काठमाडौं– छिमेकी राष्ट्र भारत र चीनलाई समेत जोड्ने लक्ष्यसहित अघि बढेको काठमाडौं–तराई द्रुतमार्ग (फास्ट ट्र्याक) निर्माणको काम नेपाली सेनाले गरिरहेको छ।
द्रुत मार्ग (फास्ट ट्र्याक)मा पहिलाको अनुमानभन्दा झन्डै १ खर्ब रूपैयाँ बढी खर्च हुने आँकलन गरिएको छ। कोरियाली कम्पनी सुसुङले तयार पारेको विस्तृत परियोजना प्रतिवेदन (डिपिआर)अनुसार फास्ट ट्र्याकको लागत झन्डै २ खर्ब रूपैयाँ हुने देखाएको हो।
२२ महिनाअघि सेनाले काम थाल्दा भारतीय कम्पनी आइएलऐफएसले बनाएको डिपिआरले फास्ट ट्र्याकमा १ खर्ब १२ अर्ब रूपैयाँ खर्च हुने अनुमान गरेको थियो। यसरी निर्माण भइरहेको द्रुतमार्गमा नेपाल टेलिकमले निर्माणसँगसँगै अप्टिकल फाइबर विस्तार गर्ने तयारी गरेको छ।
टेलिकम प्रबन्ध निर्देशक डिल्लीराम अधिकारी अनुसार अहिले अप्टिकल फाइबर विस्तारका लागि नेपाली सेनासँग छलफल भइरहेको जानकारी दिए। अहिले द्रुतमार्ग निर्माणसँगै अप्टिकल फाइबर विस्तार गर्दा लगानीसमेत कम हुने उनको भनाइ छ।
टेलिकमले अहिले हुलाकी राजमार्गलगायत अन्य राजमार्गमा पनि अप्टिकल फाइबर विस्तार गर्दै आएको छ।
४ वर्षमा बनाइसक्ने लक्ष्यसहित सेनाले २०७४ साउनबाट फास्ट ट्र्याकमा काम सुरू गरेको थियो। सेनालाई दिइएको जिम्मेवारीअनुसार २२ महिना गुज्रिसकेको छ।
डिपिआरअनुसार आयोजना पूरा गर्न अझै ५ वर्ष लाग्छ। अहिलेसम्म सेनाले माटो काट्ने, पुर्ने र रूख काट्ने काम मात्र गरिरहेको छ। डिपिआर नभएकाले सुरूङ र पुलको ग्लोबल टेन्डर गर्न नसकेको सेनाले जनाएको छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
