एजेन्सी– अमेरिकी रक्षा मन्त्रालय पेन्टागनले करोडौं अमेरिकी डलर खर्च गरेर युएफओ (अनआइडेन्टिफाइड फ्लाइङ अब्जेक्ट्स) सम्बन्धी अनुसन्धान कार्यक्रम सञ्चालन गरिरहेको खुलासा भएको छ।
पेन्टागनले सन् २०१२ सम्म युएफओ सम्बन्धमा अनुसन्धान कार्यक्रम सञ्चालन गरेको पहिलोपल्ट स्विकारेको पनि न्युयोर्क टाइम्सले जनाएको छ। न्युयोर्क टाइम्सले रक्षा मन्त्रालयका अधिकारीहरूले वर्षौंसम्म युएफओबारे अनुसन्धान गरेका प्रतिवेदनहरू, विभिन्न व्यक्तिसँग गरेका सोधपुछसम्बन्धी अभिलेख फेला पारेको उल्लेख गरेको छ।
कार्यक्रम अमेरिकी सेनाका गुप्तचर अधिकारी लुइस एलिजोन्डोले पेन्टागनको ‘सी रिङ’को पाँचौं तलामा सञ्चालन गरेका थिए।
पेन्टागनले सन् २०१२ मा बजेटका कारण कार्यक्रम बन्द गरेको बताए पनि कार्यक्रम अझै जारी नै रहेको दाबी पनि अखबारले गरेको छ। अखबारका अनुसार पेन्टागनका अधिकारीहरूले गत पाँच वर्षमा संकलन गरेको जानकारीमाथि अनुसन्धान भइरहेको पनि अखबारले उल्लेख गरेको छ।
पेन्टागनले आकाशमा उड्ने अपरिचित वस्तु वा अन्य ग्रहबाट आएको विश्वास गरिने अन्तरिक्ष यानसम्बन्धी अनुसन्धान कार्यक्रम सञ्चालन गरेको अमेरिकी दैनिक ‘द न्युयोर्क टाइम्स’ले सार्वजनिक गरेको हो।
तर कार्यक्रमबारे केही वरिष्ठ अधिकारीलाई मात्र जानकारी रहेको पनि समाचारमा उल्लेख गरिएको छ। अनुसन्धान कार्यक्रम सन् २००७ मा सुरु भएको र सन् २०१२ मा बन्द गरिएको बताइएको छ।
न्युयोर्क टाइम्सले कार्यक्रमसम्बन्धी आफूले भेटेका कागजातमा तीव्र गतिका हवाईजहाज र आकाशमा तैरिने वस्तुहरूबारे उल्लेख भएको जनाएको छ।
तर वैज्ञानिकहरूले भने युएफओको अस्तित्वमा आशंका व्यक्त गर्दै आएका छन्। उनीहरू आकाशमा देखिने वा विज्ञानले कारण पत्ता लगाउन नसकेका आश्चर्यजनक वस्तु वा घटनाले अन्य ग्रहका प्राणीको अस्तित्व प्रमाणित नगर्ने बताउँछन्।
सन् २००७ मा तत्कालीन सिनेटमा डेमोक्रेटिक पार्टीका नेता ह्यारी रिडले युएफओसम्बन्धी अनुसन्धान ‘द एडभान्स्ड एरोस्पेस थ्रेट आइडेन्टिफिकेसन प्रोग्राम’ को सोचको नतिजा भएको पनि न्युयोर्क टाइम्सले उल्लेख गरेको छ। नेवादा राज्यका सिनेटर रहेका उनी अहिले अवकाशप्राप्त जीवन बिताइरहेका छन्।
‘मैले उक्त कार्यक्रम सञ्चालन गरेकोमा कुनै पछुतो छैन वा लज्जित हुनुपर्ने कुनै कारण छैन। यसअघि अरु कसैले पनि नगरेको काम मैले गरेँ’, न्युयोर्क टाइम्सले रिडको भनाइ उद्धृत गरेको छ।
बन्द गरिनुअघि कार्यक्रम सञ्चालन गर्न २ करोड २० लाख अमेरिकी डलरभन्दा बढी खर्च भएको पनि अखबारले उल्लेख गरेको छ। कार्यक्रमका लागि छुट्याइएको बजेटको अधिकांश हिस्सा रिडका अर्बपति साथी रबर्ट बिगेलोको अन्तरिक्षसम्बन्धी अनुसन्धान कम्पनीले खर्च गरेको थियो।
कंग्रेसका केही पूर्वकर्मचारीले उक्त कार्यक्रम अमेरिकाका प्रतिस्पर्धी राष्ट्रहरूको प्राविधिक विकास अनुगमन गर्न सञ्चालित भएको हुनसक्ने आशंका व्यक्त गरे।
उनीहरूका अनुसार अमेरिकाले आफूले विकास गर्न नसकेको कुनै त्यस्तो उडान प्रविधि चीन वा रसियाले विकास गरेको आशंकामा उनीहरूको अनुगमन गर्न कार्यक्रम सञ्चालन गरिएको हुनसक्ने आशंका गरे।
यसै वर्षको सुरुमा अमेरिकाको जासुसी संगठन सिआइए (सेन्ट्रल इन्टेलिजेन्स एजेन्सी)ले यस्ता लाखौं गोप्य कागजात अनलाइनमा सार्वजनिक गरेको थियो। ती कागजातमा युएफओ र त्यससम्बन्धी प्रतिवेदनहरू पनि समावेश थिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778551198-1778552039.jpeg)
-1786602170.png)
