काठमाडाैं- नेपाली कांग्रेसका सांसद प्रदीप गिरिले अर्थमन्त्री डा युवराज खतिवडालाई अतिरिक्त करभार लगाएर पुस्तक पढ्ने प्रवृतिलाई निरुत्साहित नगर्न आग्रह गरेका छन्।
प्रतिनिधिसभाको बैठकमा बोल्दै सांसद गिरिले काठमाडौं शहरमा भएका पुस्तक पसल ७५ प्रतिशत बन्द भइसकेकाले पुस्तकमाथि करभार थप्ने कुरालाई हरेक हालतमा समाप्त गर्न प्रधानमन्त्री केपी शर्मा ओली र अर्थमन्त्री खतिवडासँग आग्रह गरेका हुन्। गिरिले न्युरोडमा भएका पुस्तक पसलको ठाउँ अहिले सुन व्यवसाय र रक्सीको पसलले लिएको हुँदा अतिरिक्त करभार लगाएर पुस्तक पढ्ने प्रवृतिलाई निरुत्साहित नगर्न अर्थमन्त्री खतिवडासमक्ष आग्रह गरे।
संसद्मा सांसद गिरिले राखेको धारणाको सम्पादित अंश:
सभामुख महोदय,
धेरै वर्षअघिको कुरा हो।
त्यतिबेला सभामुखलगायत धेरे कमरेडहरु अत्यन्त कठिन युद्धमा संलग्न हुनुहुन्थ्यो। त्यस युद्धका प्रति हाम्रो पनि सहानुभूति थियो। त्यो मैले दोहोर्याइ रहनु नपर्ला। त्यो ताका तत्कालीन अर्थमन्त्री डा रामशरण महतले पुस्तकका उपर कर लगाएका थिए। पुस्तकको आयातका उपर। त्यतिबेला यस समय सत्तामा रहेका अधिकांश साथीहरु जङ्गलमा भएकाले ध्यान नदिनु भएर हो कि? यद्यपि जङ्गलमा पढ्ने परम्परा थियो। त्यो बेलाका रचनाहरुबाट थाहा पाइन्छ।
पुस्तकका उपर कर लाग्ने व्यवस्थाप्रति तत्कालीन संसद्मा चर्को विरोध गरेको हुँदा, स्वयम् मैले आफ्नै अर्थमन्त्रीका उपर प्रहार गरेको हुँदा बडो उदारतापूर्वक पुस्तकलाई करभारबाट मुक्त गरिएको थियो। यत्रो वर्षको अन्तरालपछि, यत्रो ठूलो क्रान्ति भइसकेपछि पुस्तकका शौखिनहरु सत्तामा भएपछि स्वयम् विद्वान प्रधानमन्त्रीका पालामा आहिले आएर पुस्तक करमुक्त रहने प्रणालीलाई विभिन्न बाहनामा, विभिन्न नाममा विभिन्न कारणले करको दायरामा ल्याइँदैछ। नेपालमा एउटा उखान छ- ‘कुरो र कुलोलाई जता लगे पनि हुन्छ।’
किन कर लगाउने भन्दा दुई/तीन वटा तर्क मैले सुनेको छु, नसुनेको होइन। तर, मुलतः पुस्तक भन्ने कुरा र पुस्तकको उपलब्धि भन्ने कुरा यसै पनि उपभोक्तावादी समाजमा हराउँदै गएको छ। तथाकथित सञ्चारक्रान्तिले ल्याएका सस्ता मनोरञ्जनमा हामी अलमल्ली रहेका छौं। यहाँ पुराना साथीहरुलाई थाहा होला, मैले त बेलाबखत पुस्तक व्यवसायीलाई भन्दै आएको छु- काठमाडौं सहरमा भएका पुस्तक पसल ७५ प्रतिशत बन्द भएका छन्। न्यूरोडमा गएर हेर्नुहोस्।
ती पुस्तक पसलको ठाउँ सुनको व्यवसायले लिएको छ। गएर हेर्नुभए हुन्छ तपाईंले। रक्सीको पसलले लिएको छ। जुन पुस्तक पसल चलाइरहेका छन्, चाहे रत्न पुस्तक भण्डार होस्, चाहे मण्डला बुक्स होस्, म गएर जहिले पनि सोध्छु- ‘हैन तपाईंहरुले कसरी पसल चलाउनु भएको छ? कसरी खान पुग्छ?’
अब उनीहरुलाई अतिरिक्त करभार लगाएर पुस्तक पढ्ने प्रवृतिलाई निरुत्साहित नगर्नुहोस्। म अर्थमन्त्री ज्यूसँग प्रार्थना गर्न चाहन्छु। उहाँ स्वयम् एक विद्वान व्यक्ति हुनुहुन्छ। त्यसको अत्यन्त ठूलो महत्व छ।
अघि पूर्ववक्ता नेपाली कांग्रेसका छायाँमन्त्रीले करलाई नीतिका रुपमा पनि हेर्नुहोस् है भन्नु भएको थियो । मेरो भनाइ त्यसको पनि एउटा अंग हो। कर सिर्फ पैसा उठाउने सरकारलाई खर्च गर्ने साधन ल्याउने मात्र होइन। सरकारका केही निश्चित नीति पनि हुन्छन्। सरकारको पुस्तक विरोधी नीति होइन होला। अभिव्यक्ति स्वतन्त्रता विरोधको प्रतिक होइन होला।
यसैले म सम्मानीय प्रधानमन्त्री, अर्थमन्त्रीलाई निवेदन गर्न चाहन्छु- यो पुस्तकमाथि करभार थप्ने कुरालाई रहेक हालतमा समाप्त गरियोस्। यसका प्रति सम्माननीय सभामुखले पनि आफ्नो सहमति जताइदिनुभयो भने म आफूलाई भाग्यमानी सम्झनेछु।
धन्यवाद।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
