फिलिपिन्स- फिलिपिन्समा आँधी र आगलागीका कारण तीन दिनमा कम्तीमा २ सय ३७ जनाको मृत्यु भएको छ।
शुक्रबार आएको ‘टेमबिन’ नामक आँधीमा परी मृत्यु हुनेहरुको संख्या अहिलेसम्म २ सय पुगेको छ भने शनिबार दावाओ सिटीमा रहेको एउटा सपिङ मलमा भएको आगलागीमा परी ३७ जनाको मृत्यु भएको थियो।
अग्नि नियन्त्रक र उद्धारकर्ताले झन्डै १६ घन्टासम्मको लगातारको प्रयासपछि आइतबार बिहान मात्र आगो निभाउन सफल भएका छन्।
राष्ट्रपति रोड्रिगो डुतेर्तेले आगलागीबाट भएको क्षतिप्रति दुःख व्यक्त गर्दै पीडितलाई धैर्यधारण गर्न आग्रह गरेका छन्। उनले पीडितका परिवारलाई सरकारले सहयोग गर्ने घोषणा पनि गरेका छन्।
अधिकारीहरुले आगलागीको घटनामा केही व्यक्ति हराइरहेको र उनीहरु जीवितै रहने सम्भावना कम रहेको बताएका छन्।
फिलिपिन्सको दोस्रो ठूलो टापुका रुपमा चिनिने मिन्दानाओमा आएको आँधीमा परी अरु कैयौं बेपत्ता भएको जानकारी प्रहरी अधिकारीले दिएका छन्।
आँधीमा २ सय जनाको मृत्यु भएकोमा उत्तरी मिन्डानाओमा मात्रै १३५ जना र जाम्बोङ पेनिन्सुलामा ४७ जनाको मृत्यु भएको फिलिपिन्स प्रहरीले जनाएको छ।
आँधीका कारण ५० हजारभन्दा बढी नागरिक विस्थापित भएका छन्। सयौं घर ध्वस्त भएका छन् भने कतिपय गाउँ नै बाढीले बगाएको छ।
फिलिपिन्समा आँधीका कारण ठूलो संख्यामा मानवीय क्षति भएकोप्रति संयुक्त राष्ट्र संघले दुःख व्यक्त गरेको छ।
राष्ट्रसंघका महासचिव एन्टोनिओ गुथ्रेसले आँधी र आगलागीका कारण फिलिपिन्सका धेरै नागरिकले ज्यान गुमाउनुपरेको र ठूलो मात्रामा भौतिक क्षति भएकोमा दुःख व्यक्त गरेका हुन्। (रासस/सिन्ह्वा)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
