– विपुल अधिकारी/रासस
पाँचथर- पाँचथरको मिक्लाजुङ–३ आरुबोटेमा सोमबार राति दुई परिवारका ९ जनाको विभत्स तरिकाले हत्या गरियो। उक्त घटना पाँचथरको २६ वर्षपछि भएको ठूलो र उस्तै प्रकृतिको हत्याकाण्ड हो। साविक फिदिम–१३ लुङरुपास्थित टिम्बुरेमा पनि एकै परिवारका ५ जनाको ज्यान लिने गरी हत्याकाण्ड भएको थियो।
विसं २०५० मा भएको सो घटना ‘टिम्बुरे हत्याकाण्ड’को रुपमा चर्चित छ। उक्त घटनामा टिम्बुरेस्थित एक दुलाल परिवारमा ५ जनाको ज्यान गएको थियो। त्यसको २६ वर्षपछि आरुबोटेमा ९ जनाको विभत्स हत्या भएको हो।
टिम्बुरे हत्याकण्डमा कुवेर दुलाल, कुवेरकी श्रीमती सरस्वती रिजाल, छोरी कृष्ण दुलाल, छोरा उमेश र उद्वव दुलाल गरी (५ जना) को ज्यान गएको थियो। लुङरुपा–९ का कुवेर दुलाललाई छिमेकी नाँगीन गाविस वडा नम्बर ३ सेजेपामा र उनकी श्रीमती सरस्वतीसँगै छोराछोरी कृष्ण, उमेश र उद्ववलाई घरैमा एकसाथ खुकुरी प्रहार गरी हत्या गरिएको थियो।
उक्त घटनामा छोरी ज्ञानु र मनु बाँचेका थिए। मनुको भने विसं २०७३ मा अमेरिकामा हृदयघातका कारण निधन भएको थियो। ज्ञानु अहिले अमेरिकामा छिन्।
बाबुआमा र भाइबहिनीको हत्या भएका बखत मनु नाँगीनको पिपलबोटे उच्च माविमा पढ्दै गरेकी र ज्ञानु इटहरीस्थित आफन्तको घर गएकी थिइन्। दुलाल परिवारको पनि खुकुरी प्रहार गरी हत्या भएको थियो। परिवारभित्रै आपसी लेनदेन र राजनीतिक विषयमा विवाद भएपछि उनीहरुको हत्या भएको थियो।
आरुबोटे हत्याकाण्ड
टिम्बुरेमा जस्तै आरुबोटेमा पनि २ परिवारको सोमबार राति खुकुरी प्रहार गरी हत्या भएको थियो। पाँचथर प्रहरी प्रमुख प्रहरी नायब उपरीक्षक नरेन्द्र कुँवरका अनुसार दुई परिवारका ८ वर्षीया बालिकादेखि ७५ वर्षीया वृद्धसम्मको हत्या भएको हो।
७५ वर्षीय बमबहादुर फियाकको घरमा निजकै श्रीमती ७५ वर्षीया पुर्चीमाया फियाक, छोरी वर्ष ३५ की मनकुमारी फियाक, नातिनी वर्ष १० कि आसिकाकुमारी खजुमलाई पालैपालो धारिलो हतियार प्रहार गरी हत्या गरिएको प्रहरी नायब उपरीक्षक कुँवरले बताए।
यसैगरी सोही स्थान बस्ने ३४ वर्षीय धनराज शेर्मा, निजकी श्रीमती वर्ष ३५ की जस्मिता फियाक शेर्मा, छोरी १२ वर्षीया युहाना शेर्मा, १० वर्षीया मुना शेर्मा र ६ वर्षीया इच्छा शेर्मासमेतको हत्या गरेको कुँवरको भनाइ छ।
हत्याको अनुसन्धान जारी
आरुबोटेमा हत्या भएका मृतकको शव परीक्षणका लागि विपी कोइराला प्रतिष्ठान लगिएको इलाका प्रहरी चौकी रबिका प्रहरी निरीक्षक तेजनारायण यादवले बताए।
यादवका अनुसार काठमाडौँबाट आएको नेपाल प्रहरीको केन्द्रीय अनुसन्धान ब्युरो (सिआइबी)को विशेष टोलीले घटनाको आज पनि अनुसन्धान जारी राखेको छ। मङ्गलबार हत्या भएका बमबहादुरका कान्छा ज्वाइँ मानबहादुर माखिमको पनि झुण्डिएको अवस्थामा शव फेला परेको थियो। हत्या माखिमले नै गरेको हुनसक्ने प्रहरीको आशङ्का छ।
हत्या भएको करीब ५ किलोमिटरको दूरीमा उक्त शव फेला परेको प्रहरी निरीक्षक यादवको भनाइ छ। शव झुण्डिएको स्थानको २ किलोमिटर अगाडि एउटा झोला भेटिएको छ। उक्त झोलामा रगतले लतपतिएको कपडा र रगतले लतपतिएको एक थान खुकुरीसमेत फेला परेको यादवको भनाइ छ।
नेपाललाइभमा प्रकाशित सामग्रीबारे कुनै गुनासो, सूचना तथा सुझाव भए हामीलाई nepallivenews@gmail.com मा पठाउनु होला।