काठमाडौं– गुठी विधेयकको विरोध गर्दै आइतबार माइतीघरमा गरिएको विरोध प्रदर्शनमा प्रहरीद्वारा भएको हस्तक्षेपको संसदमा विरोध भएको छ।
सोमबारको संसद सुरु हुनेबित्तिकै कांग्रेसका मुख्य सचेतक बालकृष्ण खाँडले सरकारी हस्तक्षपको विरोध गरे। संविधानले शान्तिपूर्ण रुपमा भेला हुने, समर्थन र विरोध गर्ने अधिकारलाई जोगाएको छ। तर सरकारले शान्तिपूर्ण रुपमा भेला भएका नागरिकमाथि बर्बरतापूर्ण आक्रमण गरेको छ। त्यसको हामी घोर विरोध गर्छौं , उनले भने।
सरकारी हस्तक्षपको सत्तारुढ दल नेकपाकै सांसद पम्फा भुसालले पनि विरोध गरिन्। उनले सरोकारवालासँग छलफल नगरी विधेयक ल्याइएकोमा असन्तुष्टि जनाइन्।
नियमावलीको उल्लंघन
खाँडले आफ्नो कुरा राखेपछि उनले सरकार गम्भीर नभएसम्म सदन नचल्ने बताएका थिए। तर सभामुखले अन्य ससस्य पनि बोल्न चाहेकाले कांग्रेस सांसदलाई बस्न अनुरोध गर्ने नेकपाकी सांसद भुसाललाई बोल्न समय दिएका थिए।
तर, कांग्रेस सांसद उठिरहँदा भुसाल बोल्न थालिन्। कांग्रेसले सरकारको जवाफ मागिरह्यो। केही बेर सत्तापक्ष, प्रतिपक्षी र सभामुख एकैसाथ बोलिरहे।
भुसालले बोलिसकेपछि खाँडले समाभुखले नियमावली उल्लंघन भएको भन्दै आपत्ति जनाए। हामीले सरकारको धारणा मागेर सदन अवरोध गरिरहेका छौं। यस्तो बेलामा कसरी छलफल गर्नुहुन्छ? यो गम्भीर आपत्तिजनक छ। नियमावलीको उल्लंघन हो। यसमा हाम्रो नियमापत्ति छ।
गुठी विधेयक हिजोकै निरन्तरता : मन्त्री अर्याल
भूमि सुधारमन्त्री पद्मा अर्यालले प्रदर्शनकारीले निषेधित क्षेत्र तोड्न खोजेकाले प्रहरीले हस्तक्षेप गरेको बताइन्। त्यस क्रममा केही गिरफ्तार परेको उनले बताइन्।
उनले गुठी विधेयक विगतकै निरन्तरता भएको बताइन्। हिजोको निरन्तरता, हिजोको मर्म र भावनालाई प्रतिकूल पार्ने गरी यो विधेयक प्रस्तुत भएको छैन , उनले भनिन्, परिवर्तित परिस्थितिमा गुठीको व्यवस्थापन प्रदेश र स्थानीय सरकारको अधिकार क्षेत्रभित्र पनि परेकाले हिजोको गुठी संस्थान र आजको गुठी संस्थान हिजोकै तहमा रहन सक्दैन।
उनले प्राधिकरणमा लैजाने बित्तिकै गुठीको मूल्यमान्यता समाप्त नहुने दाबी गरिन्।
उनले गुठी विधेयक संविधान विरोधी नभएको बताइन्। संविधालाई एकीकृत रुपमा बुझ्न उनले आग्रह गरिन्। (फाइल तस्बिर)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
