै आएको बताए।
नगर प्रमुख हरिप्रसाद अधिकारीले भने नियतबस बहिस्कार गरिएको दाबी गरे। नीति तथा कार्यक्रमहरू सबै उपलब्ध गराइएको र न्यायिक समितिको प्रतिवेदन उपलब्धिमूलक भएकाले सबैलाई बाँड्नुपर्ने जरुरी नठानेर नबाँडिएको बताए। ‘सहमती–असहमति सबै ठाँउमा हुन्छन्। तर, त्यसरी बहिष्कार गरेरै हिँड्नुपर्ने खालको बिषय नै थिएन,’ उनले भने।
बोर्ड बैठक तथा नगरपालिकाले गर्ने कार्यक्रम बहिष्कार गर्ने
प्रतिपक्षी नेपाली कांग्रेस र राप्रपाबाट निर्वाचित जनप्रतिनिधिहरूले सिद्धार्थनगरपालिकाले आयोजन गर्ने कार्यक्रम बहिष्कार गर्ने जनाएका छन्।
नगरसभा बहिष्कार गरेका २८ जना २८ जना जनप्रतिनिधिले संयुक्त रुपमा विज्ञप्ति जारी गर्दै नगरपालिकाले प्रतिपक्षको आवाज नसुन्दासम्म नगरपालिकाको बोर्ड बैठक लगायत कुनै पनि कार्यक्रममा सहभागी नहुने बताएका छन्।
उनीहरूले न्यायिक समितिको प्रतिवेदन पारदर्शी रुपमा छलफल गर्नका लागि प्रतिबेदन उपलब्ध गराउनु पर्ने र अन्य सरोकारका विषय समेत संशोधन गर्नुपर्ने माग गरेका छन्।
आफूहरूका मागलाई सम्बोधन नगरेसम्म नगरका कुनै पनि गतीविधिमा सहभागी नहुने र विरोध जारी राख्ने उनीहरूले बताएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
