काठमाडौं- प्रदेश तथा प्रतिनिधिसभा निर्वाचनका लागि उम्मेदवार बनेका चर्चित नेताहरु आफैंलाई भोट हाल्नबाट वञ्चित भएका छन्। मतदाता नामावली रहेको स्थानबाटै मताधिकार प्रयोग गर्नुपर्ने कानुनका कारण उनीहरुले आफैंलाई भोट हाल्न नपाएका हुन्।
आज ४५ जिल्लामा दोस्रो चरण अन्तर्गत प्रदेश र प्रतिनिधिसभाको निर्वाचन भइरहेको छ।
मतदाता नामावली रहेको स्थानबाट फरक स्थानबाट उम्मेदवारी दिएकाले कांग्रेस, एमाले, माओवादी केन्द्र, राजपा र संघीय समाजवादी फोरमका शीर्ष नेताले आफैंलाई भोट हाल्न पाउँदैनन्।
प्रतिनिधिसभा निर्वाचन ऐन, २०७४ को दफा ३८ को उपदफा १ मा भनिएको छ- 'कुनै गाउँपालिका वा नगरपालिकाको कुनै वडाको मतदाता नामावली नाम दर्ता भएका मतदाताले सोही गाउँपालिका वा नगरपालिकाको सोही वडाको निजलाई तोकिएको मतदान केन्द्र मतदान गर्नुपर्नेछ।'
कांग्रेसका अर्थमन्त्री रहेका ज्ञानेन्द्रबहादुर कार्की, प्रधानमन्त्रीपत्नी आरजु देउवा र नेता शंकर भण्डारीले आफैंलाई भोट हाल्न पाएनन्। २३ वर्षपछि राजनीतिमा फर्किएका कांग्रेस नेता दमननाथ ढुंगानाले पनि आफैंलाई मत हाल्न पाएनन्।
भोजपुरमा मतदाता नामावली रहेका अर्थमन्त्री कार्की सुनसरी ४ बाट चुनावी मैदानमा छन्। त्यसैले उनले आफूलाई भोट हाल्न पाएनन्।
यस्तै, डडेल्धुराको गन्यापधुरा गाउँपालिकाको असीग्राममा मतदाता नामावली दर्ता गराएकी आरजु राणा कैलाली ५ बाट चुनावी मैदानमा छिन्। उनी पनि आफूलाई मत हाल्न पाइनन्।
कांग्रेसकै अर्का नेता शंकर भण्डारी यो निर्वाचनमा तनहुँ २ बाट प्रतिनिधिसभा सदस्यका लागि प्रतिस्पर्धामा छन्। भण्डारीको मतदाता नामावली भानु नगरपालिका तनहुँ १ मा छ।
दमननाथ ढुंगानाको मतदाता नामावली काठमाडौं क्षेत्र नम्बर २ मा रहे पनि उनी भक्तपुर २ बाट चुनावी मैदानमा छन्।
आफैंलाई भोट हाल्न नपाउने एमाले नेताहरुमा अध्यक्ष केपी ओली, वरिष्ठ नेता माधवकुमार नेपाल र भानुभक्त ढकाल लगायत छन्।
भक्तपुरको सूर्यविनायक नगरपालिकामा मतदाता नामावली दर्ता गराएका ओली झापा ५ बाट प्रतिस्पर्धामा छन्। मतदाता नामावली रौतहटको गौर नगरपालिकामा रहेको एमालेका अर्का नेता नेपालले काठमाडौं २ लाई आफ्नो चुनावी क्षेत्र बनाएका छन्।
तेह्रथुममा मतदाता नामावली रहेको भानुभक्त ढकाल भने मोरङ क्षेत्र नम्बर ३ बाट चुनावी मैदानमा छन्।
माओवादी केन्द्रका ४ नेताले पनि आफैंलाई भोट हाल्न पाएनन्। विनाविभागीय मन्त्री रहेका कृष्णबहादुर महराको मतदाता नामावली रोल्पामा छ। उनी दाङ २ बाट चुनावी मैदानमा छन्। रोल्पामा पहिलो चरण अन्तर्गत मंसिर १० गते नै निर्वाचन भइसकेको छ।
काठमाडौं ६ मा मतदाता नामावली दर्ता गराएका हितमान शाक्य काठमाडौँ १० बाट चुनावी मैदानमा छन्। रुकुमको पश्चिम क्षेत्रमा मतदाता नामावली भएका नेता अनिल शर्मा काठमाडौं १ बाट उम्मेदवार भएकाले आफैंलाई भोट हाल्न पाएनन्। रुकुममा भने मंसिर १० गते निर्वाचन भइसकेको छ।
आफैं उम्मेदवार बनेर आफैंलाई मत हाल्न नपाउनेको सूचीमा मधेसवादी दलका तीन नेता पनि छन्।
राजपा नेपालका अध्यक्ष मण्डलका संयोजक महन्थ ठाकुर, अध्यक्ष मण्डलका सदस्य राजेन्द्र महतो र संघीय समाजवादी फोरम नेपालका अध्यक्ष उपेन्द्र यादव आफैंलाई मत हाल्न वञ्चित भए।
मतदाता नामावली सर्लाहीको बलरा नगरपालिकामा रहेका महन्थ ठाकुरको उम्मेदवारी महोत्तरी ३ बाट छ। यस्तै, सर्लाहीको चन्द्रनगर गाउँपालिकाका मतदाता रहेका राजेन्द्र महतो धनुषा–३ बाट प्रतिस्पर्धामा छन्। संघीय समाजवादी फोरमका अध्यक्ष उपेन्द्र यादवले पनि आफैंलाई मतदान गर्न पाएनन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
