काठमाडौं– इंग्ल्यान्डमा जारी आइसिसी क्रिकेट विश्वकप २०१९ मा दक्षिण अफ्रिकाले सुरुवाती तीन खेल गुमाइसकेको छ। अघिल्लो चरणमा पुग्न दक्षिण अफ्रिकालाई बाँकी ६ वटै खेल जित्नु पर्ने अवस्था छ।
यस्तो मुस्किल परिस्थितिमा दक्षिण अफ्रिकाको बारेमा क्रिकइन्फोमा आएको समाचारले क्रिकेटप्रेमी आश्चर्यमा परेका छन्। संसारका सबैभन्दा विस्फोटक ब्याट्सम्यान एबी डिभिलियर्सले जारी विश्वकप खेल्न चाहेको समाचारले सबैलाई आश्चर्यमा पारेको हो।
डिभिलियर्सले विश्वकप खेल्नका लागि कप्तान फाप डु प्लेसिस, प्रमुख प्रशिक्षक ओटिस गिब्सन र छनोट समितिका संयोजक लिन्डा जोडीसँग सम्पर्क गरेका थिए। तर टिम व्यवस्थापनले उनको प्रस्ताव अस्विकार गरेको थियो।
व्यवस्थापनले डिभिलियर्स टिममा पर्न सम्भव नभएको प्रतिक्रिया दिइएको छ।
३५ वर्षीय डिभिलियर्स मैदानको जुनसुकै भागमा छक्का हान्न सक्ने क्षमता भएका ब्याट्सम्यान हुन्। उनी उत्कृष्ट बलरका लागि पनि टाउको दुखाइ बन्ने गर्छन्। त्यसैले उनलाई कतिपयले सुपरम्यान र ३६० को नाम समेत दिने गरेका छन्।
एकदिवसीय खेलमा छिटो शतक बनाउने रेकर्ड डिभिलियर्सको नाममा छ। उनले ३१ बलमा एकदिवसीय शतक प्रहार गरेका थिए। उनले वेस्ट इन्डिजविरुद्धको सो खेलमा ४४ बलमा १५० रन बनाएका थिए। उनको एकदिवसीय र टेस्ट क्रिकेटमा औसत ५० भन्दा बढी थियो। उनले २२८ एकदिवसीय खेलमा २५ शतक बनाउदा ९५७७ रन बनाएका छन्। जहाँ उनको स्ट्राइक रेट १०१ भन्दा बढी छ।
उत्कृष्ट ब्याट्सम्यान डिभिलियर्सले २३ मे २०१८ मा सबै फरम्याटबाट संन्यासको घोषणा गरेका थिए। फर्ममै भएको अवस्थामा उनले संन्यान लिँदा क्रिकेटप्रेमी चकित बनेका थिए।
एक वर्षपछि भने उनको मन बदलियो। उनले गत अप्रिलमा टिम व्यवस्थापनसँग सम्पर्क गरेर विश्वकप खेल्ने इच्छा व्यक्त गरेका थिए। उनको प्रस्तावको केहि घन्टामै दक्षिण अफ्रिकाले विश्वकपका लागि राष्ट्रिय टिम घोषणा गर्दै थियो।
छनोट समितिका संयोजक लिन्डा जोडीको प्रतिक्रिया यस्तो छ,' डिभिलियर्सले संन्यास लिँदा हामीले फिर्ता गर्न आग्रह गरेका थियौं। तर उनले मानेनन्। तर १८ अप्रिलमा उनले विश्वकप खेल्ने इच्छा देखाए। संन्यासपछि टिममा उनको स्थान रिक्त थियो। त्यो पूरा गर्न एक वर्ष लाग्यो। एक वर्षमा हामी धेरै अघि बढिसकेका थियौं। हामीलाई निष्पक्ष निर्णय गर्नु थियो। हामीले विश्वकपका लागि टिम तय गरिसकेको अवस्थामा डिभिलियर्सको प्रस्ताव मान्न सम्भव थिएन।'
यस विषयमा डिभिलियर्सले केहि बोलेका छैनन्। उनले विश्वकपका दक्षिण अफ्रिकालाई समर्थन गर्न आग्रह गरिरहेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
