काठमाडौं– इम्बोस्ड नम्बरप्लेटको जडानलाई प्रभावकारी बनाउन यातायात व्यवस्था विभागले बाध्यकारी नियम बनाएको छ। इम्बोस्ड नम्बरप्लेट नराखे सवारी साधनको नवीकरण नै नगर्ने विभागको जनाएको छ।
विभागले दुई साताअघि समयसीमा नै तोकेर गाडिहरुमा इम्बोस्ड नम्बर प्लेट जडान सूचना निकालेको थियो । समयसीमाभित्र नम्बरप्लेट जडान नगरे सावरी साधानको नवीकरण नगरिने यातायात व्यवस्था विभागका महानिर्देशक रुपनारायण भट्टराईले बताए।
विभागले गत मंसिर २९ गते निकालेको सूचनामा बाग्मती अञ्चलमा दर्ता भएका १२ लटसम्मका सबै निजी तथा सरकारी सवारी साधनले चैतभित्र इम्बोस्ड नम्बरप्लेट जडान गर्न समयसीमा दिइएको छ। त्यस्तै असारभित्र अञ्चल प्रहरी कार्यालय बाग्मतीमा दर्ता भएका सबै निजी गाडिहरुले इम्बोस्ड नम्बरप्लेट जडान गर्नुपर्ने उल्लेख छ। ‘समयसीमाभित्र इम्बोस्ड नम्बरप्लेट जडान नगरेका सवारी साधनको नवीकरण नगर्न यातायात कार्यालयहरुलाई भनेका छौं,’ विभागका महानिर्देशक भट्टराईले भने।
इम्बोस्ड नम्बरप्लेटमा सर्वसाधरणको अनिच्छा देखिएपछि विभागले समयसीमा नै तोकेर यसलाई कार्यान्वायनमा लगेको हो। वेसभाइडमा अनलाइन फर्म भरेर यातायात व्यवस्था कार्यालय एकान्तकुनामा सवारी साधन लगेर दस्तुर तिरेपछि नम्बरप्लेट जडान गरिने विभागले जनाएको छ। अनलाइन फर्म फरेको करिब एक सातामा नम्बरप्लेट जडान हुने छ। निजी गाडिहरुका लागि भने दस्तुर ३२ सय रुपैयाँ तोकिएको छ। मोटरसाइकल र सार्वजनिक यातायातका लागि भने तत्काल बाध्यकारी बनाइएको छैन।
विभागले गत भदौदेखि नै इम्बोस्ड नम्बरप्लेट जडान सुरु गरेपनि विवादका कारण रोकिएको थियो। अञ्चलका आधारमा नम्बरप्लेट बनाएपछि विरोध भएको थियो। त्यसपछि विभागले प्रदेशको आधारमा नम्बरप्लेटको डिजाइन गरेको हो। नम्बरप्लेटमा अंग्रेजी अक्षर राखिएको र दस्तुर महंगो तोकिएको भन्दै इम्बोस्ड नम्बरप्लेटको जडानको विरोध हुँदै आएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
