काठमाडौं– निर्वाचन आयोगले प्रत्यक्ष तर्फको ४ दिनभित्र र समानुपातिक तर्फको ८ दिनभित्र मतपरिणाम सार्वजनिक गर्ने घोषणा गरेको छ।
आज आयोगमा भएको पत्रकार सम्मेलनमा आयुक्त ईश्वरी न्यौपानेले यसअघि भएको स्थानीय निर्वाचन र अहिलेको प्रदेश र प्रतिनिधि सभाको निर्वाचन फरक भएकाले छिटै मतपरिणाम सार्वजनिक हुने बताए।
आयुक्त न्यौपानेले प्रत्यक्षतर्फ पहिला मत गणना हुने र सम्भव भएमात्र समानुपातिक मत गणनसँगै गर्ने तयारीमा आयोग रहेको बताए।
‘अहिलेसम्म हामी प्रतिनिधि सभा र प्रदेशको प्रत्यक्ष गणना गर्ने अनि समानुपातिकको गणना गर्ने पक्षमा छौ’, आयुक्त न्यौपानेले भने, ‘२१ गते ५ बजेपछि पहिलो चरणमा भएको मतदानको गणना सुरू गरिने छ।’
दोस्रो चरणको मत गणना भने मतपेटिकाहरु जिल्ला निर्वाचन कार्यलयमा संकलन भएपछि सर्वदलीय बैठक राखेर सुरु गरिने उनले बताए।
मत गणनालाई छिटो गर्न आवश्यक कर्मचारीको व्यवस्था मिलाएको र एक साताभित्र सबै जिल्लाको परिणाम आउने उनले दाबी गरे।
पत्रकार सम्मेलनमा निर्वाचनका लागि आवश्यक सबै तयारी पूरा भएको आयुक्त न्यौपानेले जानकारी दिए।
‘आयोग दोस्रो चरणमा हुने निर्वाचनको सम्पूर्ण तयारी पूरा गरेर बसेको छ’ आयुक्त न्यौपानेले भने, ‘सबै निर्वाचन क्षेत्रमा निर्वाचनका सामाग्री पुगेका छन्।’
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1786602170.png)
