काठमाडौं- सांसदहरुले समसामयिक विषयमा सरकारको ध्यानाकर्षण गराएका छन्।
प्रतिनिधिसभाको मंगलबारको बैठकमा शून्य समयमा बोल्दै सांसदहरुले समसामयिक र क्षेत्रगत विषयमा सम्बन्धित निकायको ध्यानाकर्षण गराएका हुन्।
सांसद मिना सुब्बाले केही दिनदेखि राजधानीमा महिलामाथि सिरिञ्ज आक्रमणका घटना बढेको र यसले महिला जगतमा त्रास फैलिएको भन्दै यस घटनालाई गम्भीर रुपमा लिई सत्यतथ्य पत्ता लगाई दोषीलाई कारबाही गर्न सरकारको ध्यानाकर्षण गराइन्।
सांसद बिमला नेपालीले गृह मन्त्रालयले एकपछि अर्को निर्देशन दिएर नागरिकता वितरणमा सधैं समस्या देखिने गरेकाले दीर्घकालिन समाधानका लागि नागरिकतासम्बन्धी विधेयक तत्काल सदनको छलफलमा ल्याउन सम्बन्धित निकायको ध्यानाकर्षण गराइन्।
सांसद बिमला विकले प्रकाश सपुत र शान्ति श्री परियारले गायको 'गलबन्दी च्यातियो तिमीले तानेर' बोलको गीत बाझियो भनी दाबी गर्ने शम्भु राईलाई समर्थन गर्ने नाममा कलाकार र सर्जकमाथि अपमान गर्ने काम भएको भन्दै कानुनी दायराभित्र ल्याएर अविलम्ब कारबाही गर्न माग गरिन्।
सांसद महेश्वरजंग गहतराज अथकले प्रकाश सपुत र शान्ति श्री परियारलाई अपमानित गर्नुको साथै सिंगो समुदायलाई नै अपमानित गर्ने गरी सामाजिक सञ्जालमा भइरहेका गतिविधि नियन्त्रणका लागि सरकारलाई गम्भीर कदम चाल्न माग गरे।
सांसद मिनबहादुर विश्वकर्माले ढुवानीमा भ्याट प्रणालीले ढुवानी क्षेत्रमा काम गर्ने व्यवसायीलाई व्यवहारिक कठिनाइ भएको भन्दै यो व्यवस्था तत्काल खारेज गर्न माग गरे।
यस्तै सांसद मैना कुमारी भण्डारीले राजधानीका वीर अस्पताल र त्रिवी शिक्षण अस्पतालमा पनि सरकारले अघि सारेको स्वास्थ्य बिमाअन्तर्गतको उपचार हुने व्यवस्था गर्न माग गरिन्।
गएराति अछाम जिल्लाको पञ्चदेवल विनायक नगरपालिका-३ नन्दवहादुर कडायतको घरमा रहेको वडा कार्यालयमा विप्लव समूहले आगजनी गरेको, ढकारी गाउपालिका-५ को वडा कार्यालय पनि आजगनी भएको भन्दै सांसद यज्ञ बहादुर बोगटीले दोषीमाथि कडा कारबाही गर्दै निजी घरमा भएको क्षतिको क्षतिपूर्ति उपलब्ध गराउन सरकारको ध्यानाकर्षण गराए।
सांसद यज्ञराज सुनुवार संघीय शिक्षा ऐन आउन ढिलाई हुनु र यस बीचमा तीनै तहको सरकारको समन्वयको अभाव हुँदा सिंगो शिक्षा क्षेत्र नै प्रभावित हुन सक्नेतर्फ सरकारलाई सचेत गराए।
सांसद राजबहादुर बुढा क्षेत्रीले गत बैसाख २२ र २४ गतेको असिना र वर्षाले दैलेखमा अन्नबालीमा क्षति भएको र त्यसको अहिलेसम्म राहत उपलब्ध नगराइएको भन्दै त्यसतर्फ सरकारले चासो देखाउनुपर्नेमा जोड दिए।
सांसद रामकुमारी झाक्रीले पहुँचवालाले बिमासहित सरकारबाट पनि क्षतिपूर्ति लिने प्रचलन देखिएको भन्दै बिमा नीति र क्षतिपूर्तिसम्बन्धी मापदण्ड स्पष्ट पार्न सरकारको ध्यानाकर्षण गराइन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
