धनगढी– धनगढी उप–महानगरपालिकाले आर्थिक वर्ष २०७६÷०७७ को वार्षिक नीति, कार्यक्रम तथा बजेट नगरसभामा पेस गरेको छ। आईतबार डाकिएको चौथो नगरसभामा नीति तथाका कार्यक्रम पेस गरेको हो।
धनगढी उप–महानगरपालिकाका उप–प्रमुख सुशिला मिश्र भट्टले नगरसभामा एक अर्ब ४८ करोड ४ लाख ४८ हजारको बजेट पेस गरेकी हुन्। जसमध्ये चालुतर्फ ७६ करोड ३६ लाख ४२ हजार एक सय ६६ रुपैयाँ ३८ पैसा रहेको छ। पुँजीगत तर्फ ८१ करोड ६८ लाख पाँच हजार आठ सय ३३ रुपैयाँ ६२ पैसा रहेको छ।
नगरपालिकामा कार्यान्वयन हुने तर रातो किताबमा समावेश गर्न नपर्ने अनुदान तर्फको ५७ करोड ४२ लाख यस बजेटमा नसमेटिएको नगरसभा अध्यक्ष तथा धनगढी उप–महानगरपालिकाका प्रमुख नृपबहादुर वडले बताए।
‘समग्रमा बजेट बढेको छ तर यस पटक अनुदान नगरको बजेटमा समावेस नगर्ने परिपत्र भएकोले राखिएन। यसअघि अनुदानको अनुमानीत रकमलाई पनि बजेटमै जोडर राखिने गरेको छ,’ नगर प्रमुख वडले बताए।
बजेट तथा कार्यक्रमले पूर्वाधार विकासमा सुधारिएको सडक, कृषीमा आधुनिकिकरण तथा व्यवसायीकरणलाई जोड दिएको छ। शिक्षा क्षेत्रमा गुणस्तर ल्याउने, गुणस्तर तथा सर्वसुलभ स्वास्थ्य सेवामा सुधार, सूचना प्रविधि तथा संचारमा विकास, उद्यम र सहकारीको विकास, मानव संशाधन र सामाजिक विकास, पर्यटन प्रवद्र्धनको क्षेत्रमा विशेष जोड, सामुदायीक बनको संरक्षण तथा व्यवस्थापन र प्राकृतिक विपद् तथा पूर्व तयारी, राहत वितरण, पुर्नस्थापन, पुनःनिर्माणलाई प्राथमिकतामा राखेको छ।
कृषितर्फ जैविक खेतीलाई प्रोत्साहन गर्ने, बगरखेतीलाई प्रोत्साहन गर्ने, एक घर दुई बिरुवा कार्यक्रमलाई निरन्तरता दिने, वडा नं १२ मा द्धारिका देवी कृषि अनुसन्धान केन्द्र स्थापना गर्ने लगायतका कार्यक्रम समावेश गरिएका छन्। पशु विकास तर्फ छाडा पशुचौपयामा भ्याक्सीनेशन, पशुको नस्ल सुधार, पशु विमा लगायतका कार्यक्रम समेटिएका छन्। पर्यटन विकास तर्फ कैलाली नाला, सुकुटी नाला, मोहना नदी किनारमा साईकल ट्रयाक निर्माण गर्ने, धनगढीका पर्यटकिय स्थल जोड्न खरिडोर तयार पार्ने, धनगढीका तालतलैयाहरुको विकास, संरक्षण तथा पर्यटन प्रवद्र्धनका लागि काम गर्ने, भादागाउँ होमस्टेको पवद्र्धन गर्ने लगायतका कार्यक्रम रहेका छन्।
सामाजिक विकास तर्फ वालबालिका किशोर किशोरी संग उप–मेयर कार्यक्रम, शिक्षा तर्फ असहाय र बिपन्न संग मेयर कार्यक्रम, विद्यालयको पहुँच बाहिर रहेका बालबालिकालाई ‘झिकाउ, टिकाउ र सिकाउ’ कार्यक्रम संचालन गर्ने भनिएको छ ।
धनगढी उप–महानगरपालिकाका उप–प्रमुख सुशिला मिश्र भट्टले निकै मेहनतका साथ स्थानीयतहले अवलम्वन गर्ने सबै प्रकृया पुरा गरेर, नगरवासीका मागहरुलाई श्रोत साधनले भ्याए सम्म समेट्ने प्रयत्न गरिएको बताईन्।
धनगढी उप–महानगरपालिकाका प्रमुख प्रशासकीय अधिकृत तथा नगरसभाका सदस्य सचिव नारायण प्रशाद सापकोटाले वार्षिक नीति, कार्यक्रम तथा बजेट माथीको छलफल जारी रहेको बताए।
सोमबार बिहान ८ बजे बिहान पुनः बस्ने गरि नगरसभाको बैठक सम्पन्न भएको बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
