सोलुखुम्बु- बिहीबारसम्म ६५ आरोहीले सगरमाथाको शिखरमा पाइला टेकेका छन्। मौसम अनुकूल भएपछि यो यामको आरोहण मंगलबारदेखि सुरु भएको हो।
बिहीबार मात्रै २८ ले सगरमाथाको सफल आरोहण गरेको पर्यटन विभागका निर्देशक मीरा आचार्यले जानकारी दिइन्। आचार्यका अनुसार पाँच समूहका १२ ले ल्होत्से आरोहण गरेका छन् भने ४३ ले कञ्चनजंघा र ३२ जनाले मकालु हिमालको सफल आरोहण गरेका छन्।
पर्यटन विभागबाट सगरमाथा आरोहणका लागि ४१ समूहका ३७८ जनाले अनुमति पाएका छन्। तीमध्ये अधिकांश आरोहणका लागि पालो पर्खेर बसिरहेका छन्। ल्होत्से हिमाल आरोहणका लागि ६ समूहका ६६ ले अनुमति पाएका छन्।
बंगालको खाडीबाट उठेको सामुद्री आँधी ‘फानी’का कारण केही समयअघि आरोहणमा केही समस्या आउने संकेत देखिए पनि अहिले त्यहाँको मौसम सामान्य रहेको आधार शिविरबाट सम्पर्क अधिकृत ज्ञानेन्द्र श्रेष्ठले जानकारी दिए। बिहीबार बिहान आधार शिविरमा रहेका नेपाल सरकारका सम्पर्क अधिकृत श्रेष्ठसँगको टेलिफोन संवादका बेला एकै दिन सयभन्दा बढीले आरोहण गर्ने आँकलन गरेका थिए।
अहिले आधार शिविरदेखि क्याम्प चारसम्म मानिसको चहलपहल बढेको छ।
सन् १९५३ मा पहिलोपटक सगरमाथाको चुचुरोमा मानव पाइला पुगेपछि आरोहण सुरु भएको हो। विभिन्न उद्देश्यसहित आरोहणमा जाने आरोहीबाट नेपाल सरकारले यो वर्ष करिब रु ४० करोडभन्दा बढी राजस्व संकलन गरेको छ। तस्बिर : lonelyplanet.com
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791703930-1791704860.jpg)
-1786602170.png)
