काठमाडौं- नेपाल प्रहरीले म्यादी प्रहरीको तलब–भत्तामा कुनै भेदभाव नगरिएको स्पष्ट पारेको छ।
आइतबार आयोजित साक्षात्कार कार्यक्रममा प्रहरी प्रवक्ता नायव प्रहरी महानिरीक्षक मनोज न्यौपानेले सबै म्यादी प्रहरीलाई पूर्वघोषित तलब, रासन र स्थानीय भत्ता सुविधा दिइसकिएको र दिने भनिएको कुनै सुविधामा कटौती नगरिएको बताए।
'सबैलाई आधारभूत मासिक तलब १७ हजार २ सय ३० रुपैयाँका दरले दिइएको छ', उनले भने, 'रासन र स्थानीय भत्ता सुविधा फरक-फरक जिल्ला र एउटै जिल्लाभित्र पनि फरक-फरक सुविधा तोकिएअनुसार सुविधा दिइएको छ।'
तोकिएकोभन्दा कम सेवा-सुविधा पाएको भन्दै कालिकोटमा शुक्रबार म्यादी प्रहरीले गरेको आन्दोलनका क्रममा म्यादी प्रहरी विवेक ऐडीको मृत्यु भएको थियो।
प्रवक्ता न्यौपानेले कालिकोटमा पनि म्यादी प्रहरीलाई दिने भनिएको सबै सेवा-सुविधा दिइएको बताए।
कालिकोट घटनाको सम्बन्धमा छानबिन समिति गठन गरिएको र समितिले काम सुरु गरिसकेको उनले बताए।
सरकारले ५५ दिनका लागि ९८ हजार २ सय ६८ म्यादी प्रहरीका लागि भर्ना माग गरेको थियो। निर्वाचन अवधिभर एक हप्ताका लागि प्रतिदिन २ सय ५० रुपैयाँका दरले विशेष भत्ता, रासन र सात दिनकै लागि प्रतिदिन २ सय ५० रुपैयाँका दरले खाजा/खाना खर्च उपलब्ध गराएको थियो ।
यस्तै, पोशाक भत्ताबापत चार हजार रुपैयाँ र खटिएको ठाउँमा जान एक हजार रुपैयाँ खर्च उपलब्ध गराइएको प्रवक्ता न्यौपानेले जानकारी दिए। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
