प्योङयाङ- दक्षिण कोरियाको राजधानी सोलमा सोमबारदेखि सुरु भएको अमेरिका र दक्षिण कोरियाको संयुक्त हवाई सैन्य अभ्यासको उत्तर कोरियाले कडा शब्दमा विरोध गरेको छ।
यी दुई देशको अहिलेसम्मकै सबैभन्दा ठूलो हवाई सैन्य अभ्यास पाँच दिनसम्म चल्ने बताइएको छ। उत्तर कोरियाले आफू विरुद्ध लक्षित उक्त सैन्य अभ्यासको जवाफ दिने चेतावनी दिएको उत्तर कोरियाको सरकारी समाचार समिति, केसिएनएले जनाएको छ।
सैन्य अभ्यास कोरियाली प्रायद्वीप क्षेत्रमा देखिएको अस्थिरता नियन्त्रण गरी दक्षिण कोरिया र अमेरिकाको सम्बन्ध विस्तारका लागि गरिएको बताइएको भए पनि यसलाई यी दुई देशले उत्तर कोरियालाई आणविक परीक्षणको जवाफ दिएको रुपमा धेरैले हेरेका छन्।
उत्तर कोरियाले आफू विरुद्ध उत्तेजना फैलाउने र उत्तर कोरियामाथि आक्रमणका लागि बल जाँच्ने उद्देश्यले यो सैन्य अभ्यास गरेको बताएको छ। संयुक्त सैन्य अभ्यासले अन्तर्राष्ट्रिय कानुनको उल्लंघन गरेको भन्दै उसले यो अभ्यास रोक्न पनि भनेको छ। उत्तरले यसलाई सार्वभौम सत्तामाथिको हमलाको रुपमा लिएको जनाएको छ।
सैन्य अभ्यासमा अमेरिका र दक्षिण कोरियाका गरी करिब २ सय ३० वटा युद्धक विमानहरुको प्रयोग गरिएको छ। यसलाई स्थलमार्गबाट पनि निगरानी गरिएको छ, जहाँ हजारौं स्थल सेना छन्।
केही दिनअघि मात्र उत्तर कोरियाले अहिलेसम्मकै सबैभन्दा शक्तिशाली क्षेप्यास्त्र हानेको थियो। उक्त क्षेप्यास्त्रका विरुद्धमा दक्षिण कोरिया र अमेरिकाले यो अभ्यास सुरु गरेका बताइएको छ। (रासस/सिन्ह्वा)
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
