धनगढी- सुदूरपश्चिम प्रदेशसभामा प्रतिपक्षी दलहरूले प्रदेशको गौरवका आयोजनाहरू सार्वजनिक गरेका छन्।
प्रदेशसभामा असार १ गते प्रस्तुत भएको बजेट असन्तुलित, वितरणमुखी, आर्थिक सुशासन ऐनविपरीत तथा अस्पष्ट भएको भन्दै निरन्तर प्रदेशसभा बैठक अवरुद्ध गर्दै आएका नेपाली कांग्रेस र राष्ट्रिय जनता पार्टी (राजपा) ले शनिबार संयुक्तरुपमा प्रदेश गौरवका केही मुख्य आयोजनाहरू प्रस्तुत गरे।
प्रतिपक्षी दलहरूले कम्तीमा पाँच करोडदेखि एक अर्ब रुपैयाँ बजेटका प्रदेशका गौरवका आयोजना सञ्चालन गर्न प्रदेश सरकारलाई सुझाव दिएका छन्। कांग्रेस र राजपाले संयुक्तरुपमा प्रस्तुत गरेका प्रदेश गौरवका आयोजनाहरूमा महाकाली कोरिडोर, धनगढी–खुटिया–दीपायल द्रुतमार्ग, कर्णाली कोरिडोर, धनगढी गेटा क्षेत्रीय विमानस्थललाई क्षेत्रीय अन्तर्राष्ट्रिय विमानस्थलमा रुपान्तरण, प्रदेशभित्र हाल बन्द अवस्थामा रहेका विमानस्थलहरूको पुनः सञ्चालन, पश्चिम सेती जलविद्युत परियोजनासहित १६ वटा आयोजना समावेश गरिएका छन्।
प्रमुख प्रतिपक्षी दलहरूले गेटा विमानस्थललाई क्षेत्रीय अन्तर्राष्ट्रिय विमानस्थल बनाउन एक अर्ब रुपैया विनियोजन गर्नुपर्ने सुझाव दिएका छन्। त्यस्तै, कञ्चनपुर, टीकापुर, कमलबजारलगायतका विमानस्थल कालोपत्रे र डडेलधुरा विमानस्थलको डिपिआरका लागि एक करोड रुपैयाँ विनियोजन गर्न सुझाव दिएका छन्।
पत्रकार सम्मेलनमा प्रदेशसभाका प्रमुख प्रतिपक्षी नेता रणबहादुर रावलले प्रदेश सरकारको बजेट सुदूरपश्चिमको गरिबी तथा पछौटेपन हटाउनेतर्फ भन्दा पनि भ्रष्टाचारलाई संस्थागत गर्नमा बढी लक्षित भएको आरोप लगाए। उनले भने, 'सरकारले ल्याएको यो बजेट आफ्ना कार्यकर्ता पोस्ने र भ्रष्टाचारलाई बढावा दिने मनसायका साथ आएको छ।'
नेता रावलले प्रदेश सरकारले अर्थ विविध शिर्षकमा साढे ६ अर्ब रुपैयाँ बढी बजेट छुट्याउनुका पछाडि आफ्नो पार्टीका कार्यकर्ता तथा आसेपासेलाई पोस्ने उद्देश्य लुकेको दाबी गरे।
कार्यक्रममा राजपाका सांसद कृष्णबहादुर चौधरीले केही हजार रुपैयाँका सय बढी योजना ल्याउनु लाजलाग्दो विषय भएको जिकिर गरे। ‘प्रदेश सरकारको बजेटमा एक हजारदेखि २० हजारसम्मका ३० योजना छन् भने २१ हजारदेखि ५० हजार रुपैयाँ सम्मका एक सय बढी योजना छन्। यो त लाजमर्दो कुरा हो,’ चौधरीले भने, 'वडा तथा टोल र स्थानीय तहले ल्याउने खालका योजना प्रदेश सरकारले ल्याएको छ।'
सांसद चौधरीले बजेट विनियोजन सन्तुलित ढंगले नभएर स्वेच्छाचारी र विभेदकारी ढंगले गरिएको बताए।
कांग्रेसका अर्का सांसद भरतबहादुर खड्काले आफूहरूका योजना बजेटमा नसमेटिएका कारण संसद अवरुद्ध नगरिएको स्पष्ट पारे। सांसद खड्काले भने, 'प्रदेशको उन्नति र प्रगतिमा बजेट केन्द्रित हुनुपर्छ भनेर हामीले संसद अवरोध गरेका हौं।'
यथास्थितिमा संसद चल्दैन : प्रतिपक्षी
लगातार ४ पटक स्थगित भएको सुदूरपश्चिम प्रदेशसभाको बैठक आज (आइतबार) दिउँसो ३ बजेका लागि तोकिएको छ। तर, प्रतिपक्षी दलहरूले संसद नचल्ने दोहोर्याएका छन्।
राष्ट्रिय जनता पार्टीका नेता चौधरीले भने, ‘सरकारले हाम्रो कुरालाई हलुका ढंगले लिएको छ। यथास्थितिमा प्रदेशसभाको बैठक चल्न दिँदैनौं।’ उनले प्रदेश सरकारले ३ पटक आफूहरूसँग ‘वार्ताका नाममा वार्ता’झैं हलुका ढंगले छलफल गरेको बताए।
कांग्रेस प्रदेश संसदीय दलका नेता रावलले दुई तिहाइको दम्भले पेलेरै जाने मनस्थितिमा सरकार गयो भने परिस्थिती नराम्रो हुने चेतावनी दिए। 'सरकारले वार्ता र छलफल नगरी संसद बैठक चलाउन खोजे हामी पनि कडा रणनीति बनाएरै अघि बढ्छौं।'
प्रदेश सरकारले ल्याएको रातो किताबलाई खाली किताब भन्दै जलाएका प्रतिपक्षी दलहरूको अवरोधका कारण यसअघि ४ पटकसम्म संसद अवरुद्ध भइसकेको छ भने आइतबारको बैठक पनि अनिश्चित बनेको छ।
आयोजनाहरुको सूचीः
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
