वीरगञ्ज- भोलि हुने प्रतिनिधिसभा तथा प्रदेशसभाको निर्वाचनमा मत हाल्न जाने मतदाताको घरदेखि मतदानस्थलसम्म सुरक्षा व्यवस्था कडा पारिएको स्थानीय प्रशासनले जनाएको छ।
मत खसाल्न जाने मतदाताले प्रयोग गर्ने बाटोभरि सुरक्षा व्यवस्था कडा पारिएकाले मतादाताले निर्धक्क तथा ढुक्क भएर मतदान गर्न सबै मतदातासँग पर्साका प्रमुख जिल्ला अधिकारी विनोदप्रकाश सिंहले आह्वान गरेका छन्।
मतदाता हिँड्ने बाटोभरि नेपाली सेना तथा प्रहरीको मोबाइल गस्ती टोलीले गस्ती गर्ने भएकाले मतदाता सुरक्षित मतदानस्थल पुगेर आफ्नो मताधिकार प्रयोग गर्न पाउने गरी सुरक्षा व्यवस्था कडा पारिएको विश्वास दिलाउँदै प्रजिअ सिंहले मतदाताको मतदान गर्ने वातावरण बनिसकेकाले उत्साहपूर्वक मतदान गर्न आग्रह गरे।
मतदान केन्द्रमा नेपाल प्रहरी, त्यसभन्दा बाहिर सशस्त्र प्रहरी र नेपाली सेना रहने गरी तीन घेरामा निर्वाचन सुरक्षा व्यवस्था मिलाइएको छ।
मतदानस्थल र वरिपरि कुनै पनि अवरोध एवं अवाञ्छित गतिविधि हुन नदिन व्यापकरुपमा सशस्त्र प्रहरीको उपस्थित बाक्लो बनाइएको मध्यक्षेत्रीय सशस्त्र प्रहरी बल पथलैयाका सशस्त्र प्रहरी नायब महानिरीक्षक कवीन्द्रमान श्रेष्ठले बताए। मतदाता हिँड्ने बाटोभरि सुरक्षा व्यवस्था कडा पारिएकाले निर्धक्क भएर मतदान गर्न उनले आग्रह गरेका छन्।
पर्सामा नेपाल प्रहरी, सशस्त्र, म्यादी तथा नेपाली सेना गरी करिब ६ हजार सुरक्षाकर्मी परिचालन गरिएको स्थानीय प्रशासनले जनाएको छ।
पर्सामा रहेका १६७ मतदानस्थलमध्ये ७३ वटा अतिसंवेदनशील भएकाले त्यस्ता मतदानस्थलमा समेत सुरक्षा व्यवस्था कडा पारिएको छ। भारतीय सीमासँग जोडिएको कतिपय मतदानस्थलमा सुरक्षा चुनौती पनि छ।
४ निर्वाचन क्षेत्र रहेको पर्सामा २ लाख ९९ हजार ५४ मतदाता रहेको जिल्ला निर्वाचन कार्यालयले जनाएको छ।रासस
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
