काठमाडौं– ८ सेप्टेम्बर २०१८ मा नेपालले साफ च्याम्पियनसिपअन्तर्गत समूह चरणमा बंगलादेशलाई २–० ले पराजित गरेको थियो। सो खेलमा नेपालका लागि विमल घर्तीमगरले ३३ र नवयुग श्रेष्ठले ९० मिनेटमा गोल गरेका थिए। यो नै नेपालले जित हात पारेको पछिल्लो खेल हो।
त्यसयता नेपालले ७ खेलमा जित निकाल्न सकेन। जित मात्र होइन पछिल्ला ६ खेलमा त गोल समेत गर्न सकेन। नेपालले पछिल्ला ७ खेलमा १० गोल खाइसकेको छ। ७ मध्ये ५ खेल हारेको नेपालले २ खेलमा बराबरी खेल्यो।
बंगलादेशलाई पराजित गरेपछि नेपाल साफ च्याम्पियनसिपको सेमिफाइनलमा पुगेको थियो। सेमिफाइनलमा नेपाललाई माल्दिभ्सले ३–० गोलले हरायो।
त्यसपछि नेपालले अक्टोबरमा बंगबन्धु गोल्डकप खेल्यो। समूह चरणमा नेपाललाई ताजकिस्तानले २–० र प्यालेस्टाइनले १–० गोलले हराए।
नेपालले दुई महिनाअघि कुवेतविरुद्ध २ वटा मैत्रीपूर्ण खेल खेल्यो। पहिलो खेल गोलरहित बराबरी खेलेको नेपाललाई दोस्रो खेलमा कुवेतले १–० गोलले हरायो।
गत आइतबार नेपालले मलेसियाविरुद्ध मैत्रीपूर्ण खेल खेल्यो। सो खेलमा पनि नेपालले अपेक्षाकृत नतिजा निकाल्न सकेन। मलेसियाले घरेलु मैदानमा नेपाललाई २–० गोलले हराएको थियो।
तीन महिनाअघि प्रशिक्षकमा नियुक्त भएका योहान कालिनका लागि कुवेतविरुद्धको मैत्रीपूर्ण खेल पहिलो थियो। भलै उनले बराबरीबाट नेपाल राष्ट्रिय टिमको यात्रा सुरु गरे। तर लगातार ३ खेलमा जितबिहिन मात्र होइन गोलबिहिन बन्न परेपछि कालिन निराश देखिएका थिए। मलेसियासँग पराजित भएपछि कालिनले आर्श्चयमा परेको प्रतिक्रिया दिएका थिए।
बिहीबार भने कालिनका लागि खुसी हुने नजिता आयो। नेपालले बलियो मानिएको चाइनिज ताइपेईसँग उसकै घरेलु मैदानमा १–१ गोलको बराबरी खेल्न सफल भयो। फिफा वरीयतामा ३६ स्थान अघि रहेको ताइपेईसँगको खेलमा नेपालले पछि परेको अवस्थामा पनि बराबरी गोल फर्काएको थियो।
यो गोल नेपालले १० महिनापछि गरेको पहिलो गोल हो। १० महिनापछि गोल गरे पनि नेपाल जितबिहीन भएको ७ खेल भइसकेको छ।
१० महिनापछि नेपालका लागि गोल अभिषेक रिजालले गरे। मलेसियाविरुद्धको खेलबाट डेब्यू गरेका उनले नेपालका लागि पहिलो गोल गरेका हुन्। युवा फरवार्ड रिजालले ताइपेईविरुद्धको खेलमा पहिलो रोजाइमा खेल्ने मौका पाएका थिए।
खेलपछि नेपालका प्रशिक्षक कालिन खुसी देखिएका थिए। उनले नेपालले बलियो मानिएको ताइपेईसँग राम्रो खेलेको प्रतिक्रिया दिँदै नेपाली खेलाडीको 'क्यारेक्टर'को प्रशंसा गरे।
ताइपेइविरुद्ध कालिनले युवा खेलाडीलाई मौका दिएका थिए। उनले कप्तान विराट महर्जन र स्ट्राइकर नवयुग श्रेष्ठलाई पहिलो रोजाइमा खेलाएनन्। ४–५–१ को रणनीतिमा नेपाललाई मैदान उतारेका कालिनले अंग्रपक्तिको जिम्मा युवा फरवार्ड अभिषेकलाई दिएका थिए। मिडफिल्डमा प्रशिक्षक कालिनले सन्तोष तामाङ र रवि पासवानलाई विश्वास गरे। सन्तोष र रविसँगै अनुभवी रोहित चन्द, विक्रम लामा र सुजल श्रेष्ठलाई मिडफिल्डमा उतारियो।
नियमित कप्तान विराज महर्जन पहिलो रोजाइमा नपरेपछि किरण चेमजोङले कप्तानीको जिम्मेवारी पाएका थिए।
ताइपेहविरुद्ध नेपालले पहिलो हाफमा भन्दा दोस्रो हाफमा राम्रो खेलेको थियो। पहिलो हाफमा बल नियन्त्रण र मिस पास बढी भएका थिए। यस्तै नेपालले अट्याकिङ थर्डमा प्रभावशाली खेल देखाउन सकेको थिएन। तर दोस्रो हाफमा भने नेपालले खेलमा सुधार ल्याएको थियो। ताइपेईलाई उसैको मैदानमा पटक–पटक धावा बोलेको थियो।
पछिल्लो एक वर्षमा नेपाली टिममा धेरै परिवर्तन भइसकेको छ। १० महिनाअघि बंगलादेशलाई हराउदाका ६ खेलाडी बिहीबार ताइपेईविरुद्धको टिममा थिएनन्। प्रशिक्षक कालिनले मैत्रीपूर्ण खेलका लागि फिट नभएका खेलाडीलाई टिममा नराखेको प्रतिक्रिया दिएका थिए। जसकारण युवा फरवार्ड विमल घर्तीमगरसहित हेमन गुरुङ, हेमन्त थापा मगर टिममा पर्न असफल रहे।
विश्वकप र एसिया कप छनोटको तयारी गरिरहेको नेपालले ताइपेईविरुद्धको खेललाई निरन्तरता दिनु जरुरी छ। यस्तै मैत्रीपूर्ण खेलमा जोड दिए मात्र छनोटमा नेपालले एसियाका बलिया टिमबिरुद्ध बलियो खेल देखाउन सक्छ। यसो नगरे नेपालले छनोट चरणमा पनि गोल र जितका लागि कुर्नु पर्ने पक्का छ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
