काठमाडौं- शनिबार बिहान पशुपतिनाथ दर्शन गर्न गएका बबरमहलका महेश अधिकारी भन्दै थिए– 'मैले त जुत्ता-चप्पल खोल्ने ठाउँदेखि नै सफा भएको महसुस गरेँ, माथि मूल मन्दिर परिसरको त झन कुरै भएन, चारैतर्फका मूर्ति र बसाहा झलझली बलेका र उज्याला छन्– कतै बोल्लान् झैं गरी।'
अधिकारीले भने झैं यतिखेर पशुपतिनाथ क्षेत्रको मुहार फेरिएको छ। बाग्मती किनारदेखि माथि मन्दिर र कैलाश चौरमुनिको भूभागका साथै साना मठ र संरचना सरसफाइले धपक्क बलेको छ।
मूल मन्दिरको उत्तरपूर्वमा रहेको सत्तलको सिँढीमा जाडोको पर्वाह नगरी ढुंगाको छपनी घोट्दै गरेका सफाइ मजदुर कुशल अधिकारी पशुपतिनाथको सफाइ कार्य देखेर सन्तुष्ट छन्।
'जीवनमा यस्तो खुशीको अनुभव कहिल्यै भएको थिएन, अझ दर्शनार्थीले गरेको मायाको त झन् कुरै नगरौं', उनले खुसी साटे।
उनले केही समयअघि रातको २ बजे एक जना ज्येष्ठ नागरिकले थर्मसमा कफी ल्याएर ख्वाएको सुनाए।
पशुपतिनाथ क्षेत्रमा करिब तीन महिनादेखि सफाइको काम जारी छ। पशुपति क्षेत्रमा जारी सफाइबारे पशुपति क्षेत्र विकास कोषका सदस्य-सचिव डा प्रदीप ढकाल भन्छन्– 'यो सरसफाइ खाली कुचो लगाउने र धूलो बढारेर छोड्ने मात्र होइन, अब सधैंका लागि हामी निरन्तरता दिने योजना बनाएका छौं।'
सदस्य-सचिव ढकालले भावी दिनमा विकास कोषमा आफू रहे पनि नरहे पनि एउटा प्रणालीको विकास गर्ने बताए।
सरसफाइमा विशेषज्ञता हासिल गरेको र अस्ट्रेलियामा मुख्यालय रहेको कम्पनी खेम्स क्लिनिङले यो सफाइको काम करिब तीन महिनायता गरिरहेको छ। अहिलेसम्म उसले स्वयंसेवीका रुपमा पशुपति क्षेत्रको सफाइ गरिरहेको छ। यहाँ सो कम्पनीका ३७ जना सफाइ मजदुरले चौबीसै घन्टा काम गर्छन्।
हालका लागि एक वर्षका लागि भनेर यो सफाइको काम सुरु गरिएको हो। उक्त कम्पनीले यसअघि त्रिभुवन अन्तरराष्ट्रिय विमानस्थलको सफाइ गरेको थियो। विमानस्थलको सफाइको चर्चा सुनेपछि आफैंले उक्त कम्पनीका खेम शर्मासँग पशुपतिनाथ क्षेत्रको सफाइका लागि अनुरोध गरेको र कम्पनीले अहिलेसम्म सफाइ कार्य जारी राखेको सदस्य-सचिव डा ढकाल बताउँछन्।
खेम्स क्लिनिङका अध्यक्ष खेम शर्माले आफूले विमानस्थलमा प्राप्त गरेको सफलता र सबै नेपालीको मायाले पशुपति क्षेत्रमा सफाइका लागि प्रेरणा मिलेको बताए।
अहिलेसम्म स्वयंसेवी रुपमा सरसफाइको काम गरिरहेका अध्यक्ष शर्मा भन्छन्, 'बाग्मती सफाइ अभियन्तासँग मिलेर मैले यो कार्यलाई निरन्तरता दिन सकेको छु।'
उहाँको यो कार्य देखेर काठमाडौंको एक बैंकले वर्ष दिनका लागि केही मजदुरको ज्यालाका लागि सहयोग गर्ने वाचा गरेको छ र केही दिनपछि त्यस सहयोग सम्झौतामा हस्ताक्षर पनि हुने भएको छ।
उनले यो सफाइ अभियानका क्रममा बाग्मती सफाइका अभियन्ताका साथै कोष र सबै भक्तजनबाट यति धेरै माया प्राप्त हुनुलाई जीवनको ठूलो सफलताका रुपमा हेरेको बताए।
बाग्मती सफाइका एकजना अभियन्ता माला खरेल भन्छिन्, 'अहिले पशुपतिनाथ क्षेत्रभित्र निकै सफा भएको छ। यसलाई आगामी दिनमा निरन्तरता दिनुपर्छ भनेर हामी लागिपरेका छौं।' रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
