काठमाडौं– वाम गठबन्धनका नेताहरुले सात दिनभित्र प्रतिनिधिसभाको समानुपातिकतर्फ सांसदको सिट संख्या तोक्न निर्वाचन आयोगलाई आग्रह गरेका छन्।
प्रमुख आयुक्त आयोधीप्रसाद यादव र अन्य आयुक्तहरुसँगको छलफलपछि बोल्दै नेकपा एमालेका उपाध्यक्ष भीम रावलले निर्वाचनबाट नयाँ सरकार गठनका लागि जनादेश आएको र त्यसलाई अवरोध गर्न नमिल्ने भएकाले सिट संख्या चाँडै तोक्न आग्रह गरिएको बताए।
‘संविधान र कानुनले प्रतिनिधिसभाको समानुपातिकतर्फ मतपरिणाम सार्वजनिक गर्न नरोक्नेतर्फ आयोगका पदाधिकारीलाई ध्यानाकर्षण गराएका छौ’, रावलले भने, ‘जनताबाट वाम सरकार गठनको अभिमत प्राप्त भएकाले त्यसमा आयोग बाधक हुन मिल्दैन।’
सरकारले प्रदेश प्रमुख, प्रदेशका अस्थायी राजधानी तोक्न दलहरुसँग छलफल नगरेको र राष्ट्रियसभा निर्वाचनको मिति समेत नतोकेकाले आयोगले दबाव दिनुपर्ने सुझाव समेत दिएको रावलले बताए।
आयोगका पदाधिकारीले वाम गठबन्धनका नेताहरुसँगको भेटमा संविधानले राष्ट्रियसभा गठन नभई संसद् पूर्ण नहुने स्पष्ट व्यवस्था गरेकाले समानुपातिकतर्फ मतपरिणाम रोकिएको जानकारी गराएका थिए। तर, गठवन्धनका नेताहरुले भने संविधानमा सरकार विस्तार गर्न प्रतिनिधिसभा पूर्ण भए मात्र पुग्ने व्यवस्था रहेको जिकिर गरेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
