राजविराज– संघीय समाजवादी फोरमका अध्यक्ष उपेन्द्र यादवले तराई मधेसमा जातीय विद्वेषले सामाजिक सद्भाव र विकास दुवैलाई कमजोर बनाएको बताएका छन्।
सप्तरी २ बाट प्रतिनिधिसभा सदस्यमा निर्वाचित भएपछि मतदातासँग भेटघाटमा व्यस्त रहेका यादवले शनिबार सप्तरीको तिलाठी–कोइलाडी गाउँपालिकास्थित लौनियामा यस्तो बताएका हुन्।
सप्तरीसहित तराई मधेसका जिल्लामा जातीय घृणा र विद्वेषको तीव्र बढेको भन्दै उनले थपे, ‘अरु जातजातिलाई अपमानित गरी आफूलाई उच्चताको भाव प्रकट गर्ने चलनले सामाजिक एकता कमजोर हुन्छ, उन्नति गर्न सकिँदैन।’
अध्यक्ष यादवले जातीय सद्भाव, परस्पर सम्मान र एकताको व्यवहारले नै विकासका टेवा पुर्याउने बताए। महिलालाई मधेसमा अहिले पनि सामाजिक, राजनीतिक भूमिकाबाट बन्देज गराई कैदी जस्तो जीवन बाँच्न बाध्य पारिएको भन्दै यादवले जनसंख्याको आधा हिस्सा ओगटेका महिलाको हरेक क्षेत्रमा सहभागिता नभएसम्म विकासले गति लिन नसक्ने टिप्पणी गरे।
अध्यक्ष यादवले पहाडको तुलनामा तराई मधेसमा विकासो बजेट बढी दुरुपयोग हुने गरेको भन्दै यसका लागि स्थानीय स्तरबाटै निगरानी आवश्यक रहेको जिकिर गरे।
उनले भने, ‘उपभोक्ता समितिको नाममा बजेट बाँडीचुँडी खाने प्रवृत्ति रोक्न निगरानी टिम बनाएर काम गर्नुपर्ने आवश्यकता छ।’
विगतमा सत्ताधारीले तराई मधेसलाई बजेट दिनै उपेक्षा गरिएको र दिइएको बजेटमा पनि स्थानीय स्तरमा दुरुपयोग भएकाले मधेस विकासमा पछि परेको उनको तर्क थियो।
शासन-प्रशासनमा बराबरको पहुँच तथा विकासमा समेत बराबरीको हिस्सेदारी प्राप्तिका लागि आफूहरुको आगामी प्रयास रहने भन्दै नेता यादवले यसका लागि स्थानीय जनताले पनि खबरदारी गर्नुपर्ने सुझाए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1749541695.jpg)
-1749539455.jpg)
-1749384056.png)
