काठमाडौं- प्रतिनिधिसभाका सभामुख कृष्णबहादुर महराले सांसदका लागि खरिद गरिने भनिएका ल्यापटप संसदीय प्रयोजनका लागि ल्याइन लागिएको बताएका छन्। सांसदलाई घरमा लैजान नभई संसद्मा रहँदा प्रयोग गर्न सकिनेगरी ल्यापटप खरिद गर्न लागिएको स्पष्ट पारे।
'ल्यापटप सांसदलाई घरमा लैजान दिइने होइन, यो त विशुद्ध संसद्मा संसदीय प्रयोजनका लागि प्रयोग हुनेछ,' महराले भने, 'संसद्मै रहँदा कापी र कागजमा लेख्नुभन्दा सांसदहरुले ल्यापटप प्रयोग गरी छिटो र छरितो ढंगबाट संसदीय काम गरुन् भन्ने हाम्रो ध्येय हो।'
उनले संसदलाई 'पेपरलेस' बनाउने उद्देश्यले यो योजना अघि बढाइएको जानकारी दिए। 'सरकारी कार्यालयहरुलाई पेपरलेस् वा डिजिटलाइजेसन गर्ने नीतिअनरुप संसद्मा पनि सोही अनुसारको व्यवस्थापन गर्न खोजिएको हो,' सांसदलाई ल्यापटप बाँड्न लागिएको भन्ने विषयप्रति असहमति राख्दै महराले भने, 'सांसदले संसद्मा रहँदा आफ्ना काम गर्छन्। सो काम भ्याइएपछि मन्त्रिपरिषद्मा जस्तै सबै ल्यापटपहरु संसद्कै मातहतमा रहन्छन्। सांसदको काम छिटोछरितो बनोस् भन्ने हाम्रो सोचलाई तोडमोड गरी बाहिर ल्याइयो।'
सांसदहरुको भिडियो प्रोफाइल सार्वजनिक कार्यक्रममा बोल्दै सभामुख महराले संसद्मा आफ्ना भनाइ राख्दा तथा नीतिनिर्माणको काममा तत्काल इन्टरनेटको प्रयोग गरी सांसदहरुले आवश्यक कदम चाल्नका लागि यो कार्य सहयोगी हुने विश्वास व्यक्त गरे।
यसअघि सरकारले चालू आार्थिक वर्षको विकास खर्च कटाएर प्रतिसांसद एक लाख बढी पर्ने ल्यापटप खरिद गर्ने निर्णय गरेको थियो। सांसदलाई ल्यापटप किन्न विकास खर्चको ३ करोड ३४ लाख रुपैयाँ रकमान्तर गरिएको जनाइएको छ।
संघीय संसद्का ३ सय ३४ सांसदलाई सरकारले रकमान्तर गरी ल्यापटप किन्ने प्रक्रिया अघि बढाएको छ। संघीय संसद्लाई ‘पेपर लेस’ गराउने भन्दै सरकारले संघीय संसद्को प्रतिनिधिसभाका २ सय ७५ र राष्ट्रियसभाका ५९ सांसदलाई ल्यापटप दिने प्रकृया अघि बढेको छ।
सांसदको भिडियो प्रोफाइल तयार
यसैबीच संघीय संसद् सचिवालयले संसद्लाई डिजिटलाइजेसन गर्ने भन्दै सांसदको भिडियो प्रोफाइल तयार गरेको छ। ६१औं संसद् दिवसको अवसरमा सिंहदरबारस्थित कृषि सहकारी तथा प्राकृतिक स्रोत समितिको सभाहलमा आयोजित कार्यक्रममा संसद सचिवालयले तयार पारेको भिडियो प्रोफाइल सार्वजनिक गरिएको हो।
आज प्रधानमन्त्री केपी शर्मा ओली, प्रमुख प्रतिपक्षी दल नेपाली कांग्रेसका नेता शेरबहादुर देउवा, प्रतिनिधिसभाका सभामुख, उपसभामुख र राष्ट्रियसभाका अध्यक्ष र उपध्यक्षको भिडियो प्रोफाइल सार्वजनिक गरिएको छ।
पहिलो चरणमा ३ सय ३१ सांसदको भिडियो प्रोफाइल तयार गरिएको छ। भिडियो प्रोफाइलमा सांसदको संक्षिप्त जीवनी तथा राजनीतिक जीवन समेटिने बताइएको छ।
सांसदका भिडियो प्रोफाइल संसद्को वेबसाइट तथा सामाजिक सञ्जाल युट्युबमा राखिने सचिवालयले जनाएको छ। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
