रसुवा- रसुवागढी भन्सार कार्यालय टिमुरेले चालु आर्थिक वर्षको भदौ महिना पूरा नहुँदै लक्ष्यभन्दा २४ प्रतिशतभन्दा बढी राजस्व असुली गरेको छ।
२९ करोड राजस्व असुली लक्ष्य राखेको कार्यालयले भदौ महिनाको १० दिन बाँकी छँदै ३६ करोड राजस्व असुली गरेको भन्सार प्रमुख केदार पनेरुले बताए। पछिल्लो एक हप्तामा २३ करोड राजस्व असुली भएको छ भने बुधबार एकै दिन ५ करोड ६९ लाख राजस्व असुली भएको उनले जानकारी दिए।
पछिल्लो समय टिमुरेले दैनिक करोड राजस्व असुली गर्दै आएको छ। चालू आवको पहिलो महिनामा १९ करोड घाटा बेहोरेको कार्यालयले यो महिनामा उक्त घाटा रकम उठाउने बताएको छ। साउनमा २५ करोड राजस्व असुली राखेको कार्यालयले ६ करोड मात्र असुली गरेको थियो।
चिनियाँ भन्सार मूल्य वृद्धि र नेपालतर्फ व्यापारीहरुले समयमै भन्सार नगर्दा ठूलो मात्रामा राजस्व असुलीमा गिरावट आएको हो।
रसुवागढी भन्सारमा अहिले ३ सयभन्दा बढी मालबाहक सवारी रहेको रसुवा भन्सारले जनाएको छ।
पछिल्लो समय अन्तर्राष्ट्रिय नाका घोषणा भएको रसुवागढीबाट तस्करी बढेको जनाउँदै कार्यालयले सुरक्षाकर्मीसँगको समन्वयमा सुरक्षा व्यवस्था कडा पारेको छ। 'यो नाकाबाट तस्करी बढेसँगै भन्सार प्रशासन सजक भएको छ,' प्रमुख पनेरुले भने, 'अहिले खाली ठाउँमा अधिकृतको नेतृत्वमा सुरक्षाकर्मी टोली खटिएका छन्। भिआइपी तथा चिनियाँ व्यक्तिले प्रयोग गर्ने गाडीमा समेत विशेष निगरानी भइरहेको छ।'
तातोपानी नाका बन्द भएपछि रसुवागढी नाकाबाट निकासी, पैठारी बढेसँगै भन्सार असुली ह्वात्तै बढेको हो। कार्यालयले निकासी, पैठारी, महसुल, सेवा शुल्क, कृषि सुधार, अन्त शुल्क भ्याट लगायतका शुल्क बापत भन्सार असुली गर्ने गर्छ।
अहिले केरुङबाट नेपालतर्फ रेडिमेड कपडा, जुत्ता, चप्पल, स्याउ, लगायतका सामग्री भित्रिने गरेका छन् भने नेपालबाट जडिबुटी, चाउचाउ लगायतका सामग्रीहरु निकासी हुने गरेका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1781580295.jpg)
-1786602170.png)
-1789383080.png)
