दुवै पद नओगट्न दिएको सुझावविपरीत जुकरबर्ग पुनः फेसबुकको अध्यक्ष तथा सिइओ

सूचना-प्रविधि

नेपाल लाइभ आइतबार, जेठ १९, २०७६ ०६:१९

सान फ्रान्सिस्को- मार्क जुकरबर्गलाई फेसबुकको अध्यक्षमा पुनः चयन गरिएको छ।

यससँग फेसबुकका कतिपय लगानीकर्ताले उनलाई फेसबुक सञ्चालक समितिको अध्यक्ष र प्रमुख कार्यकारी अधिकृत (सिइओ)मा रहँदा यसका गतिविधिलाई हेर्न समस्या भएको र यसका कारण फेसबुकको साखमा समस्या आउनसक्ने विचार राख्दै अध्यक्ष पद छाड्न सुझाव दिएका थिए।

फेसबुकको वार्षिक साधारण सभामा गत बिहीबार भएको थियो। साधारण सभाले जुकरबर्ग प्रमुख कार्यकारी अधिकृत तथा सञ्चालक समितिका अध्यक्ष दुवै रहिरहने गरी अनुमोदन गरेको हो।

फेसबुकमा जुकरबर्गको ६० प्रतिशत सेयर छ र उनले मतदानमा आफैँले आफूविरुद्ध मत हालेको भए मात्रै हार्ने सम्भावना रहेको थियो। साधारणसभाको परिणामले जुकरबर्ग थप समय पनि दुवै जिम्मेवारी सम्हाल्न तयार रहेको देखिएको छ।

जुकरबर्गलाई अध्यक्षबाट हटाउन खोज्ने लगानीकर्ताहरूमध्येका एक ७० लाख डलर बराबरको सेयर भएको ट्रिलियम एसेट म्यानेजमेन्ट पनि हो।

'संसारको एउटा विशाल कम्पनीमा अहिले जुकरबर्गले दुईवटा महत्वपूर्ण पद ओगट्नुभएको छ। यदिे प्रमुख कार्यकारी अधिकृतको भूमिकामा केन्द्रित भएर अरूलाई स्वतन्त्रतापूर्वक सञ्चालक समितिको अध्यक्षता गर्न दिए त्यो धेरै राम्रो स्थिति हुन्छ,' ट्रिलियमका वरिष्ठ उपाध्यक्ष जोनस क्रोनले भने।

तर, जुकरबर्गले गत अप्रिलमा आफ्नो नेतृत्वको बचाउ गर्दै भनेका थिए, 'हामीले त्रुटिबाट सिकेका छौँ कि छैनौँ, त्यसबाट मानिसहरूले हामीलाई उत्तरदायी बनाउनुपर्छ भन्ने मलाई लाग्छ।'

उनले साधारण सभापछि संछिप्त प्रतिक्रिया दिँदै भने, 'अबका दिनमा फेसबुकले आफ्ना प्रयोगकर्ताहरूको तथ्याङ्कलाई थप गोप्य बनाउने प्रयास गर्नेछ।' रासस/एएफपी

नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।

प्रतिक्रिया दिनुहोस्

नेपाल लाइभ Nepal’s independent digital media. Offers quick current affairs update, analysis and fact-based reporting on politics, economy and society.http://nepallive.com

लेखकबाट थप

बनेका सबै सरकार बलिया नै हुन्छन् : महामन्त्री थापा

तीन वटा वैकल्पिक बाटो प्रयोग गरेर खुलाइँदैछ पूर्व–पश्चिम राजमार्ग

नवलपुरको विनयी खोला पुल भासियो, पूर्व-पश्चिम राजमार्ग बन्द