काठमाडौं- प्रमुख प्रतिपक्ष दल नेपाली कांग्रेसका सांसदहरुले संघीय मामिला तथा सामान्य प्रशासन मन्त्रालय र कृषि तथा पशुपंक्षी विकास मन्त्रालयको खर्च कटौतिको प्रस्ताव पेस गरेका छन्।
नेपाली कांग्रेसका सांसद बद्रीप्रसाद पाण्डेले मंगलबार बसेको राष्ट्रियसभाको बैठकमा संघीय मामिला तथा सामान्य प्रशासन मन्त्रालयअन्तर्गत विविध शीर्षकको खर्च कटौति गरेर १ सय रुपैयाँ कायम गर्न माग गर्दै खर्च कटौतिको प्रस्ताव पेस गरेका हुन्।
त्यसैगरी, कांग्रेसकै अर्की सांसद मुक्ताकुमारी यादवले कृषि तथा पशुपंक्षी विकास मन्त्रालयको कृषकलाई दिने अनुदानको रकम कम भएको उल्लेख गर्दै कटौति गरेर १ रुपैयाँ कायम गर्न माग गर्दै खर्च कटौतिको प्रस्ताव पेस गरिन्। सांसद पाण्डेले संघीय मामिला तथा सामान्य प्रशासन मन्त्रालयको विविध शिर्षकमा मात्रै १ अर्ब ६४ करोड ८४ बजेट विनियोजन गरेकोमा आपत्ति जनाउँदै त्यसलाई दुरुपयोग हुन नदिन खर्च कटौतिको प्रस्ताव पेस गरिएको स्पष्ट पारिन्।
उनले संघीय मामिला तथा सामान्य प्रशासन मन्त्रालयले संघीयता अनुकूल काम नगरेको, कर्मचारी समायोजनको कामको समेत उचित व्यवस्थापन गर्न नसकेको तर विविध शिर्षकमा पनि अत्याधिक बजेटको व्यवस्था गरेर मुलुकको अर्थतन्त्रमाथिकै बदनियत राखेको उल्लेख गर्दै आपत्ति जनाइन्।
सांसद यादवले ५ वर्षमा दोब्बर कृषिमा उत्पादन गर्ने लक्ष्य लिएको सरकारले बजेटमा कृषि क्षेत्रको विकासका लागि ३ प्रतिशत पनि बजेट विनियोजन नगरिएको तथा किसानहरुको अनुदानका लागि उचित बजेट दिन नसकेकाले आफूले सो मन्त्रालयको बजेट १ रुपैयाँ कायम गर्न माग गर्दै खर्च कटौतिको प्रस्ताव पेस गर्नुपरेको स्पष्ट पारिन्।
किसानका लागि आवश्यक सेवा, सुविधा दिनुपर्ने सरकारले त्यसका लागि आवश्यक बजेटको व्यवस्था गर्न नसकेकोमा सांसद यादवको आपत्ति छ। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
