इटहरी– नेपाली राजनीतिका चतुर खेलाडी कांग्रेसका विजय गच्छदारलाई यसपाली प्रतिनिधिसभा निर्वाचनमा पुरानै प्रतिस्पर्धी नेकपा एमालेकी नेतृ भगवती चौधरीले टक्कर दिँदै छिन्।
सुनसरी क्षेत्र नम्बर ३ का प्रतिनिधिसभा सदस्य उम्मेदवार गच्छदार यो निर्वाचन जितेर संसदीय इतिहासमा ‘डबल ह्याट्रिक’ गर्ने योजनामा छन्। उनीसँग संविधानसभाको दोस्रो निर्वाचनमा भगवती ३ सय ६२ मतको झिनो अन्तरले पराजित भएकी थिइन्। तर, यसपालि भने भगवती वाम गठबन्धनकी साझा उम्मेदवार भएकाले गच्छदारका लागि थप चुनौती छ।
त्यसो त पुरानै पार्टी नेपाली कांग्रेसमा फर्किएका कारण गच्छदारका लागि मंसिर २१ मा हुने निर्वाचनमा जित सहज बनेको विश्लेषण गर्नेको पनि कमी छैन।
गच्छदार प्रतिकूल स्थितिमा पनि निर्वाचन जित्ने राजनीतिक खेलाडीको रुपमा माहिर छन्। यो निर्वाचनमा कांग्रेसका तीन उम्मेदवार ‘डबल ह्याट्रिक’ नजिक छन्। गच्छदारसँगै कांग्रेस सभापति शेरबहादुर देउवा र वरिष्ठ नेता रामचन्द्र पौडैल पनि ‘डबल ह्याट्रिक’ निकट छन्।
‘लोकतान्त्रिक फोरम नेपाली कांग्रेसमा समायोजन भएपछि हाम्रो अवस्था झन् सुदृढ भएको छ’, विजय गच्छदार निकट हरि न्यौपाने भन्छन्।
स्थानीय तहको निर्वाचनमा गच्छदारले आफूले स्थापना गरेको लोकतान्त्रिक फोरमलाई दुई ठाउँबाट मात्र जित दिलाउन सकेका थिए। कांग्रेससँग पछिल्लो समय भएको समायोजनले भने उनमा ऊर्जा थपिएको छ।
सुनसरीको ३ मा इटहरीको १० वटा वडा, दुहवी नगरपालिका, गढी, बर्जु गाउँपालिका र इनरुवाको वडा नम्बर ७ समेटिएको छ।
गच्छदारकी प्रतिस्पर्धी भगवती भने गच्छदारले सामना गरेको आन्तरिक चुनौतीको फाइदा आफूले पाउनेमा आशावादी छिन्।
‘कांग्रेसमा लोकतान्त्रिक फोरम विलय गराउँदा असन्तुष्ट भएका उनका सहयोगीहरूले मलाई सघाउनेछन्, यसमा ढुक्क छु’, उनी भन्छिन्।
उनी २५ वर्ष संसदीय राजनीतिमा हुँदा पनि गच्छदारले आफ्नो क्षेत्रको विकासमा कुनै काम नगरेको आरोप लगाउँछिन्। यसपाली स्थानीय जनताले विकासको नारालाई महत्व दिएकाले आफूले गच्छदारलाई हराउने कुरामा दुईमत नभएको उनको भनाइ छ।
तर, गच्छदार यस्ता खेलाडी हुन्, जो ०४८ सालदेखि सुनसरीबाट अनवरत विजय भइरहेका छन्। मधेस आन्दोलनपछि कांग्रेस छाडेर उपेन्द्र यादव नेतृत्वको मधेसी जनअधिकार फोरममा गएका गच्छदारले पहिलो संविधानसभा निर्वाचनमा मसाल चुनाव चिह्नमा जित हात पारेका थिए।
यसपछि पार्टी फुटाएर मधेसी जनअधिकार फोरम (लोकतान्त्रिक) बनाएका उनले ०७० को दोस्रो संविधानसभा निर्वाचनमा नमस्कार चिह्नबाट विजयी भएका थिए।
अहिले ०५६ पछि रुख चिह्नमा पुनः फर्किएका गच्छदारले छैटौं पल्ट निर्वाचन जितेर ‘डबल ह्याट्रिक’ गर्ने हुन् कि होइनन्, यो रोचक विषय बनेको छ।
गच्छदार सुनसरीमा एक्लो यस्ता नेता हुन्, जसले ०५६ सालयता कहिल्यै स्थानीयहरूको घर–घरमा पुगेर भोट मागेका छैनन्। उनले कोणसभा र आमसभाबाटै मतदातालाई रिझाउने गरेका छन्। तर पनि उनी निर्वाचनको हरेक परीक्षामा पास हुँदै आएका छन्।
नेपाललाइभमा प्रकाशित सामग्रीबारे कुनै गुनासो,
सूचना तथा सुझाव भए हामीलाई nepallivenews@gmail.com मा
पठाउनु होला।
-1791950786-1793201567.png)
-1786602170.png)
