भक्तपुर– हनुमानघाटस्थित त्रिवेणीघाटमा मंगलबारदेखि एक महिने माधवनारायण ब्रत मेला सुरु भएको छ।
हरेक वर्ष पाैस शुक्ल पूर्णिमादेखि माघ शुक्ल पूर्णिमासम्म लाग्ने मेलामा मंगलबार बिहान त्रिवेणीघाटमा स्नान गरी, सूर्यलाई अर्घ्य दिएर माधवनारायणको पूजा गरेपछि व्रत सुरु भएको हो।
श्रीस्वस्थानी वाचन सोमबारदेखि सुरु भए पनि २ दिन पूर्णिमा भएकाले ब्रत मंगलबारदेखि सुरु भएको माधवनारायण व्रत व्यवस्थापन समितिका सदस्य एवं पुजारी गोपाल शर्माले जानकारी दिए। मेला भक्तपुरमा नेपाल संवतको आठौँ शताब्दीदेखि सुरु भएको मानिन्छ।
साँखुको सालीनदी जस्तै हनुमानघाटको त्रिवेणीधाममा लाग्ने माधवनारायण मेलामा यस वर्ष ३ महिला र १२ पुरुष व्रत बसेका छन्। भुकम्पले संरचना भत्केकाले बस्ने ठाउँ नहुँदा यस वर्ष वर्तालुको संख्यामा कमी आएको छ शर्माले बताए। व्रत बस्नेमा ६ देखि ७५ वर्षका सम्म मानिस छन्।
व्रत सुरु हुनुअघिल्लो दिनदेखि निराहार बस्नुपर्ने, बिहानै त्रिवेणीमा स्नान गरी चोखो जल तथा पूजा सामग्रीले पूजा गर्नुपर्ने, शंखजल ग्रहण गरी मन्त्रोच्चारण गर्नुपर्ने, शंखजल ग्रहण गरेपछि कसैलाई छुन नहुने तथा जुत्ता लगाउन नहुने परम्परा रहेको पुजारी शर्माले जानकारी दिए।
नेपाल संवत् ७२२ मा रणजीत मल्ल आफैँले व्रतको व्यवस्थापन गरेको शिलालेखमा उल्लेख छ। यहाँस्थित त्रिवेणीघाटमा डुबी एकचित्त भएर जे माग्यो त्यो पूरा हुने जनविश्वास छ।
वर्तालुले खाली खुट्टा तीलमाधवबाट तलेजु भवानीसम्म, सप्तमीमा पनौती गई त्रिवेणीमा बसेर स्नानपछि इन्द्रेश्वर महादेवको दर्शन गरी अष्टमीमा फर्कने, दशमीमा पशुपति गएर स्नान गरी जल चढाएर जयवागेश्वरी ताम्रेश्वर महादेवसम्म कलशयात्रा गर्ने, द्वादशीमा चाँगुनारायण शंखदहमा स्नान गरी कलश लिएर चाँगुनारायणको दर्शन गर्ने र माघ शुक्ल पूर्णिमाका दिन नगर परिक्रमा गरेर भूपतिन्द्र मल्लको मूर्तिमा इन्द्रकलश चढाएर एकमहिने व्रत समापन गर्ने परम्परा रहेको माधवनारायणका अर्का पुजारी राजु राजोपाध्यायले बताए।
भूकम्पले भत्काएको यहाँको भौतिक संरचना पुनःनिर्माण सुरु गरिएकाले यस वर्ष बस्ने ठाउँको अभावका कारण राति बस्ने व्यवस्था छैन। वर्तालुले माघ शुक्ल पूर्णिमाको दिन बिहान त्रिवेणीमा आएर स्नान गरी माधवनारायणको पूजा गरेर होम आहुति गरेपछि भक्तपुर नगरका विभिन्न देवालयको परिक्रमा गरेर भूपतीन्द्र मल्लको मूर्तिमा इन्द्रकलश चढाएर मेला समापन गर्ने परम्परा छ। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
