काठमाडौं– प्रधानमन्त्री कप एकदिवसीय क्रिकेट प्रतियोगिताअन्तर्गत समूह 'बी' मा तीन टिमको सेमिफाइनलमा सम्भावना भएको छ। शनिबार भएको खेलमा त्रिभुवन आर्मीलाई नेपाल पुलिसले हरायो भने प्रदेश २ ले प्रदेश १ लाई पराजित गर्यो।
समूह बीमा सबै खेल खेलेको आर्मीको ६ अंक छ भने अन्तिम खेल खेल्न बाँकी पुलिस ६ र प्रदेश २ को ४ अंङ्क छ। अन्तिम खेलमा पुलिस र प्रदेश २ भिड्दैछन्। पुलिसले जितेमा पुलिस र आर्मी सेमिफाइनलमा पुग्नेछन्। प्रदेश २ ले जिते ३ मध्ये २ टिम रनरेटको आधारमा अन्तिम चारमा पुग्नेछन्।
शनिबार कीर्तिपुरस्थित त्रिवि मैदानमा भएको खेलमा पुलिसले आर्मीलाई ५० रनले हरायो। पहिले ब्याटिङ गरेको पुलिस ४८.४ ओभरमा १ सय ६१ रनमा अलआउट भयो। पुलिसका लागि मन्जित श्रेष्ठले नटआउट ३६ रन जोडे। आरिफ शेखले ३४ र दीपेन्द्रसिंह ऐरीले २९ रन बटुले। बलिङमा आर्मीका सहाब अलामले ४ विकेट लिए।
१ सय ६२ रनको लक्ष्य पछ्याएको आर्मी १११ रनमै अलआउट भयो। आर्मीका लागि हरि चौहानले ३४ रन जोडे। बलिङमा पुलिसका ललितनारायण राजवंशीले ३ विकेट लिए भने आरिफ र दीपेन्द्रले २–२ विकेट हात पारे।
अर्को खेलमा प्रदेश २ ले प्रदेश १ लाई १६१ रनले हरायो। पहिले ब्याटिङ गरेको प्रदेश २ ले ९ विकेटको क्षतिमा २६५ रन जोड्यो। उसका लागि सुरज पटेललर् नटआउट ७८ रन जोडे। रासिद खानले ४७ रनको योगदान दिए। हरिशंकर साहले ३१ र हसिम अन्सारीले २० रब बटुले। बलिङमा प्रदेश १ का पुष्प थापाले ३ विकेट लिए भने सरोज बस्नेतको नाममा २ विकेट रह्यो।
२६६ रनको लक्ष्य पछ्याएको प्रदेश १ ले २८.५ ओभरम अलआउट हुँदा १०४ रन मात्र जोड्न सक्यो। उसका लागि मिनास थापाले सबैभन्दा बढी ३६ रन र सनी पुनले २९ रन बटुले अन्यले दोहोरो अंकमा रन बटुल्न सकेनन्। बलिङमा प्रदेश २ का कुमार थापाले ७ विकेट लिए। उनले ८ ओभरमा २ मेडन फ्याँक्दा २२ रन खर्चिए।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
