काठमाडौं- माओवादी केन्द्रका अध्यक्ष पुष्पकमल दाहाल 'प्रचण्ड'ले नयाँ सरकार गठन अगाडि नै पार्टी एकता गरिने बताएका छन्।
चुनावको परिणाम सार्वजनिक भएलगत्तै बसेको माओदी केन्द्रीय सचिवालय बैठकमा अध्यक्ष दाहालले पार्टी एकतापछि मात्र नयाँ सरकार गठन प्रक्रिया अघि बढ्ने बताएका हुन्।
सचिवालय सदस्यको चुनावी रिपोर्टिङ सकिए लगत्तै पार्टी दाहालले चुनावको समीक्षा, पार्टी एकता र सरकार गठनका विषयमा धारणा राखेका थिए। पार्टी एकता गर्ने घोषणा गर्दै निर्वाचनमा गएकाले दुई तिहाई मत आएको दाहालले बताएका थिए।
‘निर्वाचन मार्फत आम जनताले दुई पार्टीबीच एकीकरण भएको हेर्न चाहेको देखाउँछ’, अध्यक्ष दाहालको भनाइ उद्धृत गर्दै माओवादी स्रोतले भन्यो, ‘वाम गठबन्धन मात्र भनेको भए अहिलेको जस्तो चुनावी परिणाम आउने थिएन।’
अध्यक्ष दाहालले चुनाव अगाडि एमालेसँग भएको सहमति अनुसार पार्टी अध्यक्ष र प्रधानमन्त्रीको नेतृत्व आलोपालो गरेर अघि बढ्ने सहमति नजिक पुगिएको बताएका थिए।
पार्टी एकता बिथोल्ने गरी पछिल्लो समय एमालेका केही नेताले दिएको अभिव्यक्ति एमालेको आधिकारिक लाइन नभएको दाहालले बैठकमा जानकारी गराएका थिए।
'एमाले समेत पार्टी एकतामा सकारात्मक भएकाले नयाँ सरकार गठन अगावै पार्टी एकताको आधारभूत विषयमा सहमति हुनेछ', दाहालको भनाइ उद्धृत गर्दै स्रोतले भन्यो।
वाम गठबन्धन गर्दै निर्वाचनमा होमिएका एमाले र माओवादीका शीर्ष नेताबीच चुनावपछि आलोपालो पार्टी र सरकारको नेतृत्व गर्ने सहमति भएको थियो।
दाहालले नयाँ सरकार गठनभन्दा माओवादीको प्राथमिकता पार्टी एकता नै भएको दाबी गरेका थिए। एक सचिवालय सदस्यले भने, ‘सरकार मात्र बनाउने भए कांग्रेसले ५ वर्षकै लागि माओवादीलाई प्रस्ताव गरेको छ, तर चुनावको म्यान्डेट सरकारभन्दा पनि पार्टी एकता हो।’
बैठकमा सहभागी सदस्यले नयाँ सरकार गठन अगावै विचार, संगठन र नेतृत्वको मूल विषयमा सहमति गरेर मात्र अगाडि बढ्नुपर्ने धारणा राखेका थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
