काठमाडौं- अध्ययन वा विभिन्न पेसा व्यवसाय गर्न काठमाडौंमा अस्थायी बसोबास गर्नेको संख्या ठूलो छ। देशका अन्य सहरबाट गाउँ जाने र विदेश गएकाहरु समेत दसैं मान्न जन्मथलो जाने गरेका छन्। काठमाडौंबाट दसैं मनाउन आफ्नो गृहजिल्ला जानेको संख्या २० लाखभन्दा बढी रहेको बताउने गरिन्छ।
यसको यकिन तथ्यांक भने न यातायात व्यवस्था विभागको संयन्त्रले राखेका छ न त ट्राफिक प्रहरीले नै। तथापि दसैंमा घर जानेको संख्या घटस्थापनादेखि उल्लेख्य रुपमा बढ्ने गरेको छ। सबैभन्दा धेरै यात्रु फूलपातीको दिन हुने यातायात व्यवसायीहरुको भनाइ छ।
यात्रुलाई सुरक्षित र सहज रुपमा घर पुर्याउने व्यवस्था मिलाउन यातायात व्यवस्था विभागले आफ्नो तर्फबाट कुनै कसर बाँकी नराखेको महानिर्देशक गोगनबहादुर हमालले बताए। ‘हामीले विभागको सम्पूर्ण सम्यन्त्र अनुगमन लगायत सवारी व्यवस्थापनमा सहयोग पुर्याउन परिचालन गरेका छौं,’ उनले भने, ‘अहिलेसम्म कहीँ कतै टिकन नपाएको वा ठगिएको गुनासो आएको छैन। र आउन नदिन विभाग ट्राफिक प्रहरीसँग समन्यव गरेर लागिरहेको छ।’
यात्रुहरुको चापका आधारमा आवश्यकता अनुसार बसको संख्या थपिने व्यवस्था मिलाइएको नेपाल यातायात व्यवसायी राष्ट्रिय महासंघका महासचिव सरोज सिटौलाले बताए। ‘यात्रुहरुलाई सुरक्षित र सहज रुपमा गन्तव्यमा पुर्याउन महासंघ लागिरहेको छ,’ उनले भने, ‘यात्रुको चाप धेरै हुने रुटमा आवश्यकता अनुसार बस थपिनेछ।’
घटस्थापना लागेसँगै काठमाडौंबाट दैनिक डढे लाख यात्रु बाहिरिन थालेको सिटौलाले बताए। अब यो संख्या फूलपातीसम्म निरन्तर बढ्ने उनको भनाइ छ।
१४ स्थानमा यात्रु सहायता कक्ष
यातायात व्यवस्था विभागले यात्रुहरुलाई सहजता होस भन्ने उद्देश्यले यात्रु सहायता कक्ष राखेको छ। काठमाडौंको नयाँ बसपार्क, कोटेश्वर, बल्खु, चाबहिल लगायत १४ स्थानमा यात्रु सहायता कक्ष राखिएको छ। त्यस्तै संघीय मानिला मन्त्रालयमार्फत ७ वटै प्रदेश र प्रदेश मन्त्रालयमार्फत ७ सय ५३ स्थानीय तहलाई यातायात व्यवस्थापनको विषयमा पत्राचार खरिएको विभागका महानिर्देशक हमालले जानकारी दिए।
सार्वजनिक सवारीको रुट खुल्ला
सरकार असोज १२ देखि सार्वजनिक यातायातको रुट खुल्ला गरेको छ। दसैंका लागि एक ठाउँबाट अर्को ठाउँमा जाने यात्रुलाई सहज वातावरणमा यात्रा गराउन विभागले असोज १२ गतेदेखि १९ गतेसम्म रुट परमिट खुल्ला गरेको हो।
यात्रुको चाप धेरै हुने समयमा आवागमन सहज होस भने बाटो इजाजत पत्र (रुट पर्मिट) खुल्ला गरिएको विभागका महानिर्देशक गोगन बहादुर हमालले बताए। विगतका वर्षहरुमा पनि सरकारले दसैंको समयमा सवारीको रुट पर्मिट खल्ला गर्ने गरेको थियो । यात्रुको चाप कम हुने रुटका सवारी धेरै यात्रु भएको रुटमा जान सकून् भनेर यस्तो निर्णय हुने गरेको हमालले बताए।
ठूला मालवाहक सवारीलाई काठमाडौं आउन रोक
घटस्थापनाको दिनदेखि विभागले १० चक्के र सोभन्दा ठूला मालवाहक सवारीसाधन कठमाडौं छिर्न निषेध गरेको छ।
यस्ता सवारीसाधनलाई चितवनको नारायणगढदेखि नै आवागमनमा रोक लगाइएको यातायात व्यवस्था विभागले जनाएको छ।
दसैंको समयमा एकैपटक धेरै सवारीसाधन सञ्चालन हुने र सडक जाम हुने समस्यालाई मध्यनजर गर्दै यो निर्णय भएको विभागले जनाएको छ। विभागले सूचना जारी गर्दै अत्यावश्यक खाद्यान्न, लत्ताकपडा, औषधि, तरकारी, मासुजन्य पदार्थ लगायत तत्कालै नाश भएर जाने सामग्रीबाहेक अन्य सबै १० चक्के र सोभन्दा ठूला मालवाहक सवारीलाई १९ गतेसम्मको लागि रोक लगाइएको जनाएको छ। यो निर्णयले यात्रुबाहक सवारीलाई प्राथमिकता दिने विभागको भनाइ छ।
पासाङ ल्हामु र दोलखा जाने बाटो जोखिमपूर्ण
दोलखा जाने र नुवाकोट जाने बाटो निक्कै जोखिमपूर्ण रहेको यातायात व्यवसायीले बताएका छन्। नुवाकोट जाने पासाङ ल्हामु र टोखा–छहरे बाटो खराब भएका कारण बस सञ्चालन नै गर्ने नसक्ने अवस्था रहेको महासंघका महासचिव सरोज सिटौलाले बताए।
त्यस्तै दोलखा जाने बाटोको हालतसमेत उस्तै रहेको उनको भनाइ छ। यसमा सरकारले चासो नदिने हो भने यात्रुलाई सास्ती हुने र बस गुडाउनै नसकिने अवस्था आउने उनले बताए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
-1765273665.jpg)
-1763721444.png)
