भैरहवा- माओवादी केन्द्रका अध्यक्ष पुष्पकमल दाहाल 'प्रचण्ड'ले एक-दुई जनाले विरोध गरेर पार्टी एकता नरोकिने भन्दै शीर्ष नेताबीच पार्टी एकतामा कुनै समस्या नरहेको दाबी गरेका छन्।
माओवादी केन्द्र रुपन्देहीले आयोजना गरेको कार्यक्रममा अध्यक्ष दाहालले को नेताले के भन्छन्, त्यसको पछि लाग्न नहुनेमा जोड दिए।
'कसैले एकताको विरोध गर्छन् भने ती छुट्छन्। तर, विकास, समृद्धि र समाजवादको रेल अघि बढ्छ', उनले भने।
एमाले-माओवादीमा एकता मन नपराउने एकाध मान्छे भए पनि आफूहरु एकताप्रति इमान्दार रहेको दाहालले उल्लेख गरे।
'हामी सबै विषयमा गम्भीर छलफल गरेर एकता टुंग्याउँछौं', उनले भने, 'एकता हुन नदिने तत्वबाट गरिएका प्रचार र हल्लाका पछि नलाग्नुस्। बरु, एकताका लागि नेतृत्वलाई बल दिनुस्।'
फरक प्रसंगमा दाहालले प्रतिनिधिसभातर्फको समानुपातिक सांसदबारे पार्टीले कुनै निर्णय नगरेको बताए।
'पत्रपत्रिकामा माओवादीका समानुपातिक सांसदको लिस्ट आएको रहेछ। तर, समानुपातिक सांसदबारे कुनै निर्णय भएको छैन', दाहालले भने, 'तपाईंहरु त्यसको भ्रममा नपर्नुहोला। निर्वाचन आयोगले माग्नेबित्तिकै पार्टीमा छलफल गरेर सांसद टुंग्याउँछौं।'
राष्ट्रियसभा सम्बन्धी हाल देखिएको विवाद दलहरुबीचको छलफलबाट छिटै अन्त्य हुने दाहालले विश्वास व्यक्त गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
