तस्बिर-एएनआई।
नयाँ दिल्ली- भारतीय लोकसभा चुनावअन्तर्गत आज(आइतबार) छाैटाैं चरणकाे निर्वाचन सुरु भएकाे छ। राजधानी दिल्लीसहित ६ राज्यमा ५९ सिटका लागि मतदान हुँदैछ।
उत्तर प्रदेशमा १४, हरियाणामा १०, मध्य प्रदेश र बिहारमा ८/८, दिल्लीमा ७ र झारखन्ड राज्यमा ४ सिटका लागि मतदान हुँदैछ। आइतबार हुने निर्वाचनबाट संघीय मन्त्री मेनका गान्धी, समाजवादी पार्टीका अध्यक्ष अखिलेश यादव, कांग्रेस नेता दिग्विजय सिंह र भारतीय जनता पार्टी (भाजपा) का प्राज्ञ सिंह ठाकुरसहित ९ सय ६८ उम्मेदवारको राजनीतिक भविष्यकाे फैसला हुँदैछ।
यस बाहेक भाजपाका मेनका गान्धी, वरुण गान्धी, रिता बहुगुणा जोशी, दिलीप घोष, मीनाक्षी लेखी तथा भारतीय कांग्रेसका दिग्विजय सिंह, ज्योतिरादित्य सिंधिया, शीला दीक्षित, अजय माकन, भूपिन्दर सिंह हुड्डा, कीर्ति आजाद र समाजवादी पार्टीका अखिलेश यादव पनि चुनावी मैदानमा छन्।
छैटाैं चरणअन्तर्गत आज चुनाव भइरहेका कूल ५९ सिटमध्ये यसअघि सन् २०१४ मा भारतीय जनता पार्टी (भाजपा)सहितकाे गठबन्धन 'एनडिए'लाई ४६ र भारतीय कांग्रेस गठबन्धन 'युपिए'लाई मात्र ११ स्थानमा जित मिलेकाे थियाे।
.jpg)
यी क्षेत्रमा हुँदैछ चुनाव:
उत्तर प्रदेश - सुल्तानपुर, प्रतापगढ, फूलपुर, प्रयागराज, अम्बेडकर नगर, श्रावस्ती, डुमरियागञ्ज, बस्ती, सन्त कबीर नगर, लालागञ्ज, आजमगढ, जाेनपुर, मछलीशहर, भदोई
बिहार - वाल्मिकी नगर, पश्चिमी चम्पारण, पूर्वी चम्पारण, शिवहर, वैशाली, गोपालगञ्ज, सिवान र महाराजगञ्ज
झारखंड - गिरिडिह, धनबाद, जमशेदपुर, सिंहभूमी
मध्य प्रदेश - मुरैना, भिन्ड, ग्वालियर, गुना, सागर, विदिशा, भोपाल, राजगढ
पश्चिम बंगाल - तामलुक, काँठी, घटाल, झारग्राम, मेदिनीपुर, पुरुलिया, बाँकुरा, बिष्णुपुर
हरियाणा - रोहतक, सोनीपत, भिवानी महेँद्रगढ, सिरसा, हिसार, गुडगाउँ, फरिदाबाद, अम्बाला, कुरुक्षेत्र, करनाल
दिल्ली- नयाँ दिल्ली, चाँदनी चाेक, पूर्वी दिल्ली, पश्चिमी दिल्ली, उत्तर-पूर्वी दिल्ली, उत्तर पश्चिम दिल्ली, दक्षिण दिल्ली
कहाँ कसकाे पल्ला भारी?
अहिले दिल्लीका ७ सिटसहित सबै राज्यमा शान्तिपूर्ण रुपमा मतदान भइरहेकाे भारतकाे चुनाव आयाेगले जनाएकाे छ। दिल्ली यस्ताे क्षेत्र हाे जहाँ केही चुनावयता भाेट खस्ने दर लगातार बढेकाे छ। सन् २००९ काे लाेकसभा चुनावमा दिल्लीमा ५१.८ प्रतिशत मतदान भएकाे थियाे भने। सन् २०१४ मा बढेर याे संख्या ६५.१ प्रतिशत पुगेकाे थियाे।
मतदानका लागि लाइनमा बस्दै भारतीय क्रिकेट टाेलीका कप्तान विराट काेहली।
विश्लेषकका अनुसार यसरी मतदाताकाे सहभागिता बढ्नुकाे प्रमुख कारण आम आदमी पार्टीकाे उदय हाे। तर, सन् २०१४ मा सत्तारुढ भारतीय जनता पार्टी (भाजपा)लाई दिल्लीका सबै ७ स्थानमा जित मिलेकाे थियाे।
अहिले भने दिल्लीका सबै स्थानमा त्रिकोणीय प्रतिस्पर्धा रहेकाे बताइएकाे छ। दिल्लीमा जारी चुनावलाई लिएर आम आदमी पार्टी र भारतीय कांग्रेसबीच गठबन्धनकाे काेशिस गरिए पनि सफल हुन सकेकाे थिएन। यद्दपि आम आदमीले अघिलाे पटक विधानसभा निर्वाचनमा जित हात पारेर सरकार चलाइहेकाेले पनि दिल्लीमा भाजपा र कांग्रेसलाई सहज भने पक्कै हुनेछैन।
उता हरियाणामा विपक्षी पार्टीका बीचमा कुनै बलियाे गठबन्धन छैन। सन् १९६० काे दशकदेखि लाेकसभामा जीतका लागि अग्रसर देखिएकाे पार्टीलाई नै दिल्लीबासीले भाेट गर्ने गरेकाे इतिहास छ।
उत्तर प्रदेशमा आज कूल १४ सिटका लागि मतदान भइरहेकाे छ। भाजपालाई सन् २०१४ काे निर्वाचनमा आजमगढबाहेक सबै क्षेत्रमा जित मिलेकाे थियाे। यसपटक भने आजमगढमा मुलायम सिंह यादवका छाेरा र उत्तर प्रदेशका पूर्व मुख्यमन्त्री अखिलेश यादव चुनावी मैदानमा छन्। यसपटक राम्राे पकड राखेका क्षत्रीय दलहरु बहुजन समाज पार्टी र समाजवादी पार्टीबीच यस क्षेत्रमा गठबन्धन भएकाेले पनि भाजपालाई यसअघिकाे साख कायम राख्न मुश्किल पर्ने देखिन्छ।
आज भोपालमा पनि मतदान जारी छ। यहाँ मध्य प्रदेशका पूर्व मुख्यमन्त्री दिग्विजय सिंह र आतंककारी हमलामा सामेल भएकाे भन्दै छानबिनकाे सामना गरिरहेका प्रज्ञा ठाकुरलगायत चुनावी मैदानमा छन्। प्रज्ञाका कारण पनि भोपाल लोकसभा चुनाव चर्चामा रहेकाे बताइएकाे छ।
मतदानपछि प्रज्ञा ठाकुर।
भाेट हाल्न माेदी र केजरीवालकाे अपील
यसैबीच प्रधानमन्त्री नरेन्द्र मोदीले एक ट्विट गर्दै चुनाव सामेल हुन सबै मतदातालाई अनुराेध गरेका छन्। 'जसकाे क्षेत्रम आज चुनाव छ, म सबै मतदातालाई आग्रह गर्दछु कि सबै मतदान केन्द्रमा जानुहाेस् र आफ्नाे मताधिकार सुरक्षित गर्नुहाेस्। तपाईं सबैकाे सहभागिताबाट मात्रै चुनाव सफल हुनेछ', माेदील ट्विटमा भनेका छन्।
यस्तै दिल्लीका मुख्यमन्त्री अरविन्द केजरीवालले पनि एक ट्विट गर्दै मतदान गर्न आग्रह गरेका छन्। उनले मतदाताहरुलाई 'तपाईंकाे भाेटले देश बदल्नसक्छ' भन्दै जसले काम गरेकाे छ उसैलाई भाेट दिन अपिल गरेका छन्। 'घृणा र विष फैलाउने तथा दिल्लीमा काम राेक्नेलाई भाेट नदिनुस्', केजरीवालले ट्विटमा भनेका छन्।
यी दिग्गजले हाले हालसम्म भाेट
मतदान गर्दै राष्ट्रपति काेविन्द।
भारतीय लाेकसभा चुनाव अन्तर्गत छैटाैं चरणकाे मतदानमा राष्ट्रपति रामनाथ कोविन्द सहभागी भएका छन्। उनले राष्ट्रपति भवनस्थित मतदान केन्द्रमा भाेट हाल्दै आफ्नाे मताधिकार सुरक्षित गरेका हुन्।
दिल्लीकी पूर्व मुख्यमन्त्री तथा उत्तर-पूर्वी दिल्लीबाट कांग्रेसकाे उम्मेदवार बनेकी शीला दीक्षितले निजामुद्दिन पुगेर भाेट हालेकी छिन्।
त्यस्तै मध्य प्रदेशमा भाजपा प्रत्यासी प्रज्ञा ठाकुरले समेत आफ्नाे भाेट खसालेकी छिन्। मतदान गर्नेमा पूर्वी दिल्लीबाट भाजपाकाे उम्मेदवार बनेका पूर्व भारतीय क्रिकेटर गौतम गम्भीर पनि छन्। उनले ओल्ड राजेन्द्रनगरकाे एक मतदान केन्द्रमा पुगेर मतदान गरेका थिए।
भारतीय क्रिकेट टिमका कप्तान विराट कोहलीले पनि बिहानै गुरुग्रामकाे पाइनक्रेस्ट स्कूल मतदान केन्द्रमा पुगेर मतदान गरेका छन्।
भाजपा उम्मेदवारसमेत रहेका पूर्व भारतीय क्रिकेटर गाैतम गम्भीर मतदानका लागि लाइनमा।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1778155080.jpg)
-1764146706.png)
