काठमाडौं- भौतिक पूर्वाधार तथा यातायातमन्त्री रघुवीर महासेठले अधिकांश सडक आयोजना निर्माणको काम तीव्र गतिमा अघि बढाइएको बताएका छन्। आगामी आर्थिक वर्षको विनियोजन शीर्षकमाथि उठेका प्रश्नको जवाफ दिँदै मन्त्री महासेठले सबैजसो सडक आयोजना निर्माणको कामले तीव्रता पाइरहेको बताएका हुन्।
महासेठले सोमबार संसदमा जवाफ दिँदै २०७९/८० सम्ममा सबै राष्ट्रिय गौरवका आयोजनाको निर्माण सम्पन्न भइसक्ने बताए। आगामी आर्थिक वर्षभित्रै मध्यपहाडी राजमार्ग र २०७६ असोजभित्र हुलाकी राजमार्गको बाँकी खण्डको निर्माणका कार्यका लागि बोलपत्र आह्वान भइसक्ने उनको भनाइ छ।
हुलाकी सडक आयोजना
कुल लम्बाइ १ हजार ७ सय ९२ किलोमिटर रहेको हुलाकी राजमार्गको २ सय ५२ किलोमिटर सडक कालोपत्रे भइसकेको छ। ९ सय ९२ किलोमिटर सडक निर्माणको चरणमा रहेको छ। ३ सय किलोमिटर सडक निर्माणका लागि बोलपत्र आह्वान भइसकेको छ भने बाँकी २ सय ४२ किलोमिटर सडकको बोलपत्र आगामी असोजभित्रै गरिनेछ।
कुल २ सय १९ वटा पुल निर्माण आवश्यक रहेको उक्त आयोजनामा ८० वटा निर्माण सम्पन्न भइसकेको छ। ८० वटा पुल निर्माणको अन्तिम चरणमा रहेको छ। ६९ वटा पुल डिजाइनको अन्तिम चरणमा रहेको छ। आव २०७८/७९ सम्ममा हुलाकी सडक आयोजना निर्माण सम्पन्न हुन्छ।
मध्यपहाडी सडक आयोजना
कुल १ हजार ८ सय ७९ किलोमिटर लम्बाइ रहेको यो आयोजनाको ४ सय १० किलोमिटर कालोपत्रे सडक खण्ड निर्माण सम्पन्न भइसकेको छ। ५ सय ४२ किलोमिटर सडक निर्माणका लागि ठेक्का व्यवस्थापन भइसकेको छ। ४ सय ६३ किलोमिटर सडक कालोपत्रे हुन बाँकी रहेको छ।
मध्यपहाडी सडक खण्डलाई आर्थिक वर्ष २०७८/७९ सम्ममा सम्पन्न गर्ने लक्ष्य राखिएको छ।
उत्तर–दक्षिण लोकमार्ग
२०७२ सालको भूकम्पपछि बन्द भएको अरनिको राजमार्ग सञ्चालन गरिएको छ। यद्यपि यो सडकखण्डको अधिकांश भाग कालोपत्रे हुन बाँकी रहेको छ।
रसुवागढी–ठोरी सडकखण्ड आगामी २ आर्थिक वर्षभित्र सम्पन्न गर्ने लक्ष्य लिइएको छ। कोसी करिडोर अन्तर्गत धनकुटा–किमाथांकाको १४ किलोमिटर ट्रयाक खोल्न बाँकी रहेको छ। त्यो आगामी आर्थिक वर्षभित्रै सम्पन्न गरिनेछ।
कालीगण्डकी करिडोरअन्तर्गत बेनी–जोमसोम सडकखण्ड कालोपत्रे तथा जोमसोम–कोरला सडक खण्डको ग्राभेल निर्माण कार्य २०७७/७८ भित्रमा सम्पन्न गरिनेछ।
कर्णाली करिडोर अन्तर्गत हिल्सा–सिमीकोट सडकखण्डको ट्रयाक खोल्ने काम आगामी आर्थिक वर्ष २०७६/७७ भित्र सम्पन्न गरिनेछ। फुलालु–सल्लीसल्ला सडकखण्ड अन्तर्गत १ सय ४० किलोमिटर सडक खण्ड निर्माणको काम आर्थिक वर्ष २०७७/७८मा सकिनेछ।
मदन भण्डारी राजमार्ग
१ हजार २ सय किलोमिटर कुल लम्बाइ रहेको मदन भण्डारी राजमार्ग अन्तर्गत धरान–हेटौंडा सडकखण्ड आगामी आर्थिक वर्षभित्रै सम्पन्न हुनेछ। धरान–शान्तिनगर–बाहुनडाँगी सडकखण्ड आर्थिक वर्ष २०७६/७७ भित्रै ठेक्का प्रक्रियामा जानेछ। त्यसैगरी सम्भाव्यता अध्ययन बाँकी रहेको सुर्खेत–रुपाल खण्डको सम्भाव्यता अध्ययन कार्य आगामि आर्थिक वर्षभित्र सम्पन्न गरिनेछ।
महेन्द्र राजमार्ग
१ हजार २७ किलोमिटर रहेको पूर्वपश्चिम राजमार्ग विस्तारको काम सुरु भएको छ। बुटवल–नारायणघाट र कमला–कञ्चन खण्ड गरी करिब २ सय किलोमिटर सडक विस्तारको काम यही आर्थिक वर्षको मसान्तबाट सुरु भएको छ। सप्तरीको पकली र पकलीदेखि काँकडभिट्टासम्मको सडक विस्तारको काम नयाँ अवधारणासहित अगाडि बढाइएको छ। यी सडकहरु ४ लेन र आवश्यकता अनुसार सहरी क्षेत्रमा ६ लेनसम्म विस्तार गरिनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
