काठमाडौं– जुम्ल्याहा दिदी–बहिनी मायांका र माहिका राणाले १५ औं जयकर स्मृति राष्ट्रिय जुनियर लनटेनिस प्रतियोगिताको यु–१८ गल्र्स डबल्स उपाधि शुक्रबार जितेका छन्।
सातदोबाटोस्थित टेनिस कम्प्लेक्समा भएको फाइनलमा उक्त जोडीले अभिलाषा विष्ट र विजिशा श्रेष्ठको जोडीलाई ६–३ र ६–३ को सोझो सेटमा पराजित गरे। सोही स्पर्धाको ब्वाइजमा दाई संरक्षणभूषण वज्राचार्य र भाई सम्यकको जोडीले बाजी मारे । फाइनलमा दाई–भाई जोडीले प्रणव खनाल र आदित सुवेदीको जोडीलाई ६–३ र ६–४ को सीधा सेटमा हराए।
यु–९ गल्र्स सिंगल्समा सुनिरा थापा च्याम्पियन बनिन् । सुनिराले उपाधि भिडन्तमा प्रशंसा मोक्तानको चुनौती ४–१ र ५–३ ले पन्छाइन्। त्यसै स्पर्धाको ब्वाइजमा सक्षमविक्रम शाह पहिलो भए। उनले फाइनलमा आयुशमान हजुर घलेमाथि ४–२ र ४–० को सहज जित दर्ता गरे।
यु–१० गल्र्स सिंगल्समा इभा अधिकारी पहिलो भइन् । इभाले फाइनलमा सुनिरा थापालाई ६–० र ६–३ ले पाखा लगाउदै सुनिरालाई दोहोरो चुम्नबाट वण्चित तुल्याइन्। सो स्पर्धाको ब्वाइज फाइनलमा आरभसम्राट हाडाले प्रणव मानन्धरलाई ६–० र ६–३ को सोझो सेटमा निराश पार्दै स्वर्ण जिते।
अभिलाषा विष्ट यु–१४ गल्र्स सिंगल्समा पहिलो भइन्। फाइनलमा अभिलाषाले इशाश्री शाहमाथि ६–४ र ६–४ को जित निकालिन् । त्यस स्पर्धाको ब्वाइजमा आदित सुवेदी पहिलो भए। उनले फाइनलमा निशान श्रेष्ठलाई ६–० र ६–० ले सहजै पन्छाए।
प्रतियोगिताको अन्तिम दिन शनिबार यु–१८ ब्वाइज र गल्र्स सिंगल्स फाइनल हुनेछ। ब्वाइजमा संरक्षकभूषण वज्राचार्यले प्रणव खनालको सामना गर्नेछन् भने गल्र्समा मायांका राणाले प्रेरणा कोइराला विरुद्ध प्रतिस्पर्धा गर्नेछिन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
