राजविराज- प्रतिनिधिसभातर्फ ४ र प्रदेशसभाका ८ गरी १२ सिटमध्ये सप्तरीमा मधेसी गठबन्धनले ८ स्थानमा विजय हासिल गरेको छ। नेपाली कांग्रेस र नेकपा एमालेले २/२ सिट सुरक्षित गरेका छन्।
प्रतिनिधिसभातर्फ क्षेत्र नम्बर १, २ र ३ मा मधेसी गठबन्धनका उम्मेदवारहरु क्रमशः संघीय समाजवादी फोरम नेपालका डा सूर्यनारायण यादव, सोही पार्टीका अध्यक्ष उपेन्द्र यादव र क्षेत्र नम्बर ३ मा राजपाका उम्मेदवार चन्द्रकान्त चौधरी विजयी भएका छन्। क्षेत्र नं. १ मा विजयी डा यादवले २१ हजार ७ सय १२ मत प्राप्त गरे भने उनका प्रतिद्वन्द्वी वाम गठबन्धनका माओवादी उम्मेदवार अशोक कुमार मण्डल (अमर) ले १८ हजार २ सय २५ मत प्राप्त गरी दोस्रो स्थानमा चित्त बुझाए। उनी दोस्रो संविधानसभा निर्वाचनमा सप्तरी २ बाट निर्वाचित भएका थिए।
क्षेत्र नम्बर २ मा संघीय समाजवादी फोरम नेपालका अध्यक्ष उपेन्द्र यादव २१ हजार ६२० मत ल्याई विजयी भएका छन्। उनका प्रतिद्वन्द्वी वाम गठबन्धनका माओवादी उम्मेदवार उमेश यादवले ११ हजार ५८० मत पाए। दोस्रो संविधानसभा निर्वाचनमा सप्तरी क्षेत्र नं. ३ बाट निर्वाचित यादव केपी ओलीको सरकारमा सिँचाइमन्त्री समेत भएका थिए। यसैगरी राजपाको सह–महामन्त्री त्यागेर स्वतन्त्र उम्मेदवारी दिएका जयप्रकाश ठाकुरले भने ९ हजार ४ सय ५८ मतमा चित्त बुझाएका छन्।
प्रतिनिधिसभा निर्वाचन क्षेत्र नम्बर ३ मा राजपाका चौधरीले २२ हजार ५ सय ८४ मत प्राप्त गरी नेपाली कांग्रेसका जिल्ला सभापति दिनेश कुमार यादवलाई हारको स्वाद चखाएका छन्। १९ हजार ४ सय १ मत प्राप्त गरी हार बेहोरेका यादव दोस्रो संविधानसभा निर्वाचनमा पनि क्षेत्र नं. ३ बाटै पराजित भएका थिए।
यता, प्रतिनिधिसभा सदस्यमा निर्वाचित चौधरी स्थानीय तह निर्वाचनमा डाकनेश्वरी नगरपालिकाको मेयरमा पराजित उम्मेदवार हुन्। लामो समयदेखी नेपाली कांग्रेसको राजनीति गर्दै आएका उनले पार्टीले टिकट नदिएपछि मेयरमा स्वतन्त्र उम्मेदवारी दिएका थिए। राष्ट्रिय जनता पार्टी नेपालका उम्मेदवार शिवनारायण साह ३ हजार ८ सय ८० मत ल्याई विजयी भएका थिए भने चौधरीले पराजय भोग्नुपरेको छ।
क्षेत्र नं. ४ मा दोस्रो संविधानसभा निर्वाचनमा विजयी भई युवा तथा खेलकुद राज्यमन्त्री रहेका तेजुलाल चौधरीले दोस्रो पटक बाजी मारेका छन्। २०७० को संविधानसभा निर्वाचनमा उनी कांग्रेसबाटै निर्वाचित भएका थिए। चौधरीले २४ हजार १ सय १३ मत पाएका छन् भने प्रतिद्वन्द्वी राजपाका वरिष्ठ उपाध्यक्ष मृगेन्द्रकुमार सिंह यादवले १४ हजार ८ सय ८६ मत ल्याई पराजित भएका छन्।
प्रदेशसभातर्फ यस्तो रह्यो नतिजा
प्रदेशसभातर्फ क्षेत्र नम्बर १ (क) र ४ (क) मा नेकपा एमालेले जित निकालेको छ। १ (क) बाट एमालेका स्थायी कमिटी सदस्य तथा २ नं प्रदेश इन्चार्ज सत्यनारायण मण्डल तथा ४ (क) बाट एमालेका जिल्ला अध्यक्ष गोविन्दबहादुर न्यौपाने निर्वाचित भएका छन्। ११ हजार ३ सय २ मत ल्याएका मण्डलले राजपाका महासचिव राजकुमार लेखीलाई पराजित गरे। लेखीले ९ हजार २५२ मत पाए। यसैगरी, १५ हजार ११३ मतसहित विजयी भएका न्यौपानेले नेपाली कांग्रेसका सीताराम साहलाई पराजित गरे। साहले ११ हजार ३९५ मत पाएका छन्।
क्षेत्र नम्बर १ (ख), २ (ख) र ३(ख) मा राजपाले जितेको छ । १ (ख) मा राजपाका उपाध्यक्ष नवलकिशोर साह १३ हजार ६ सय ४७ मत प्राप्त गरी विजयी भएका छन्। उनले नेपाली कांग्रेसका बद्री महात्मान यादवलाई ७ हजार ३ सय १४ मतान्तरले पराजित गरे।
२ (ख) मा राजपाका महासचिव मनिष सुमनले वाम गठबन्धनका माओवादी उम्मेदवार महेश यादवलाई पराजित गरे। सुमनले ८ हजार ९३९ र यादवले ४ हजार ९८६ मत ल्याएका छन्। क्षेत्र नं ३ (ख) मा राजपाका बिवेश्वर यादव (बिक्की) निर्वाचित भएका छन्। यादवले १० हजार ३ सय २८ मत प्राप्त गरे भने उनका प्रतिद्वन्द्वी नेपाली कांग्रेसका भगवतीप्रसाद यादवले ६ हजार २ सय १२ मत प्राप्त गरेका छन्।
यस्तै, संघीय समाजवादी फोरम नेपालले २ (क) र ४ (ख) गरी दुई प्रदेशसभा सदस्यमा सिट सुरक्षित गरेको छ।
२ (क) मा वाम गठवन्धनका माओवादी उम्मेदवार सरोज मण्डललाई २ हजार ९७७ मतान्तरले हराउँदै शैलेन्द्र साह प्रदेशसभामा निर्वाचित भएका हुन्। उनले १० हजार ५ सय ७० मत पाए।
प्रदेशसभा निर्वाचन क्षेत्र नं. ४ (ख) बाट अभिषेक यादव निर्वाचित भएका छन्। उनले ९ हजार ६ सय ५ मत तथा प्रतिद्वन्द्वी नेपाली कांग्रेसका विवेकानन्द झाले ७ हजार ३ सय ३६ मत प्राप्त गरे।
नेपाली कांग्रेसले भने प्रदेशसभातर्फ १ सदस्यमा चित्त बुझाउनुपरेको छ। ३ (क) मा कांग्रेसका उम्मेदवार मोहम्मद समीम ११ हजार ६ सय २८ मत ल्याई विजयी भएका छन्। उनले राजपाका दिनेश यादवलाई १ हजार ६४९ मतले पराजित गरे।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
