चितवन- माओवादी केन्द्रका अध्यक्ष पुष्पकमल दाहाल 'प्रचण्ड'ले निर्वाचनमा जनताले वाम गठबन्धनप्रति देखाएको समर्थन आफूहरुका लागि ठूलो जिम्मेवारी भएको बताएका छन्।
दाहालले जनताले सुम्पेको जिम्मेवारी गम्भीरताका साथ आत्मसात् गर्ने र जनअपेक्षा अनुसार आफूहरुलाई अग्निपरीक्षामा खरो उतार्ने समेत दाहालले प्रतिबद्धता व्यक्त गरे।
चितवनबाट निर्वाचित प्रतिनिधिसभा र प्रदेशसभा सदस्यका लागि नेपाल पत्रकार महासंघ चितवन शाखाले आयोजना गरेको शुभकामना कार्यक्रममा अध्यक्ष दाहालले वाम गठबन्धन संविधानमा भएको व्यवस्थाभन्दा बाहिर नजाने बताए। वामपन्थीले जितेपछि देशमा अर्कै केही हुन्छ भन्ने प्रचार गलत भएको भन्दै उनले संविधानको मर्म र भावनाअनुसार नै देशलाई नेतृत्व दिने बताए।
देशमा राजनीतिक स्थायित्व, आर्थिक विकास र समृद्धिको मुख्य एजेन्डालाई प्रमुखता दिएर नै वाम गठबन्धन बनाएको र जनताले त्यसलाई अनुमोदन गरेको उनलेः उल्लेख गरे।
'जनताको अपेक्षाअनुसार वामपन्थीको सरकारले राजनीतिक स्थायित्व प्रदान गर्छ', उनले भने, 'आर्थिक विकास र समृद्धिको नयाँ यात्रातिर देशलाई डोर्या उनेछौं।'
सुशासन, भ्रष्टाचार नियन्त्रण जनताको प्रमुख आकांक्षा भएको भन्दै उनले थपे, 'स्थायित्व र सुशासन दिन्छौं, आर्थिक समृद्धिततर्फ देशलाई लैजान्छौं भन्ने कुरा जनतासँग संकल्प गरेका थियौं, यसलाई नेपाली जनताले उत्साहजनक ढंगबाट अनुमोदन गरेका छन्।'
चितवनको विकास र समृद्धिका लागि जनतासमक्ष प्रतिबद्धता गरेका विषयमा दृढतापूर्वक उभिने समेत उनले वाचा गरे।
चितवन क्षेत्र नम्बर ३ बाट प्रतिनिधिसभा सदस्यमा निर्वाचित दाहालले चितवनमा निर्वाचन लड्दा पहिलो पटक निर्वाचन लडेजस्तो महसुस भएको बताए। अहिलेको निर्वाचनमा चितवनका जनताको नजिकबाट भावना बुझ्न कोसिस गरेको उनको भनाइ थियो। रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
_9DjWlLHwUU-1748326423.jpg)
-1749384056.png)
