काठमाडौं– निर्वाचन आयोग राष्ट्रियसभा गठन नभएसम्म प्रतिनिधिसभाको समानुपातिक तर्फ मतपरिणाम सार्वजनिक नगर्ने यसअघिको अडानबाट पछाडि हटेको छ।
माओवादी केन्द्रका अध्यक्ष पुष्पकमल दाहालसँगको भेटपछि आयोगले प्रदेश र प्रतिनिधिसभा निर्वाचनको समानुपातिकतर्फको सिट संख्या सार्वजनिक गर्ने तयारी गरेको हो।
बिहीबार साँझ दाहाल निवासमा प्रमुख निर्वाचन आयुक्त अयोधीप्रसाद यादव र अध्यक्ष दाहालबीच भेट भएको हो। भेटमा दाहालले सरकार गठनका लागि निर्वाचन आयोग बाधक हुने अवस्था सिर्जना हुन लागेकाले सामानुपातिकतर्फ मतपरिणाम सार्वजनिक गरिदिन आग्रह गरेका थिए।
आयोगलाई मतपरिणाम सार्वजनिक गर्न कानुनी बाधा नरहेको तर्फ दाहालले ध्यानाकर्षण गराएका थिए। संविधानको व्यवस्था अनुसार प्रतिनिधिसिभामा ३३ प्रतिशत महिला प्रतिनिधित्व हुनेगरी नै दलहरुले सिफारिस गर्ने भन्दै यादवलाई सिट संख्या टुंग्याइदिन आग्रह गरेका थिए। लगत्तै आयोगले समानुपातिक तर्फको सिट निर्धारण गर्न लागेको हो।
निर्वाचनको अन्तिम मतपरिणाम सार्वजनिक भएपछि मात्र नयाँ सरकार गठन प्रक्रिया अघि बढ्ने भएकाले आयोग समेत समानुपातिकतर्फको सिट टुंगो लगाउने तयारीमा जुटेको छ।
पहिलो चरणमा प्रदेशसभा निर्वाचनको समानुपातिकतर्फको सिट संख्या सार्वजनिक गर्ने तयारीमा आयोग रहेको प्रवक्ता नवराज ढकालले बताएका छन्। यसअघि आयोग मतपरिणाम संकलनमा मात्र केन्द्रित भएकाले अब सिट संख्या तोक्ने तयारीमा रहेको ढकालले बताए।
प्रदेशसभापछि आयोगले केही दिनमै प्रतिनिधिसभाको समानुपातिकतर्फको सिट संख्या पनि टुंग्याउने ढकालले बताए।
निर्वाचन आयुक्त इला शर्माले केही समयअघि प्रतिनिधिसभाको समानुपातिकतर्फको सिट बाँडफाँट गर्न राष्ट्रियसभाको निर्वाचन आवश्यक रहेको बताएपछि अन्तिम मतपरिणाम सार्वजनिक गर्ने बारे अन्योल सिर्जना भएको थियो। दलहरु पनि यही विवादमा दुई ध्रुवमा विभाजित भएका थिए। राष्ट्रियसभा निर्वाचन सम्बन्धी अध्यादेश रोकेको भन्दै राष्ट्रपति विद्यादेवी भण्डारी पनि विवादमा तानिएकी छन्।
राष्ट्रियसभामा प्रत्येक प्रदेशबाट ३ जना र राष्ट्रिपतिले मनोनित गर्ने ३ मध्ये एक जना महिला अनिवार्य राख्नुपर्ने व्यवस्थाले राष्ट्रियसभामा करिब ३८ प्रतिशत महिला प्रतिनिधित्व सुनिश्चित हुने देखिएको छ। सोही कारण आयोग राष्ट्रियसभा गठन नभई समानुपातिकतर्फको सिट संख्या निर्धारण नगर्ने अडानबाट पछि हटेको हो।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749801778.jpg)
-1749797959.png)
-1749826086.png)
