राजविराज– स्थानीय तह सञ्चालन सम्बन्धी स्पष्ट कानुनको अभावमा नयाँ नगरपालिका र गाउँपालिकाको गतिविधि अन्यौलपूर्ण अवस्थामा छ। कतिपय स्थानीय तह माथिल्लो निकायको निर्देशनको प्रतीक्षामा छन् भने कतिपय स्थानीय तह भौतिक पूर्वाधार तथा विकास निर्माणको योजना बनाउनमा अल्मलिएका छन्।
यिनै स्थानीय तहमध्ये सप्तरीको सप्तकोशी नगरपालिका भने नगरको विकासका लागि ५ वर्षे ‘मास्टर प्लान’ बनाउन कस्सिएको छ। ९ नगरपालिका र ९ गाउँपालिका रहेको सप्तरीमा यो नगरपालिका पुराना नगरपालिकाको तुलनामा भौतिक संरचना र विकासका दृष्टिले पछि छ । तर, यस नगरपालिकालाई अन्य विकासोन्मुख नगरपालिकाको दाँजोमा कसरी पुर्याउन सकिन्छ भन्ने विषयमा हरसम्भव प्रयास भइरहेको मेयर उत्तमकुमार गौतम बताउँछन्।
‘नगरको एकीकृत सहरी विकासका लागि ५ वर्षे मास्टर प्लान र वार्षिक योजना एकै पटक तयार गर्दैछौं,’ मेयर गौतमले भने, ‘हामीसँग समस्या र अवसर दुवै छन्। अवसरलाई उपयोग गर्दै समस्यालाई घटाउने र विकासको गतिलाई तिव्रता दिने विषयमा हाम्रो प्रयास जारी छ।’
नगरको विकासका लागि तयार योजनाका विषयमा छलफल गर्दै मेयर, उपमेयर, पदाधिकारी र कर्मचारी।
पुस मसान्तभित्रै सम्पन्न हुन लागेको नगरपरिषद मार्फत वार्षिक योजना र ५ वर्षे मास्टर प्लान एकै पटक अनुमोदन गरी काम गर्ने योजना सुनाएका गौतमले आफ्नो कार्यकालभित्रै सप्तकोशीलाई सप्तरीका अन्य नगरपालिका र गाउँपालिकाको तुलनामा अगाडि पुर्याउने दृढता व्यक्त गरे।
नगरपालिकाहरुको भौतिक पूर्वाधार, सामाजिक, आर्थिक अवस्थाहरुको विस्तृत अध्ययन, आम्दानिका श्रोतहरुको पहिचान तथा प्राविधिक दृष्टिकोणले समेत अध्ययन/अनुसन्धान गरी योजनालाई पूर्णता दिइने जानकारी दिँदै गौतमले भने, ‘सरोकारवाला कार्यालयहरुसँग पनि समन्वय गरिरहेका छौं, उनीहरुको सुझावलाई पनि मार्गदर्शनका रुपमा लिएर काम गरिरहेका छौं।’
१९८२ सालमा तत्कालीन राणा प्रधानमन्त्री चन्द्र समशेरले निर्माण गरेको मुलुककै पहिलो चन्द्रनहर तथा त्यसको रेखदेखका लागि बनाएका ऐतिहासिक तथा प्राचीन संरचनाको जगेर्ना गर्ने, चुरे क्षेत्र, सामुदायिक वन, धार्मिक स्थल लगायतको संरक्षण गरी पर्यटकीय क्षेत्रका रुपमा विकास गर्ने, नगरको मुख्य बजारका रुपमा रहेको फत्तेपुर हटियामा व्यापारीक भवन निर्माण गर्ने, शहीद पार्क र चिडिया घर निर्माण गर्ने, सुख्खा क्षेत्रमा भूमिगत सिँचाइको व्यवस्था मिलाउने, रिङरोडका लागि पहल गर्ने लगायतका दर्जनौं योजना मास्टर प्लानमा समेटिने गौतमले जानकारी दिए।
१९८२ सालमा मा निर्माण गरिएको मुलुककै पहिलो चन्द्रनहरको उद्गमस्थल त्रियुगा नदीमा रहेको हेडवर्क्स
विकास र प्रगतिका प्रसस्त सम्भावना हुँदाहुँदै पनि बाढी र कटान सप्तकोशी नगरपालिको सबैभन्दा ठूलो समस्या रहेको उनले बताए। उनले त्रियुगा, अमाहा, गंगाजली सत्रापत्रा (जुटपानी) लगायत खोलालाई नियन्त्रण गर्नेतर्फ प्रयास भइरहेको बताए।
फत्तेपुर, ओद्राहा र कमलपुर गाविसलाई मिलाएर २०७२ मंसिर १५ मा सप्तकोशी नगरपालिका घोषणा भएको थियो। २०६८ सालको जनगणना अनुसार २२ हजार जनसंख्या रहेको यो नगरपालिकाले कुल ६५ वर्गकिलोमिटर क्षेत्रफल ओगटेको छ।
चन्द्रनहर निर्माण हुँदा राणा प्रधानमन्त्री चन्द्र शमशेरको बसोबासका लागि निर्माण गरिएको फत्तेपुरस्थित चन्द्र गेस्ट हाउस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1772726043.png)
-1764146706.png)
