काठमाडौं- नेपाली आधुनिक संगीतकी मूर्धन्य संगीतकार शान्ति ठटालले पलेँटी शृङ्खलामा आफ्ना सृजनाहरू प्रस्तुत गरेकी छिन्।
कालिकास्थानस्थित नेपालयको ‘आर’शालामा भएको पलेँटीमा उनले तयार गरेका करिब डेढ दर्जन गीत समेटिएका थिए। सन् २००६ देखि प्रायः वर्षेनी पलेँटीमा प्रस्तुत भएकी शान्तिले यस शृंखलामा भने धेरैजसो नयाँ गीत छानेकी थिइन्। ठटाललाई उनकै शिष्याहरू विमला सेन्चुरी प्रधान र अञ्जली प्रधानले गायनमा साथ दिएका थिए।
कार्यक्रमलाई पलेँटीका संयोजक तथा संगीतकार आभासले ठटालसँगको सांगीतिक संगतलाई स्मरण गरेका थिए। ठटाललाई मालती फूलसँग तुलना गर्दै आभासले उनलाई ‘संगीत-मल्लिका’को विशेषणले सम्बोधन गरेका थिए।
कार्यक्रमको थालनी भजन गाएर गरिएको थियो। श्याम प्रधानको शब्द रचनाबाट कार्यक्रम थाल्दै आभासले भने- ‘शान्ति ठटालसँग मैले आध्यात्मिक वार्ता पनि गरेको छु। उहाँमा प्रगतिशील आध्यात्मिकताको चिन्तन छ। भजनको माध्यमले मानिसमा नैतिक सोच निर्माण गर्ने प्रयत्न गर्नु प्रगतिशील चिन्तन हो।'
भजनपछि गीतकार रत्न शमशेर थापाद्वारा रचित ३ वटा गीत प्रस्तुत गरिएका थिए। गायिका विमला सेञ्चुरी प्रधानले ‘तिर्सना छल्किन्छ’ र ‘मलाई चोट फेरि’मा स्वर दिएकी थिइन्। अञ्जली प्रधानले भने ‘आँखा आँखामा वैँशको मात’ सुनाएकी थिइन्।
कार्यक्रममा शान्ति ठटालले तीन हप्ता पहिले काठमाडौं आएर सिर्जना गरेको संगीतसमेत प्रस्तुत गरेकी थिइन्। गजल शैलीको नयाँ गीतका बारेमा आभास पुनः संवादमा जोडिए- ‘शान्ति ठटाल दिदीसँगको सांगीतिक सहकार्यको लोभले हो मैले दुई हप्ता पहिले उहाँले बजाउँदै गरेको हार्मोनियम माथि केही गीतका शब्द छोडेर हिंडेको थिएँ। उहाँले भोलिपल्टै त्यसमा भरेको संगीत सुनाउनु भयो। उहाँको क्षमता साँच्चै अद्भूत छ। शान्ति दिदीले यति छिटै यति स्तरीय धुन भरेकोमा म चकित भएको छु।'
बिमलाले स्वर दिएको उक्त गीत थियो-
जीवन चुपचाप गुजारेँ त के भो?
तिमीले जित्यौ म हारेँ त के भो?
शान्ति ठटाललाई यसपाली पलेँटीले संगीतकारको रुपमा मात्र प्रस्तुत गर्न खोजे पनि प्रशंसकहरूको अनुरोधमा उनले गीत नगाई धर पाइनन्। ‘हुन त म गायनबाटै संगीतमा प्रवेश गरेकी हुँ। गाउन मन पनि लाग्छ तर अब गाह्रो हुन्छ।,' ८ दशक पार गरिसकेकी ठटालले सुनाइन्- ‘नझार आँखाबाट कसैका प्रीतहरू’।
उनको स्वर सुनेसँगै ‘आर’शाला तालीले गुञ्जियो। त्यो गीतको समापनसँगै श्रोताको उत्साह थप चुलियो र दर्शकदिर्घाबाट पुनः फर्माइस् भयो- ‘खै त तपाईंको ‘एन्थम’ अर्थात ‘सम्हालेर राख’?
‘आज त एउटा मात्र पो गाउँ भनेको’ भन्दै शान्ति फेरि हार्मोनियमसँग जोडिइन्। र स्वर दिइन्- ‘सम्हालेर राख’।
‘आर’शाला फेरि तालिले गुन्जायमान भयो। गायन सक्नासाथ शान्ति ठटालको मुहारमा झल्किएको हाँसोले पलेँटीको मञ्च थप खुलेको लाग्थ्यो।
शान्ति ठटाल संगीतका चौतर्फी विधामा सिद्धहस्त संगीतकर्मी हुन्। उनले संगीत भरेका चलचित्रका गीत नेपाली संगीत संसारमा निकै लोकप्रिय मानिन्छन्। चलचित्रका गीत प्रस्तुत गर्ने क्रममा संगीत भरेर पनि आन्तरिक कारणले रेकर्ड हुन नपाएको रचना पनि यसपटकको पलेँटीमा समेटिएको थियो।
गायिका अञ्जली प्रधानले सुनाएको गीत ‘कसैलाई सम्झिदिन्छु फूल देखे वनभरि’ गीतकार ईश्वर बल्लभले गुरुप्रसाद मैनालीको कथा ‘बिदा’मा आधारित चलचित्रका निम्ति लेखेका रहेछन्। शान्ति ठटालले भनिन्- ‘चलचित्रका निम्ति कवि ईश्वर बल्लभले लेख्नुभएको एउटा गीत र भजनमा धुन भरेकी थिएँ। त्यहीताका म जागिरे भएर सिक्किमतिर लागेँ र त्यस चलचित्रमा पछि दिब्य खालिङले संगीत भरे।'
त्यसपछि गायिका बिमला सेञ्चुरीले चलचित्र ‘बाँच्न चाहनेहरू'का २ लोकप्रिय गीत ‘नयाँ-नयाँ घामको किरण’ र ‘मिठो-मिठो तिम्रो साथ मिठो’ प्रस्तुत गरिन्।
शशी ठटालले लेखेको लोकप्रिय गीत ‘मायालुले सम्झे कि कसो’ पलेँटीको अन्तिम प्रस्तुति बन्यो। सो क्रममा ‘आर’शालामा उपस्थित दर्शकका ओठहरू पनि ठटालको आजाव सँगसँगै चलमलाएका थिए।
आगामी पलेँटीमा शान्ति ठटालले नै धुन भरेको महाकवि देवकोटाको कृति ‘मुनामदन’ प्रस्तुत हुनेछ।
कार्यक्रममा ठटाललाई किबोर्डमा दिनेश रेग्मी, तबलामा सन्देश महर्जन, गीतारमा सुरज प्रधान, प्रकसनमा सुन्दर महर्जन र बाँसुरीमा बलराम समालले साथ दिएका थिए। शान्ति ठटालसँगको पलेँटी शनिबार र आइतबार पनि जारी रहनेछ।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1764146706.png)
