– हरि बाँस्तोला/रासस
पोखरा- कास्कीको मादी गाउँपालिकामा सिक्लेस–कोरी केबुलकारको निर्माण प्रक्रिया सुरु हुने भएको छ। गाउँपालिकाको केन्द्र याङ्जाकोटमा आर्थिक वर्ष २०७६/७७ को नीति तथा कार्यक्रममा केबुलकार निर्माणलाई पालिकाको गौरवको आयोजनाका रुपमा लिइएको गाउँपालिकाका अध्यक्ष वेदबहादुर गुरुङले जानकारी दिए।
उनका अनुसार सिक्लेसको १ हजार ५ सय मिटरको उचाई भुलकुचाबाट सुरु भई ३ हजार ८ सय मिटर उचाईको अन्नपूर्ण बेसक्यामस्थित कुरीमा केबुलकार सञ्चालन हुनेछ। चन्द्रागिरि केबुलकार टिमको सक्रियतामा निर्माण गरिने सिक्लेस–कोरी केबुलकारअन्तर्गत समुद्री सतहबाट लगभग २ हजार ५ सय मिटरको उचाईमा चताखर्कामा १ सय २० बेड क्षमताको रिसोर्ट निर्माण गरिने बताइएको छ।
विस्तृत अध्ययन प्रतिवेदन (डिपिआर) एवं वातावरणीय प्रभाव मूल्याङ्कनको कार्य भइरहेको जानकारी दिँदै उनले यसको कूल लागत ६ अर्बभन्दा बढी लाग्ने अनुमान गरिएको छ। केबुलकारको १५ प्रतिशत सेयर स्थानीय बासिन्दालाई वितरण गरिने व्यवस्था मिलाइएको छ।
अन्नपूर्ण हिमालको उच्च बुकेनीफाँटमा नेपालको मध्यविन्दु स्तम्भ उद्यानसमेत निर्माण गरिने लक्ष्य राखिएको उक्त केबुलकार चन्द्रागिरि समूहले निर्माण गर्ने भएको हो। नीति तथा कार्यक्रममा केबुलकारसँगै पर्यटनलाई गाउँपालिकाको आर्थिक समृद्धिको महत्वपूर्ण आधारका रुपमा लिइएको उल्लेख गर्दै उनले पर्यटकीय गन्तव्य विकासका लागि भौतिक संरचना निर्माणमा जोड दिइएको बताए।
गाउँपालिकाअन्तर्गतका प्राकृतिक महत्वका स्थानहरुमध्ये होचो स्थानमा रहेको कपुचे हिमाल, कोरी, ठूलोलेक, क्होलासोँधर, दूधपोखरी, सवुपोखरी, कपुडाँडा, लम्तरीडाँडा, ताराहिलटप, नेपालको मध्यविन्दुलगायतका स्थानलाई पर्यटकीय गन्तव्यको रूपमा विकास गर्ने नीति तथा कार्यक्रममा उल्लेख छ।
अध्यक्ष गुरुङका अनुसार पालिकाको वडा नम्बर ६ मा तप्राङ्ग वन्यजन्तु उद्यान निर्माण गर्नका लागि गुरुयोजना तयार गरी सङ्घ र प्रदेश सरकारको समन्वयमा जङ्गल सफारीका लागि आवश्यक पूर्वाधार निर्माण गरिनेछ। अन्नपूर्ण राउण्ड सर्किटलाई पदयात्राको रूपमा विकास गर्नका लागि सिक्लेसदेखि मनाङको तिमाङसम्मको रुटमा आवश्यक पर्यटन पूर्वाधार निर्माण गरी यस क्षेत्रको प्रचारप्रसार एवं पर्यटन प्रवर्द्धन गरिने लक्ष्य नीति तथा कार्यक्रममा उल्लेख छ।
मठमन्दिर तथा गुम्बा, कोइवुजस्ता धार्मिक पर्यटकीय क्षेत्रहरुको संरक्षण संवर्द्धनमा विशेष जोड दिइने उल्लेख गर्दै उनले स्थानीय मौलिक संस्कृति, भाषा एवं भेषभुषालाई यहाँको पर्यटन र उत्पादनसँग जोडेर विकास गरिने स्पष्ट पारे। स्थानीय, भाषा, भेषभुषा, कलासंस्कृतिको संरक्षण गर्न गुरुङ जातिको तमु भाषाको पाठ्यक्रम तयार गर्ने नीति सम्भाव्यता अध्ययन सम्पन्न भई आगामी आर्थिक वर्षदेखि पुस्तक प्रकाशन प्रक्रिया सुरु गरिने भएको छ।
पर्यटकीय गन्तव्यहरुको प्रवर्द्धन गर्न गाउँपालिकास्तरीय पर्यटन गुरुयोजना निर्माण गर्नुका साथै पर्यटकीय पूर्वाधार निर्माणका लागि डिपिआर तयारी गर्ने एवं यस क्षेत्रको प्राकृतिक, ऐतिहासिक, धार्मिक, सांस्कृतिक पक्षहरुलाई समेटी डकुमेन्ट्री फिल्म निर्माण गरी पर्यटकीय सम्भावनाको प्रचारप्रसार, संरक्षण र प्रवर्द्धन गरिनेछ।
गाउँपालिकालाई पर्यटन हवको रूपमा स्थापित गर्न सामुदायिक घरबासहरुको प्रवर्द्धन र संवर्द्धनका साथै यस क्षेत्रको सांस्कृतिक मौलिकताको पहिचान र अतिथि देवो भवः मूलमन्त्रलाई अङ्गिकार गर्दै स्थानीय अर्ग्यानिक परिकारका साथ आवश्यक नियमन गर्दै पर्यटन प्रवर्द्धन गर्न जोड दिइने बताइएको छ।
उच्च हिमाली क्षेत्रमा निर्माण गरिएको केबुलकारसहित थप पर्यटकीय गन्तव्यले पर्यटन प्रवर्द्धनका साथै स्थानीयस्तरमा उल्लेख्यरूपमा जोरगार सिर्जना गर्ने नीति तथा कार्यक्रमको लक्ष्य रहेको छ। (प्रतिकात्मक तस्बिर)
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।